2 ເທສະໂລນິກ 3 - ພຣະຄຳພີລາວສະບັບສະໄໝໃໝ່ຈົ່ງອະທິຖານເພື່ອ 1 ສຸດທ້າຍນີ້ພີ່ນ້ອງທັງຫລາຍເອີຍ, ຈົ່ງອະທິຖານເພື່ອພວກເຮົາດ້ວຍເພື່ອວ່າພຣະຄຳຂອງອົງພຣະຜູ້ເປັນເຈົ້າຈະໄດ້ແຜ່ຂະຫຍາຍໄປຢ່າງໄວວາ ແລະ ເປັນທີ່ຖວາຍກຽດເໝືອນທີ່ເປັນຢູ່ໃນທ່າມກາງພວກເຈົ້າ. 2 ແລະ ຈົ່ງອະທິຖານເພື່ອວ່າພວກເຮົາຈະໄດ້ຮັບການຊ່ວຍໃຫ້ພົ້ນຈາກຄົນຊົ່ວ ແລະ ຄົນຊົ່ວຮ້າຍ ເພາະວ່າບໍ່ແມ່ນທຸກຄົນທີ່ຈະມີຄວາມເຊື່ອ. 3 ແຕ່ອົງພຣະຜູ້ເປັນເຈົ້າສັດຊື່ ພຣະອົງຈະເຮັດໃຫ້ພວກເຈົ້າເຂັ້ມແຂງຂຶ້ນ ແລະ ປົກປ້ອງພວກເຈົ້າໃຫ້ພົ້ນຈາກຄົນຊົ່ວຮ້າຍ. 4 ພວກເຮົາໝັ້ນໃຈໃນອົງພຣະຜູ້ເປັນເຈົ້າວ່າພວກເຈົ້າກຳລັງປະຕິບັດຕາມສິ່ງທີ່ພວກເຮົາສັ່ງຢູ່ ແລະ ຈະເຮັດຢ່າງນັ້ນຕໍ່ໄປ. 5 ຂໍໃຫ້ອົງພຣະຜູ້ເປັນເຈົ້ານຳພາຫົວໃຈຂອງພວກເຈົ້າທັງຫລາຍໄປສູ່ຄວາມຮັກຂອງພຣະເຈົ້າ ແລະ ໃນຄວາມມານະອົດທົນຂອງພຣະຄຣິດເຈົ້າ. ຕັກເຕືອນບໍ່ໃຫ້ຂີ້ຄ້ານ 6 ພີ່ນ້ອງທັງຫລາຍເອີຍ, ພວກເຮົາຂໍສັ່ງພວກເຈົ້າໃນນາມຂອງພຣະເຢຊູຄຣິດເຈົ້າອົງພຣະຜູ້ເປັນເຈົ້າວ່າຈົ່ງຫລີກໜີຈາກຜູ້ທີ່ເຊື່ອທຸກຄົນທີ່ຂີ້ຄ້ານ, ກໍ່ກວນ ແລະ ບໍ່ຍອມດຳເນີນຊີວິດຕາມຄຳສັ່ງສອນທີ່ພວກເຈົ້າໄດ້ຮັບຈາກພວກເຮົາ. 7 ເພາະພວກເຈົ້າເອງກໍຮູ້ຢູ່ແລ້ວວ່າພວກເຈົ້າຄວນເຮັດຕາມແບບຢ່າງຂອງພວກເຮົາ. ເມື່ອພວກເຮົາຢູ່ກັບພວກເຈົ້ານັ້ນພວກເຮົາບໍ່ໄດ້ຂີ້ຄ້ານເລີຍ, 8 ພວກເຮົາບໍ່ໄດ້ກິນອາຫານຂອງຜູ້ໃດໂດຍບໍ່ໄດ້ຈ່າຍຄ່າ. ກົງກັນຂ້າມ ພວກເຮົາເຮັດວຽກທັງກາງເວັນ ແລະ ກາງຄືນ, ອອກແຮງງານ ແລະ ເຮັດວຽກລຳບາກເພື່ອຈະບໍ່ເປັນພາລະໃຫ້ແກ່ຜູ້ໃດໃນພວກເຈົ້າ. 9 