ໂຢຮັນ 8 - ພຣະຄຳພີລາວສະບັບສະໄໝໃໝ່1 ແຕ່ພຣະເຢຊູເຈົ້າໄດ້ໄປຍັງພູເຂົາໝາກກອກ. 2 ພໍຮຸ່ງເຊົ້າພຣະອົງກໍເຂົ້າໄປໃນເດີ່ນວິຫານອີກ, ບ່ອນທີ່ຄົນທັງຫລາຍໄດ້ມາເຕົ້າໂຮມກັນຢູ່ອ້ອມພຣະອົງ ແລະ ພຣະອົງນັ່ງລົງເພື່ອສັ່ງສອນພວກເຂົາ. 3 ພວກຄູສອນກົດບັນຍັດ ແລະ ພວກຟາຣີຊາຍໄດ້ນຳເອົາຍິງຄົນໜຶ່ງທີ່ຖືກຈັບໃນຖານຫລິ້ນຊູ້ມາ. ພວກເຂົາໄດ້ໃຫ້ນາງຢືນຢູ່ຕໍ່ໜ້າຄົນກຸ່ມນັ້ນ 4 ແລ້ວກ່າວຕໍ່ພຣະເຢຊູເຈົ້າວ່າ, “ອາຈານເອີຍ, ຍິງຜູ້ນີ້ຖືກຈັບໃນເວລາທີ່ກຳລັງຫລິ້ນຊູ້ຢູ່. 5 ໃນໜັງສືກົດບັນຍັດຂອງໂມເຊໄດ້ສັ່ງໃຫ້ພວກເຮົາເອົາກ້ອນຫີນແກວ່ງໃສ່ແມ່ຍິງທີ່ເຮັດຢ່າງນີ້. ສ່ວນທ່ານຈະວ່າຢ່າງໃດ?” 6 ພວກເຂົາໃຊ້ຄຳຖາມນີ້ເປັນບ້ວງແຮ້ວເພື່ອຊອກຫາເຫດກ່າວຫາພຣະອົງ. ແຕ່ພຣະເຢຊູເຈົ້າກົ້ມລົງ ແລະ ໃຊ້ນິ້ວມືຂຽນລົງທີ່ພື້ນດິນ. 7 ເມື່ອພວກເຂົາຍັງຖາມບໍ່ຢຸດ ພຣະອົງຈຶ່ງຢືດໂຕຂຶ້ນແລ້ວກ່າວກັບພວກເຂົາວ່າ, “ຜູ້ໃດໃນພວກເຈົ້າທີ່ບໍ່ມີບາບໃຫ້ຜູ້ນັ້ນເອົາກ້ອນຫີນແກວ່ງໃສ່ນາງເປັນຄົນທຳອິດ”. 8 ແລ້ວພຣະອົງກໍກົ້ມລົງຂຽນໃສ່ພື້ນດິນອີກ. 9 ໃນເວລານັ້ນ, ບັນດາຄົນທີ່ໄດ້ຍິນກໍເລີ່ມໜີອອກໄປເທື່ອລະຄົນ ເລີ່ມຈາກຜູ້ເຖົ້າກ່ອນຈົນເຫລືອແຕ່ພຣະເຢຊູເຈົ້າກັບຍິງຄົນນັ້ນທີ່ຍັງຢືນຢູ່ທີ່ນັ້ນ. 10 ພຣະເຢຊູເຈົ້າຈຶ່ງຢືດໂຕຂຶ້ນ ແລະ ຖາມວ່າ, “ນາງເອີຍ, ພວກເຂົາໄປໃສໝົດ? ບໍ່ມີຜູ້ໃດລົງໂທດເຈົ້າບໍ?” 11 ນາງຕອບວ່າ, “ນາຍເອີຍ, ບໍ່ມີຜູ້ໃດ”. ພຣະເຢຊູເຈົ້າກ່າວວ່າ, “ເຮົາກໍບໍ່ຕັດສິນລົງໂທດເຈົ້າເໝືອນກັນ. ບັດນີ້ ຈົ່ງໄປສາ ແລະ ຈົ່ງລະຖິ້ມວິຖີຊີວິດບາບຂອງເຈົ້າ”. ———————————————————— ຄຳພະຍານຂອງພຣະເຢຊູເຈົ້າເຊື່ອຖືໄດ້ 12 ເມື່ອພຣະເຢຊູເຈົ້າໄດ້ກ່າວກັບປະຊາຊົນອີກ, ພຣະອົງກ່າວວ່າ, “ເຮົານີ້ແຫລະ ເປັນຄວາມສະຫວ່າງຂອງໂລກ. ຜູ້ໃດກໍຕາມທີ່ຕາມເຮົາມາຈະບໍ່ເດີນໃນຄວາມມືດ, ແຕ່ຈະມີຄວາມສະຫວ່າງແຫ່ງຊີວິດ”. 