1 ເທສະໂລນິກ 5 - ພຣະຄຳພີລາວສະບັບສະໄໝໃໝ່ວັນຂອງອົງພຣະຜູ້ເປັນເຈົ້າ 1 ບັດນີ້ ພີ່ນ້ອງທັງຫລາຍເອີຍ, ພວກເຮົາບໍ່ຈຳເປັນຕ້ອງຂຽນບອກພວກເຈົ້າກ່ຽວກັບເວລາ ແລະ ວັນ, 2 ເພາະພວກເຈົ້າກໍຮູ້ດີແລ້ວວ່າວັນຂອງອົງພຣະຜູ້ເປັນເຈົ້າຈະມາເໝືອນດັ່ງຂະໂມຍມາໃນເວລາກາງຄືນ. 3 ໃນຂະນະທີ່ຄົນທັງຫລາຍກຳລັງເວົ້າກັນວ່າ, “ສະຫງົບສຸກ ແລະ ປອດໄພ” ເມື່ອນັ້ນຄວາມພິນາດກໍຈະມາເຖິງພວກເຂົາໃນທັນທີ, ເໝືອນດັ່ງການເຈັບທ້ອງເກີດລູກຂອງແມ່ຍິງຖືພາ ແລະ ພວກເຂົາກໍຈະໜີບໍ່ພົ້ນ. 4 ແຕ່ພີ່ນ້ອງທັງຫລາຍເອີຍ, ພວກເຈົ້າບໍ່ໄດ້ຢູ່ໃນຄວາມມືດ, ດັ່ງນັ້ນ ວັນນີ້ຈະບໍ່ເຮັດໃຫ້ພວກເຈົ້າປະຫລາດໃຈເໝືອນດັ່ງຂະໂມຍມາ. 5 ພວກເຈົ້າທຸກຄົນເປັນລູກຂອງຄວາມສະຫວ່າງ ແລະ ເປັນລູກຂອງກາງເວັນ. ພວກເຮົາບໍ່ໄດ້ເປັນຂອງກາງຄືນ ຫລື ຂອງຄວາມມືດ. 6 ດັ່ງນັ້ນ ຢ່າໃຫ້ພວກເຮົາເປັນເໝືອນຄົນອື່ນໆທີ່ນອນຫລັບຢູ່, ແຕ່ພວກເຮົາຈົ່ງຕື່ນຕົວ ແລະ ມີສະຕິຢູ່. 7 ເພາະຜູ້ທີ່ນອນຫລັບກໍຫລັບໃນເວລາກາງຄືນ, ຜູ້ທີ່ເມົາເຫລົ້າກໍເມົາໃນເວລາກາງຄືນ. 8 ແຕ່ເພາະພວກເຮົາເປັນຂອງກາງເວັນ ພວກເຮົາຈົ່ງມີສະຕິຢູ່, ສວມຄວາມເຊື່ອ ແລະ ຄວາມຮັກເປັນເສື້ອເກາະປ້ອງກັນເອິກໄວ້, ມີຄວາມຫວັງໃນຄວາມພົ້ນເປັນໝວກເກາະ. 9 ເພາະພຣະເຈົ້າບໍ່ໄດ້ກຳນົດໃຫ້ພວກເຮົາຕ້ອງປະເຊີນຕໍ່ຄວາມໂກດຮ້າຍ ແຕ່ໃຫ້ຮັບຄວາມພົ້ນໂດຍທາງພຣະເຢຊູຄຣິດເຈົ້າອົງພຣະຜູ້ເປັນເຈົ້າຂອງພວກເຮົາ. 10 ພຣະອົງໄດ້ຕາຍເພື່ອພວກເຮົາ ເພື່ອວ່າ, ບໍ່ວ່າພວກເຮົາຍັງມີຊີວິດຢູ່ ຫລື ຕາຍໄປແລ້ວກໍຕາມ, ພວກເຮົາກໍຈະມີຊີວິດຢູ່ຮ່ວມກັບພຣະອົງ. 11 ເຫດສະນັ້ນ ຈົ່ງໜູນໃຈເຊິ່ງກັນແລະກັນ ແລະ ເສີມສ້າງກັນຂຶ້ນ ເໝືອນດັ່ງທີ່ພວກເຈົ້າກຳລັງເຮັດຢູ່. ຄຳແນະນຳສຸດທ້າຍ 12 