ພວກເຮົາເຮັດຢ່າງນີ້ບໍ່ແມ່ນເພາະພວກເຮົາບໍ່ມີສິດຮັບຄວາມຊ່ວຍເຫລືອເຫລົ່ານັ້ນ ແຕ່ເພື່ອມອບຕົນເອງໃຫ້ເປັນແບບຢ່າງແກ່ພວກເຈົ້າໄດ້ປະຕິບັດຕາມ. 10 ເພາະແມ່ນແຕ່ຂະນະທີ່ພວກເຮົາຢູ່ກັບພວກເຈົ້າ ພວກເຮົາກໍໄດ້ວາງກົດນີ້ໄວ້ໃຫ້ພວກເຈົ້າວ່າ: “ຖ້າຜູ້ໃດບໍ່ເຮັດວຽກກໍບໍ່ຕ້ອງກິນ”. 11 ພວກເຮົາໄດ້ຍິນວ່າບາງຄົນໃນທ່າມກາງພວກເຈົ້າຂີ້ຄ້ານ ແລະ ກໍ່ກວນ. ພວກເຂົາບໍ່ຍອມເຮັດວຽກ ແຕ່ພວກເຂົາຫຍຸ້ງແຕ່ກັບເລື່ອງຂອງຄົນອື່ນ. 12 ພວກເຮົາຂໍສັ່ງ ແລະ ເຕືອນສະຕິໃນນາມຂອງພຣະເຢຊູຄຣິດເຈົ້າອົງພຣະຜູ້ເປັນເຈົ້າວ່າໃຫ້ຄົນເຫລົ່ານີ້ຕັ້ງໃຈເຮັດວຽກເພື່ອໃຫ້ມີລາຍໄດ້ຊື້ອາຫານລ້ຽງຕົນເອງ 13 ແລະ ສຳລັບພວກເຈົ້ານັ້ນ ພີ່ນ້ອງທັງຫລາຍເອີຍ, ຢ່າອິດເມື່ອຍທີ່ຈະເຮັດສິ່ງດີ. 14 ຜູ້ໃດບໍ່ເຊື່ອຟັງຄຳສັ່ງສອນຂອງພວກເຮົາໃນຈົດໝາຍນີ້ ຈົ່ງໝາຍໄວ້ເປັນພິເສດ. ຢ່າໄປຄົບຫາກັບພວກເຂົາ ເພື່ອພວກເຂົາຈະໄດ້ຮູ້ສຶກລະອາຍໃຈ. 15 ແຕ່ເຖິງຢ່າງໃດກໍຕາມຢ່າຖືວ່າພວກເຂົາເປັນສັດຕູ ແຕ່ຈົ່ງເຕືອນສະຕິພວກເຂົາໃນຖານະພີ່ນ້ອງທີ່ເຊື່ອຂອງພວກເຈົ້າ. ຄຳທັກທາຍສຸດທ້າຍ 16 ຂໍໃຫ້ອົງພຣະຜູ້ເປັນເຈົ້າແຫ່ງສັນຕິສຸກ ມອບສັນຕິສຸກໃຫ້ແກ່ພວກເຈົ້າທັງຫລາຍໃນທຸກເວລາ ແລະ ໃນທຸກດ້ານ. ຂໍໃຫ້ອົງພຣະຜູ້ເປັນເຈົ້າຢູ່ກັບພວກເຈົ້າທັງຫລາຍ. 17 ເຮົາໂປໂລ ຂຽນຄຳທັກທາຍນີ້ດ້ວຍມືຂອງເຮົາເອງ ເຊິ່ງເປັນເຄື່ອງໝາຍສະເພາະໃນຈົດໝາຍຂອງເຮົາທຸກສະບັບ. ນີ້ຄືວິທີຂຽນຂອງເຮົາ. 18 ຂໍໃຫ້ພຣະຄຸນຂອງພຣະເຢຊູຄຣິດເຈົ້າອົງພຣະຜູ້ເປັນເຈົ້າຂອງພວກເຮົາ ຈົ່ງສະຖິດຢູ່ກັບພວກເຈົ້າທັງຫລາຍ. |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.