1 ໂກຣິນໂທ 7 - ພຣະຄຳພີລາວສະບັບສະໄໝໃໝ່ກ່ຽວກັບຊີວິດທີ່ແຕ່ງງານແລ້ວ 1 ບັດນີ້ສຳລັບເລື່ອງທີ່ພວກເຈົ້າໄດ້ຂຽນມານັ້ນ “ເປັນການດີທີ່ຜູ້ຊາຍຈະບໍ່ມີຄວາມສຳພັນທາງເພດກັບແມ່ຍິງ” 2 ແຕ່ເນື່ອງຈາກວ່າມີການຜິດສິນທຳທາງເພດເກີດຂຶ້ນ, ຜູ້ຊາຍແຕ່ລະຄົນກໍຄວນມີຄວາມສຳພັນທາງເພດກັບເມຍຂອງຕົນເອງ ແລະ ແມ່ຍິງແຕ່ລະຄົນກໍຄວນມີຄວາມສຳພັນທາງເພດກັບຜົວຂອງຕົນເອງ. 3 ຜົວຄວນເຮັດໜ້າທີ່ຂອງຜົວຕໍ່ເມຍຂອງຕົນເອງໃຫ້ສົມບູນ ແລະ ເມຍກໍຄວນເຮັດໜ້າທີ່ຂອງເມຍຕໍ່ຜົວຂອງຕົນເອງໃຫ້ສົມບູນເຊັ່ນກັນ. 4 ເມຍບໍ່ໄດ້ມີສິດອຳນາດເໜືອຮ່າງກາຍຂອງຕົນເອງ ແຕ່ຍອມມອບຮ່າງກາຍນັ້ນໃຫ້ເປັນຂອງຜົວຂອງນາງ. ໃນທຳນອງດຽວກັນ, ຜົວກໍບໍ່ມີສິດອຳນາດເໜືອຮ່າງກາຍຂອງຕົນເອງ ແຕ່ຍອມມອບຮ່າງກາຍນັ້ນໃຫ້ເປັນຂອງເມຍ. 5 ຢ່າປະຕິເສດການຢູ່ຮ່ວມກັນເວັ້ນແຕ່ຕົກລົງກັນຊົ່ວຄາວ ເພື່ອພວກເຈົ້າຈະໄດ້ອຸທິດຕົນເອງໃນການອະທິຖານ. ຫລັງຈາກນັ້ນຈຶ່ງມາຢູ່ຮ່ວມກັນອີກ ເພື່ອວ່າຊາຕານຈະບໍ່ລໍ້ລວງພວກເຈົ້າ ເພາະຂາດການຄວບຄຸມຕົນເອງຂອງພວກເຈົ້າ. 6 ເຮົາກ່າວຢ່າງນີ້ດັ່ງເປັນການອະນຸຍາດ ບໍ່ແມ່ນເປັນຄຳສັ່ງ. 7 ເຮົາປາຖະໜາໃຫ້ທຸກຄົນໃນພວກເຈົ້າເປັນເໝືອນດັ່ງເຮົາ. ແຕ່ວ່າແຕ່ລະຄົນໃນພວກເຈົ້ານັ້ນມີຂອງປະທານຈາກພຣະເຈົ້າເປັນຂອງຕົນເອງ; ຄົນໜຶ່ງມີຂອງປະທານຢ່າງນີ້ ອີກຄົນໜຶ່ງມີຂອງປະທານຢ່າງນັ້ນ. 8 ບັດນີ້ສຳລັບຄົນທີ່ບໍ່ໄດ້ແຕ່ງງານ ແລະ ບັນດາໝ້າຍນັ້ນ ເຮົາຂໍບອກວ່າ: ເປັນການດີແລ້ວສຳລັບພວກເຂົາທີ່ຈະຢູ່ຢ່າງບໍ່ແຕ່ງງານເໝືອນດັ່ງເຮົາ. 9 ແຕ່ຖ້າພວກເຂົາບໍ່ສາມາດຄວບຄຸມຕົນເອງໄດ້, ພວກເຂົາກໍຄວນຈະແຕ່ງງານ ເພາະການແຕ່ງງານນັ້ນ ກໍຍັງດີກວ່າຖືກເຜົາໄໝ້ດ້ວຍຕັນຫາ. 10 ສຳລັບຄົນທີ່ແຕ່ງງານແລ້ວເຮົາໃຫ້ຄຳສັ່ງຢ່າງນີ້ (ບໍ່ແມ່ນເຮົາ ແຕ່ແມ່ນອົງພຣະຜູ້ເປັນເຈົ້າ) ວ່າ: ພັນລະຍາຕ້ອງບໍ່ແຍກຈາກຜົວຂອງນາງ. 