13 ພວກຟາຣີຊາຍຈຶ່ງທ້າທາຍພຣະອົງວ່າ, “ເບິ່ງແມ! ທ່ານເປັນພະຍານໃຫ້ແກ່ຕົນເອງ ຄຳພະຍານຂອງທ່ານກໍເຊື່ອຖືບໍ່ໄດ້”. 14 ພຣະເຢຊູເຈົ້າຕອບວ່າ, “ເຖິງແມ່ນເຮົາເປັນພະຍານໃຫ້ຕົນເອງ, ຄຳພະຍານຂອງເຮົາກໍຖືກຕ້ອງ ເພາະເຮົາຮູ້ວ່າເຮົາມາແຕ່ໃສ ແລະ ຈະໄປໃສ. ແຕ່ພວກເຈົ້າບໍ່ຮູ້ເລີຍວ່າເຮົາມາແຕ່ໃສ ຫລື ຈະໄປໃສ. 15 ພວກເຈົ້າຕັດສິນຕາມມາດຕະຖານຂອງມະນຸດ; ສ່ວນເຮົາບໍ່ຕັດສິນຜູ້ໃດ. 16 ແຕ່ຖ້າເຮົາຕັດສິນ, ຄຳຕັດສິນຂອງເຮົາກໍຖືກຕ້ອງ ເພາະເຮົາບໍ່ໄດ້ເຮັດໂດຍເຮົາເອງຜູ້ດຽວ ພຣະບິດາເຈົ້າຜູ້ໃຊ້ເຮົາມາໄດ້ສະຖິດຢູ່ກັບເຮົາ. 17 ໃນໜັງສືກົດບັນຍັດຂອງພວກເຈົ້າເອງກໍຂຽນໄວ້ວ່າຄຳພະຍານຂອງສອງຄົນກໍເປັນຄວາມຈິງ. 18 ເຮົາເປັນພະຍານໃຫ້ໂຕເຮົາເອງ ແລະ ພະຍານອີກຜູ້ໜຶ່ງຂອງເຮົາກໍຄືພຣະບິດາເຈົ້າຜູ້ໃຊ້ເຮົາມາ”. 19 ພວກເຂົາຈຶ່ງຖາມພຣະອົງວ່າ, “ພຣະບິດາເຈົ້າຂອງທ່ານຢູ່ໃສ?” ພຣະເຢຊູເຈົ້າຕອບວ່າ, “ພວກເຈົ້າບໍ່ຮູ້ຈັກເຮົາ ຫລື ພຣະບິດາເຈົ້າຂອງເຮົາ, ຖ້າພວກເຈົ້າຮູ້ຈັກເຮົາ ພວກເຈົ້າກໍຮູ້ຈັກພຣະບິດາເຈົ້າຂອງເຮົາເໝືອນກັນ”. 20 ພຣະເຢຊູເຈົ້າກ່າວຄຳເຫລົ່ານີ້ໃນຂະນະທີ່ສັ່ງສອນຢູ່ໃນເດີ່ນວິຫານໃກ້ກັບບ່ອນວາງເຄື່ອງຖວາຍ. ແຕ່ກໍບໍ່ມີຜູ້ໃດຈັບພຣະອົງ, ເພາະຍັງບໍ່ເຖິງເວລາຂອງພຣະອົງເທື່ອ. 21 ພຣະເຢຊູເຈົ້າໄດ້ກ່າວກັບພວກເຂົາອີກເທື່ອໜຶ່ງວ່າ, “ເຮົາກຳລັງຈະໄປ ແລ້ວພວກເຈົ້າຈະຊອກຫາເຮົາ ແລະ ພວກເຈົ້າຈະຕາຍໃນຄວາມບາບຂອງພວກເຈົ້າ. ບ່ອນທີ່ເຮົາຈະໄປນັ້ນພວກເຈົ້າບໍ່ສາມາດໄປໄດ້”. 