1 ໂກຣິນໂທ 8 - ພຣະຄຳພີລາວສະບັບສະໄໝໃໝ່ເລື່ອງອາຫານທີ່ຖວາຍແກ່ຮູບເຄົາລົບ 1 ເລື່ອງອາຫານທີ່ໄດ້ບູຊາແກ່ຮູບເຄົາລົບແລ້ວ: ພວກເຮົາຮູ້ວ່າ “ພວກເຮົາທຸກຄົນລ້ວນແຕ່ມີຄວາມຮູ້”. ແຕ່ຄວາມຮູ້ນັ້ນເຮັດໃຫ້ອວດໂຕ ຂະນະທີ່ຄວາມຮັກເສີມສ້າງຂຶ້ນ. 2 ຜູ້ໃດທີ່ຄິດວ່າຕົນເອງຮູ້ບາງສິ່ງແລ້ວ ຜູ້ນັ້ນຍັງບໍ່ຮູ້ຕາມທີ່ຕົນຄວນຈະຮູ້. 3 ແຕ່ຜູ້ທີ່ຮັກພຣະເຈົ້າ ພຣະເຈົ້າກໍຮູ້ຈັກຜູ້ນັ້ນ. 4 ດັ່ງນັ້ນ ເລື່ອງການກິນອາຫານທີ່ໄດ້ບູຊາແກ່ຮູບເຄົາລົບແລ້ວນັ້ນ ພວກເຮົາກໍຮູ້ຢູ່ວ່າ “ຮູບເຄົາລົບນັ້ນບໍ່ມີຄວາມໝາຍຫຍັງໝົດໃນໂລກ” ແລະ “ມີພຣະເຈົ້າແຕ່ອົງດຽວເທົ່ານັ້ນ”. 5 ເພາະເຖິງແມ່ນວ່າຈະມີຫລາຍສິ່ງທີ່ເອີ້ນວ່າພະ, ບໍ່ວ່າຈະຢູ່ໃນສະຫວັນ ຫລື ເທິງແຜ່ນດິນໂລກກໍດີ (ທີ່ຈິງມີ “ພະ” ແລະ “ເຈົ້າ” ຫລາຍແທ້), 6 ແຕ່ສຳລັບພວກເຮົານັ້ນ ມີແຕ່ພຣະເຈົ້າອົງດຽວ ຄືພຣະບິດາເຈົ້າ ແລະ ສິ່ງສາລະພັດທັງປວງກໍມາຈາກພຣະອົງ ແລະ ພວກເຮົາກໍມີຊີວິດຢູ່ເພື່ອພຣະອົງ ແລະ ມີອົງພຣະຜູ້ເປັນເຈົ້າແຕ່ອົງດຽວ ຄືພຣະເຢຊູຄຣິດເຈົ້າ, ສິ່ງສາລະພັດເປັນມາໂດຍພຣະອົງ ແລະ ພວກເຮົາມີຊີວິດຢູ່ໂດຍພຣະອົງ. 7 ແຕ່ບໍ່ແມ່ນທຸກຄົນທີ່ມີຄວາມຮູ້ນີ້. ບາງຄົນຍັງຄຸ້ນເຄີຍກັບຮູບເຄົາລົບ ເມື່ອພວກເຂົາກິນອາຫານນັ້ນຈຶ່ງຖືວ່າເປັນຂອງບູຊາແກ່ພະທຽມນັ້ນ ແລະ ເພາະຈິດສຳນຶກຂອງພວກເຂົາຍັງອ່ອນ, ອາຫານນັ້ນຈຶ່ງເປັນມົນທິນ. 8 ແຕ່ອາຫານບໍ່ໄດ້ນຳພວກເຮົາໃຫ້ເຂົ້າໃກ້ພຣະເຈົ້າ; ຖ້າພວກເຮົາບໍ່ກິນ ພວກເຮົາກໍບໍ່ຊົ່ວລົງກວ່າເກົ່າ ແລະ ຖ້າພວກເຮົາກິນພວກເຮົາກໍບໍ່ໄດ້ດີຂຶ້ນ. 9 ເຖິງຢ່າງໃດກໍຕາມ ຈົ່ງລະວັງໃຫ້ດີ ຢ່າໃຫ້ການໃຊ້ສິດຂອງພວກເຈົ້າກາຍເປັນສິ່ງສະດຸດໃຈຕໍ່ພີ່ນ້ອງທີ່ມີຄວາມເຊື່ອອ່ອນ. 10 ເພາະຖ້າຜູ້ທີ່ມີຈິດສຳນຶກຍັງອ່ອນ ເຫັນພວກເຈົ້າຜູ້ມີຄວາມຮູ້ນັ່ງກິນອາຫານຢູ່ໃນວິຫານຂອງຮູບເຄົາລົບ ຄົນຜູ້ນັ້ນຈະບໍ່ມີໃຈກ້າກິນສິ່ງທີ່ໄດ້ບູຊາແກ່ຮູບເຄົາລົບນັ້ນບໍ? 11 ດັ່ງນັ້ນ ຄວາມຮູ້ຂອງເຈົ້າໄດ້ທຳລາຍພີ່ນ້ອງທີ່ມີຄວາມເຊື່ອອ່ອນເຫລົ່ານີ້ ເຊິ່ງພຣະຄຣິດເຈົ້າໄດ້ຕາຍເພື່ອພວກເຂົາ. 12 ເມື່ອເຈົ້າເຮັດບາບຕໍ່ພວກເຂົາໃນວິທີນີ້ ແລະ ທຳລາຍຈິດສຳນຶກທີ່ອ່ອນແອຂອງພວກເຂົາ, ເຈົ້າກໍເຮັດບາບຕໍ່ພຣະຄຣິດເຈົ້າ. 13 ເຫດສະນັ້ນ, ຖ້າສິ່ງທີ່ເຮົາກິນເປັນຕົ້ນເຫດໃຫ້ພີ່ນ້ອງຕ້ອງລົ້ມລົງໃນຄວາມບາບ, ເຮົາກໍຈະບໍ່ກິນຊີ້ນຕະຫລອດໄປ, ເພື່ອວ່າເຮົາຈະບໍ່ເປັນເຫດໃຫ້ພວກເຂົາລົ້ມລົງ. |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.