11 ແຕ່ຖ້ານາງເຮັດຢ່າງນັ້ນ ນາງຕ້ອງບໍ່ແຕ່ງງານອີກ ຫລື ບໍ່ດັ່ງນັ້ນກໍຕ້ອງຄືນດີກັບຜົວຂອງນາງ. ແລະ ຜົວກໍຕ້ອງບໍ່ຢ່າຮ້າງເມຍຂອງຕົນ. 12 ສຳລັບຄົນອື່ນນັ້ນ ເຮົາຂໍກ່າວຢ່າງນີ້ (ແມ່ນເຮົາເອງ ບໍ່ແມ່ນອົງພຣະຜູ້ເປັນເຈົ້າ) ວ່າ: ຖ້າຊາຍຄົນໃດມີເມຍທີ່ເປັນຄົນບໍ່ເຊື່ອ ແລະ ນາງກໍເຕັມໃຈຈະຢູ່ກັບລາວ, ລາວຕ້ອງບໍ່ຢ່າຮ້າງນາງ. 13 ແລະ ຖ້າຍິງຄົນໃດມີຜົວທີ່ເປັນຄົນບໍ່ເຊື່ອ ແລະ ລາວເຕັມໃຈຈະຢູ່ກັບນາງ, ນາງຕ້ອງບໍ່ຢ່າຮ້າງລາວ. 14 ເພາະວ່າຜົວທີ່ບໍ່ເຊື່ອກໍໄດ້ຖືກຊຳລະໃຫ້ບໍລິສຸດແລ້ວຜ່ານທາງເມຍຂອງລາວ ແລະ ເມຍທີ່ບໍ່ເຊື່ອກໍໄດ້ຖືກຊຳລະໃຫ້ບໍລິສຸດແລ້ວຜ່ານທາງຜົວທີ່ເຊື່ອ. ຖ້າບໍ່ດັ່ງນັ້ນ, ລູກຂອງພວກເຈົ້າກໍຈະເປັນມົນທິນ, ແຕ່ຕາມທີ່ເປັນຢູ່ນັ້ນ, ພວກເຂົາກໍບໍລິສຸດແລ້ວ. 15 ແຕ່ຖ້າຝ່າຍຄົນທີ່ບໍ່ເຊື່ອຈະແຍກຕົວໄປ ກໍປ່ອຍໃຫ້ລາວໄປ. ໃນກໍລະນີເຊັ່ນນັ້ນຝ່າຍຜູ້ທີ່ເຊື່ອທັງຊາຍ ຫລື ຍິງຈະບໍ່ຖືກຜູກມັດ; ພຣະເຈົ້າເອີ້ນພວກເຮົາໃຫ້ດໍາເນີນຊີວິດຢູ່ໃນຄວາມສະຫງົບສຸກ. 16 ເຈົ້າຜູ້ເປັນເມຍ ເຈົ້າຮູ້ໄດ້ຢ່າງໃດວ່າຈະຊ່ວຍຜົວຂອງຕົນໃຫ້ພົ້ນໄດ້? ຫລື ເຈົ້າຜູ້ເປັນຜົວ ເຈົ້າຮູ້ໄດ້ຢ່າງໃດວ່າຈະຊ່ວຍເມຍຂອງຕົນໃຫ້ພົ້ນໄດ້? 