22 ຖ້ອຍຄຳນີ້ເຮັດໃຫ້ພວກຢິວຖາມກັນວ່າ, “ລາວຈະຂ້າໂຕຕາຍບໍ? ເພາະລາວເວົ້າວ່າ, ‘ບ່ອນທີ່ເຮົາຈະໄປນັ້ນພວກເຈົ້າບໍ່ສາມາດໄປໄດ້’?” 23 ແຕ່ພຣະອົງກ່າວຕໍ່ໄປວ່າ, “ພວກເຈົ້າມາຈາກເບື້ອງລຸ່ມ ເຮົາມາຈາກເບື້ອງເທິງ. ພວກເຈົ້າເປັນຂອງຝ່າຍໂລກນີ້ ເຮົາບໍ່ໄດ້ເປັນຂອງຝ່າຍໂລກນີ້. 24 ເຮົາໄດ້ບອກພວກເຈົ້າທັງຫລາຍວ່າພວກເຈົ້າຈະຕາຍໃນຄວາມບາບຂອງພວກເຈົ້າ, ຖ້າພວກເຈົ້າບໍ່ເຊື່ອວ່າເຮົາເປັນຜູ້ນັ້ນ ພວກເຈົ້າຈະຕາຍໃນບາບຂອງພວກເຈົ້າຢ່າງແນ່ນອນ”. 25 ພວກເຂົາຈຶ່ງຖາມວ່າ, “ທ່ານແມ່ນຜູ້ໃດ?” ພຣະເຢຊູເຈົ້າຕອບວ່າ, “ເຮົາເປັນຜູ້ທີ່ເຮົາໄດ້ບອກພວກເຈົ້າຕັ້ງແຕ່ຕົ້ນນັ້ນ. 26 ເຮົາມີຫລາຍຢ່າງທີ່ຈະກ່າວໃນການຕັດສິນພວກເຈົ້າ ແຕ່ພຣະອົງຜູ້ໃຊ້ເຮົາມານັ້ນກໍເຊື່ອຖືໄດ້ ແລະ ສິ່ງທີ່ເຮົາໄດ້ຍິນມາຈາກພຣະອົງນັ້ນເຮົາກໍແຈ້ງແກ່ໂລກ”. 27 ພວກເຂົາບໍ່ໄດ້ເຂົ້າໃຈວ່າພຣະອົງກຳລັງບອກພວກເຂົາກ່ຽວກັບພຣະບິດາເຈົ້າຂອງພຣະອົງ. 28 ດັ່ງນັ້ນ ພຣະເຢຊູເຈົ້າຈຶ່ງກ່າວວ່າ, “ເມື່ອໃດພວກເຈົ້າທັງຫລາຍຍົກບຸດມະນຸດຂຶ້ນແລ້ວ ເມື່ອນັ້ນແຫລະ ພວກເຈົ້າຈຶ່ງຈະຮູ້ວ່າເຮົາເປັນຜູ້ນັ້ນ ແລະ ເຮົາບໍ່ໄດ້ເຮັດສິ່ງໃດຕາມໃຈຂອງເຮົາເອງ ແຕ່ກ່າວຕາມທີ່ພຣະບິດາເຈົ້າໄດ້ສອນເຮົາໄວ້. 29 ພຣະອົງຜູ້ໃຊ້ເຮົາມາກໍສະຖິດຢູ່ກັບເຮົາ, ພຣະອົງບໍ່ໄດ້ປະຖິ້ມເຮົາໄວ້ພຽງຄົນດຽວ ເພາະເຮົາເຮັດສິ່ງທີ່ພຣະອົງພໍໃຈສະເໝີ”. 30 ເມື່ອພຣະອົງກ່າວດັ່ງນີ້ແລ້ວ ຫລາຍຄົນກໍໄດ້ເຊື່ອໃນພຣະອົງ. ການຖົກຖຽງກັນເລື່ອງລູກຂອງຜູ້ໃດທີ່ເປັນຜູ້ຄັດຄ້ານພຣະເຢຊູເຈົ້າ 31 ພຣະເຢຊູເຈົ້າກ່າວຕໍ່ພວກຢິວທີ່ໄດ້ເຊື່ອໃນພຣະອົງວ່າ, “ຖ້າພວກເຈົ້າທັງຫລາຍຕັ້ງໝັ້ນຄົງຢູ່ໃນຄຳສັ່ງສອນຂອງເຮົາ ພວກເຈົ້າກໍເປັນສາວົກແທ້ຂອງເຮົາ. 32 ແລ້ວພວກເຈົ້າຈະໄດ້ຮູ້ຈັກຄວາມຈິງ ແລະ ຄວາມຈິງນັ້ນຈະເຮັດໃຫ້ພວກເຈົ້າເປັນອິດສະຫລະ”. 