ພີ່ນ້ອງທັງຫລາຍເອີຍ, ພວກເຮົາຂໍໃຫ້ພວກເຈົ້ານັບຖືຜູ້ທີ່ເຮັດວຽກໜັກໃນທ່າມກາງພວກເຈົ້າ, ຜູ້ທີ່ຫ່ວງໃຍພວກເຈົ້າໃນອົງພຣະຜູ້ເປັນເຈົ້າ ແລະ ຜູ້ທີ່ຕັກເຕືອນພວກເຈົ້າ. 13 ຈົ່ງຮັກ ແລະ ເຄົາລົບພວກເພິ່ນເຫລົ່ານັ້ນຢ່າງສູງເພາະການງານທີ່ພວກເພິ່ນໄດ້ເຮັດ. ຈົ່ງຢູ່ຮ່ວມກັນຢ່າງສະຫງົບສຸກ. 14 ພີ່ນ້ອງທັງຫລາຍເອີຍ, ພວກເຮົາຂໍໃຫ້ພວກເຈົ້າຕັກເຕືອນຜູ້ທີ່ຂີ້ຄ້ານ ແລະ ມັກສ້າງຄວາມວຸ້ນວາຍ, ໃຫ້ໜູນໃຈຜູ້ທີ່ທໍ້ໃຈ, ຊ່ວຍເຫລືອຜູ້ທີ່ອ່ອນແອ, ອົດທົນກັບທຸກຄົນ. 15 ຢ່າໃຫ້ມີຜູ້ໃດເຮັດຊົ່ວຕອບແທນການຊົ່ວ, ແຕ່ຈົ່ງພະຍາຍາມເຮັດດີຕໍ່ກັນແລະກັນ ແລະ ເຮັດດີຕໍ່ທຸກຄົນສະເໝີ. 16 ຈົ່ງຊົມຊື່ນຍິນດີຢູ່ສະເໝີ, 17 ຈົ່ງອະທິຖານຢູ່ບໍ່ຂາດ, 18 ຈົ່ງໂມທະນາຂອບພຣະຄຸນໃນທຸກສະຖານະການ ເພາະນີ້ຄືຄວາມປະສົງຂອງພຣະເຈົ້າສຳລັບພວກເຈົ້າທັງຫລາຍໃນພຣະຄຣິດເຈົ້າເຢຊູ. 19 ຢ່າຫັກຫ້າມພຣະວິນຍານ, 20 ຢ່າປະໝາດຄຳເຜີຍພຣະຄຳ. 21 ແຕ່ຈົ່ງທົດສອບທຸກສິ່ງ. ຈົ່ງຢຶດໝັ້ນໃນສິ່ງທີ່ດີ. 22 ຈົ່ງປະຕິເສດຄວາມຊົ່ວທຸກຢ່າງ. 23 ຂໍໃຫ້ພຣະເຈົ້າເອງຜູ້ເປັນພຣະເຈົ້າແຫ່ງສັນຕິສຸກຊຳລະພວກເຈົ້າໃຫ້ບໍລິສຸດໃນທຸກດ້ານ. ຂໍໃຫ້ທັງວິນຍານ, ຈິດໃຈ ແລະ ຮ່າງກາຍຂອງພວກເຈົ້າບໍ່ມີຕຳໜິໃນວັນທີ່ພຣະເຢຊູຄຣິດເຈົ້າອົງພຣະຜູ້ເປັນເຈົ້າຂອງພວກເຮົາມາ. 24 ພຣະອົງຜູ້ເອີ້ນພວກເຈົ້ານັ້ນສັດຊື່ ແລະ ພຣະອົງຈະກະທຳຕາມທີ່ໄດ້ກ່າວໄວ້. 25 ພີ່ນ້ອງທັງຫລາຍເອີຍ, ຈົ່ງອະທິຖານເພື່ອພວກເຮົາດ້ວຍ. 26 ຈົ່ງທັກທາຍຄົນຂອງພຣະເຈົ້າດ້ວຍການຈູບອັນບໍລິສຸດ. 27 ເຮົາຂໍຮ້ອງພວກເຈົ້າຕໍ່ໜ້າອົງພຣະຜູ້ເປັນເຈົ້າໃຫ້ອ່ານຈົດໝາຍນີ້ໃຫ້ພີ່ນ້ອງທຸກຄົນຟັງ. 28 ຂໍໃຫ້ພຣະຄຸນຂອງພຣະເຢຊູຄຣິດເຈົ້າອົງພຣະຜູ້ເປັນເຈົ້າຂອງພວກເຮົາ ຈົ່ງສະຖິດຢູ່ກັບພວກເຈົ້າທັງຫລາຍ! |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.