17 ເຖິງຢ່າງໃດກໍຕາມ ຂໍໃຫ້ທຸກຄົນຈົ່ງດຳເນີນຊີວິດໃນຖານະທີ່ເປັນຜູ້ທີ່ເຊື່ອ ຕາມຖານະທີ່ອົງພຣະຜູ້ເປັນເຈົ້າໄດ້ມອບໝາຍໃຫ້ພວກເຂົາ ຕາມທີ່ພຣະເຈົ້າໄດ້ເອີ້ນພວກເຂົາ. ນີ້ຄືກົດລະບຽບທີ່ເຮົາວາງໄວ້ໃນທຸກໆຄຣິສຕະຈັກ. 18 ຊາຍຄົນນັ້ນໄດ້ຮັບພິທີຕັດແລ້ວບໍ ເມື່ອລາວໄດ້ຖືກເອີ້ນນັ້ນ? ລາວບໍ່ຄວນກາຍເປັນຜູ້ທີ່ບໍ່ໄດ້ຮັບພິທີຕັດອີກ. ຊາຍຄົນນັ້ນບໍ່ໄດ້ຮັບພິທີຕັດ ເມື່ອລາວຖືກເອີ້ນບໍ່ແມ່ນບໍ? ລາວກໍບໍ່ຄວນຮັບພິທີຕັດນັ້ນ. 19 ການທີ່ຮັບພິທີຕັດ ຫລື ບໍ່ຮັບພິທີຕັດນັ້ນກໍບໍ່ສຳຄັນຫຍັງ. ແຕ່ສິ່ງສຳຄັນແມ່ນການປະຕິບັດຕາມພຣະບັນຍັດຂອງພຣະເຈົ້າ. 20 ແຕ່ລະຄົນຄວນຢູ່ຕາມຖານະທີ່ພວກເຂົາເປັນຢູ່ເມື່ອພຣະເຈົ້າເອີ້ນເອົາພວກເຂົານັ້ນ. 21 ເຈົ້າໄດ້ຖືກເອີ້ນເມື່ອເຈົ້າຍັງເປັນຂ້າທາດຢູ່ບໍ່ແມ່ນບໍ? ຢ່າໃຫ້ສິ່ງນີ້ລົບກວນເຈົ້າ ແຕ່ຖ້າເຈົ້າສາມາດໄຖ່ຕົນເອງໃຫ້ເປັນອິດສະຫລະໄດ້, ກໍຈົ່ງເຮັດ. 22 ເພາະຜູ້ທີ່ເປັນຂ້າທາດເມື່ອຖືກເອີ້ນມາສູ່ຄວາມເຊື່ອໃນອົງພຣະຜູ້ເປັນເຈົ້ານັ້ນ ກໍເປັນຄົນທີ່ມີອິດສະຫລະໃນອົງພຣະຜູ້ເປັນເຈົ້າ; ໃນທຳນອງດຽວກັນ ຜູ້ທີ່ເປັນອິດສະຫລະເມື່ອຖືກເອີ້ນນັ້ນ ກໍເປັນຂ້າທາດຂອງພຣະຄຣິດເຈົ້າ. 23 ພວກເຈົ້າຖືກຊື້ໄວ້ດ້ວຍລາຄາສູງ; ຢ່າກັບໄປເປັນຂ້າທາດຂອງມະນຸດອີກ. 24 ພີ່ນ້ອງທັງຫລາຍເອີຍ ແຕ່ລະຄົນເປັນຜູ້ຮັບຜິດຊອບຕໍ່ພຣະເຈົ້າ, ຄວນຈະຢູ່ຕາມຖານະທີ່ພວກເຂົາເປັນຢູ່ເມື່ອພຣະເຈົ້າໄດ້ເອີ້ນເອົາພວກເຂົານັ້ນ. 25 ສ່ວນຄົນທີ່ຮັກສາຄວາມບໍລິສຸດນັ້ນ ເຮົາບໍ່ໄດ້ຮັບຄຳສັ່ງຈາກອົງພຣະຜູ້ເປັນເຈົ້າ, ແຕ່ເຮົາຂໍໃຫ້ຄຳຕັດສິນໃນຖານະຜູ້ທີ່ເປັນທີ່ໄວ້ໃຈໄດ້ໂດຍຄວາມເມດຕາຂອງອົງພຣະຜູ້ເປັນເຈົ້າ. 26 ເນື່ອງຈາກວິກິດການໃນປັດຈຸບັນນີ້, ເຮົາຄິດວ່າເປັນການດີທີ່ຜູ້ຊາຍຈະຢູ່ຕາມຖານະທີ່ຕົນເປັນຢູ່ນັ້ນ. 27 