33 ພວກເຂົາຕອບວ່າ, “ພວກເຮົາເປັນລູກຫລານຂອງອັບຣາຮາມ ແລະ ບໍ່ເຄີຍເປັນຂ້າທາດຂອງຜູ້ໃດ. ເປັນຫຍັງທ່ານຈຶ່ງເວົ້າວ່າພວກເຮົາຈະເປັນອິດສະຫລະ?” 34 ພຣະເຢຊູເຈົ້າຕອບວ່າ, “ເຮົາບອກພວກເຈົ້າຕາມຄວາມຈິງວ່າ ທຸກຄົນທີ່ເຮັດບາບກໍເປັນຂ້າທາດຂອງບາບນັ້ນ. 35 ຂ້າທາດບໍ່ໄດ້ຢູ່ໃນຄອບຄົວຕະຫລອດໄປ ແຕ່ລູກຊາຍກໍຢູ່ໃນຄອບຄົວຕະຫລອດໄປ. 36 ດັ່ງນັ້ນ ຖ້າພຣະບຸດຈະເຮັດໃຫ້ພວກເຈົ້າເປັນອິດສະຫລະ ພວກເຈົ້າກໍຈະເປັນອິດສະຫລະຢ່າງແທ້ຈິງ. 37 ເຮົາຮູ້ວ່າພວກເຈົ້າເປັນລູກຫລານຂອງອັບຣາຮາມ. ພວກເຈົ້າຊອກຫາໂອກາດເພື່ອຈະຂ້າເຮົາ ເພາະຄຳສັ່ງສອນຂອງເຮົາບໍ່ໄດ້ເຂົ້າສູ່ໃຈຂອງພວກເຈົ້າ. 38 ເຮົາກຳລັງບອກພວກເຈົ້າເຖິງສິ່ງທີ່ເຮົາໄດ້ເຫັນເມື່ອຢູ່ກັບພຣະບິດາເຈົ້າ ແລະ ພວກເຈົ້າກໍເຮັດສິ່ງທີ່ພວກເຈົ້າໄດ້ຍິນຈາກພໍ່ຂອງພວກເຈົ້າ”. 39 ພວກເຂົາຕອບວ່າ, “ພໍ່ຂອງພວກເຮົາແມ່ນອັບຣາຮາມ”. ພຣະເຢຊູເຈົ້າກ່າວວ່າ, “ຖ້າພວກເຈົ້າເປັນລູກຂອງອັບຣາຮາມ ພວກເຈົ້າກໍຈະເຮັດສິ່ງທີ່ອັບຣາຮາມໄດ້ເຮັດ. 40 ແຕ່ບັດນີ້ ພວກເຈົ້າຕັ້ງໃຈຊອກຫາໂອກາດທີ່ຈະຂ້າເຮົາ, ຜູ້ທີ່ໄດ້ບອກພວກເຈົ້າເຖິງຄວາມຈິງທີ່ເຮົາໄດ້ຍິນມາຈາກພຣະເຈົ້າ. ອັບຣາຮາມບໍ່ໄດ້ເຮັດຢ່າງນີ້. 41 ພວກເຈົ້າກຳລັງເຮັດຕາມສິ່ງທີ່ພໍ່ຂອງພວກເຈົ້າເອງໄດ້ເຮັດ”. ພວກເຂົາຄັດຄ້ານວ່າ, “ພວກເຮົາບໍ່ແມ່ນລູກທີ່ເກີດນອກກົດໝາຍ ພວກເຮົາມີພຣະບິດາເຈົ້າອົງດຽວຄືພຣະເຈົ້າເທົ່ານັ້ນ”. ລູກຂອງມານຮ້າຍ 42 ພຣະເຢຊູເຈົ້າກ່າວກັບພວກເຂົາວ່າ, “ຖ້າພຣະເຈົ້າເປັນພຣະບິດາຂອງພວກເຈົ້າແລ້ວ, ພວກເຈົ້າກໍຈະຮັກເຮົາ, ເພາະເຮົາມາຈາກພຣະເຈົ້າ ແລະ ເຮົາຢູ່ທີ່ນີ້ແລ້ວ. ເຮົາບໍ່ໄດ້ມາເອງ, ແຕ່ພຣະອົງໄດ້ໃຊ້ເຮົາມາ. 43 ເປັນຫຍັງພາສາຂອງເຮົາບໍ່ຊັດເຈນຕໍ່ພວກເຈົ້າບໍ? ເພາະພວກເຈົ້າບໍ່ສາມາດໄດ້ຮັບຟັງສິ່ງທີ່ເຮົາກ່າວ. 44 ພວກເຈົ້າທັງຫລາຍເປັນຂອງພໍ່ຂອງພວກເຈົ້າ, ມານຮ້າຍ ແລະ ພວກເຈົ້າຕ້ອງການເຮັດຕາມຄວາມປາຖະໜາຂອງພໍ່ຂອງພວກເຈົ້າ. ມັນເປັນຜູ້ຂ້າຄົນຕັ້ງແຕ່ຕົ້ນເດີມມາແລ້ວ, ມັນບໍ່ໄດ້ຕັ້ງໝັ້ນຢູ່ໃນຄວາມຈິງ, ເພາະໃນໂຕມັນບໍ່ມີຄວາມຈິງ. ເມື່ອມັນເວົ້າຕົວະມັນກໍເວົ້າຕາມສັນດານຂອງມັນເອງເພາະມັນເປັນຜູ້ຕົວະ ແລະ ເປັນພໍ່ຂອງຄຳຕົວະ. 45 ແຕ່ເພາະເຮົາບອກຄວາມຈິງ ພວກເຈົ້າຈຶ່ງບໍ່ເຊື່ອເຮົາ! 46 ໃນພວກເຈົ້າມີຜູ້ໃດແດ່ທີ່ພິສູດໄດ້ວ່າເຮົາເຮັດບາບ? ຖ້າເຮົາເວົ້າຄວາມຈິງເປັນຫຍັງພວກເຈົ້າຈຶ່ງບໍ່ເຊື່ອເຮົາ? 47 ຜູ້ໃດກໍຕາມທີ່ເປັນຂອງພຣະເຈົ້າຍ່ອມຮັບຟັງຖ້ອຍຄຳທີ່ພຣະເຈົ້າກ່າວ. ເຫດຜົນທີ່ພວກເຈົ້າບໍ່ຮັບຟັງກໍເພາະວ່າພວກເຈົ້າບໍ່ໄດ້ເປັນຂອງພຣະເຈົ້າ”. ພຣະເຢຊູເຈົ້າກ່າວກ່ຽວກັບພຣະອົງເອງ 48 ພວກຢິວຕອບພຣະອົງວ່າ, “ພວກເຮົາເວົ້າຖືກຕ້ອງແລ້ວບໍ່ແມ່ນບໍວ່າເຈົ້າເປັນຊາວຊາມາເຣຍ ແລະ ມີຜີມານຮ້າຍສິງຢູ່?” 49 ພຣະເຢຊູເຈົ້າກ່າວວ່າ, “ເຮົາບໍ່ໄດ້ຖືກຜີມານຮ້າຍສິງ, ແຕ່ເຮົາຖວາຍກຽດແກ່ພຣະບິດາເຈົ້າຂອງເຮົາ ແລະ ພວກເຈົ້າບໍ່ໃຫ້ກຽດເຮົາ. 50 ເຮົາບໍ່ໄດ້ສະແຫວງຫາກຽດສຳລັບຕົນເອງ ແຕ່ມີຜູ້ໜຶ່ງຊອກຫາໃຫ້ເຮົາ ແລະ ພຣະອົງເປັນຜູ້ຕັດສິນ. 51 ເຮົາບອກພວກເຈົ້າຕາມຄວາມຈິງວ່າ, ຜູ້ໃດກໍຕາມປະຕິບັດຕາມຄຳຂອງເຮົາ ຜູ້ນັ້ນກໍຈະບໍ່ພົບກັບຄວາມຕາຍຈັກເທື່ອ”. 52 ເມື່ອພວກຢິວໄດ້ຍິນຢ່າງນີ້ກໍຮ້ອງຂຶ້ນວ່າ, “ດຽວນີ້ພວກເຮົາຮູ້ແລ້ວວ່າຜີມານຮ້າຍສິງເຈົ້າຢູ່! ອັບຣາຮາມໄດ້ຕາຍໄປແລ້ວ ແລະ ບັນດາຜູ້ທຳນວາຍກໍໄດ້ຕາຍໄປແລ້ວເໝືອນກັນ, ແຕ່ເຈົ້າມາເວົ້າວ່າຜູ້ໃດກໍຕາມປະຕິບັດຕາມຄຳຂອງເຈົ້າຜູ້ນັ້ນຈະບໍ່ໄດ້ຊິມລົດຄວາມຕາຍຈັກເທື່ອ. 53 ເຈົ້າຍິ່ງໃຫຍ່ກວ່າອັບຣາຮາມພໍ່ຂອງພວກເຮົາບໍ? ອັບຣາຮາມໄດ້ຕາຍໄປແລ້ວ ແລະ ບັນດາຜູ້ທຳນວາຍກໍໄດ້ຕາຍໄປແລ້ວເໝືອນກັນ. ແລ້ວເຈົ້າຄິດວ່າເຈົ້າເປັນຜູ້ໃດ?” 54 ພຣະເຢຊູເຈົ້າຕອບວ່າ, “ຖ້າເຮົາຍົກຍ້ອງໃຫ້ກຽດແກ່ເຮົາເອງ, ກຽດຂອງເຮົາກໍບໍ່ມີຄວາມໝາຍ. ພຣະບິດາເຈົ້າຂອງເຮົາຄືຜູ້ທີ່ພວກເຈົ້າບອກວ່າເປັນພຣະເຈົ້າຂອງພວກເຈົ້າ ເປັນຜູ້ທີ່ຍົກຍ້ອງໃຫ້ກຽດເຮົາ. 55 ເຖິງແມ່ນວ່າພວກເຈົ້າຍັງບໍ່ຮູ້ຈັກພຣະອົງ, ແຕ່ເຮົາຮູ້ຈັກພຣະອົງ. ຖ້າເຮົາກ່າວວ່າເຮົາບໍ່ຮູ້ຈັກພຣະອົງ ເຮົາກໍເປັນຄົນຂີ້ຕົວະເໝືອນກັນກັບພວກເຈົ້າ, ແຕ່ເຮົາຮູ້ຈັກພຣະອົງ ແລະ ເຊື່ອຟັງຖ້ອຍຄຳຂອງພຣະອົງ. 56 ອັບຣາຮາມພໍ່ຂອງພວກເຈົ້າມີຄວາມຊື່ນຊົມຍິນດີທີ່ຈະເຫັນວັນຂອງເຮົາ, ເພິ່ນກໍໄດ້ເຫັນແລ້ວ ແລະ ມີຄວາມຊື່ນຊົມຍິນດີ”. 57 ພວກຢິວເວົ້າກັບພຣະອົງວ່າ, “ເຈົ້າມີອາຍຸຍັງບໍ່ຮອດຫ້າສິບປີ ແລະ ເຈົ້າໄດ້ເຫັນອັບຣາຮາມແລ້ວບໍ!” 58 ພຣະເຢຊູເຈົ້າກ່າວວ່າ, “ເຮົາບອກພວກເຈົ້າຕາມຄວາມຈິງວ່າ, ກ່ອນອັບຣາຮາມເກີດ, ເຮົາກໍເປັນຢູ່ແລ້ວ!” 59 ດັ່ງນັ້ນ ພວກເຂົາຈຶ່ງຈັບເອົາກ້ອນຫີນຂຶ້ນມາເພື່ອຈະແກວ່ງໃສ່ພຣະອົງ, ແຕ່ພຣະເຢຊູເຈົ້າຫລີກໜີ ແລະ ອອກໄປຈາກບໍລິເວນວິຫານ. |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.