ເຈົ້າໄດ້ໃຫ້ຄຳໝັ້ນສັນຍາກັບຜູ້ຍິງຄົນໜຶ່ງແລ້ວບໍ? ຢ່າຫາທາງຢ່າຮ້າງເລີຍ. ເຈົ້າເປັນອິດສະຫລະຈາກຄຳໝັ້ນສັນຍາດັ່ງກ່າວແລ້ວບໍ? ຢ່າຊອກຫາພັນລະຍາເລີຍ. 28 ແຕ່ຖ້າເຈົ້າຈະແຕ່ງງານ ເຈົ້າກໍບໍ່ໄດ້ເຮັດບາບ; ແລະ ຖ້າສາວບໍລິສຸດຈະແຕ່ງງານນາງກໍບໍ່ໄດ້ເຮັດບາບ. ແຕ່ຜູ້ທີ່ແຕ່ງງານແລ້ວຈະປະເຊີນໜ້າກັບຄວາມຫຍຸ້ງຍາກຫລາຍຢ່າງໃນຊີວິດນີ້ ແລະ ເຮົາຢາກສະຫງວນພວກເຈົ້າຈາກສິ່ງນີ້. 29 ພີ່ນ້ອງທັງຫລາຍເອີຍ, ເຮົາໝາຍຄວາມວ່າ ເວລາກໍເຫລືອສັ້ນເຂົ້າມາແລ້ວ. ຕັ້ງແຕ່ນີ້ໄປ ບັນດາຄົນທີ່ມີເມຍແລ້ວ ກໍຄວນດຳເນີນຊີວິດເໝືອນບໍ່ມີ; 30 ບັນດາຜູ້ທີ່ໂສກເສົ້າ ໃຫ້ເຮັດເໝືອນບໍ່ໄດ້ໂສກເສົ້າ; ບັນດາຜູ້ທີ່ມີຄວາມສຸກ ໃຫ້ເຮັດເໝືອນບໍ່ມີຄວາມສຸກ, ບັນດາຜູ້ທີ່ຊື້ບາງສິ່ງ ໃຫ້ເປັນເໝືອນກັບບໍ່ໄດ້ເປັນເຈົ້າຂອງ; 31 ບັນດາຜູ້ທີ່ໃຊ້ສິ່ງຂອງໃນໂລກນີ້ ໃຫ້ເປັນເໝືອນກັບບໍ່ໄດ້ໃຊ້ສິ່ງເຫລົ່ານັ້ນຢ່າງເຕັມທີ່. ເພາະໂລກທີ່ເປັນຢູ່ໃນປັດຈຸບັນນີ້ກຳລັງຈະຜ່ານພົ້ນໄປ. 32 ເຮົາຢາກໃຫ້ພວກເຈົ້າຫລຸດພົ້ນຈາກຄວາມກັງວົນ. ຊາຍທີ່ບໍ່ແຕ່ງງານກໍກັງວົນຢູ່ນຳພາລະກິດຂອງອົງພຣະຜູ້ເປັນເຈົ້າ ເພື່ອໃຫ້ອົງພຣະຜູ້ເປັນເຈົ້າພໍໃຈ. 33 ແຕ່ຊາຍທີ່ແຕ່ງງານແລ້ວກໍກັງວົນຢູ່ກັບພາລະກິດຂອງໂລກນີ້ ເພື່ອເຮັດໃຫ້ເມຍພໍໃຈ 34 ແລະ ຄວາມສົນໃຈຂອງລາວກໍແບ່ງເປັນສອງກ້ຳສອງຝ່າຍ. ສ່ວນຍິງທີ່ບໍ່ແຕ່ງງານ ຫລື ສາວບໍລິສຸດກໍກັງວົນຢູ່ກັບພາລະກິດຂອງອົງພຣະຜູ້ເປັນເຈົ້າ: ເປົ້າໝາຍຂອງນາງກໍເພື່ອຈະອຸທິດຕົນແກ່ອົງອົງພຣະຜູ້ເປັນເຈົ້າທັງຮ່າງກາຍ ແລະ ຈິດວິນຍານ. ແຕ່ຍິງທີ່ແຕ່ງງານແລ້ວກໍກັງວົນຢູ່ກັບພາລະກິດຂອງໂລກນີ້ ເພື່ອເຮັດໃຫ້ສາມີພໍໃຈ. 35 ເຮົາເວົ້າຢ່າງນີ້ກໍເພື່ອເປັນຜົນດີໃຫ້ແກ່ພວກເຈົ້າເອງ ບໍ່ແມ່ນເພື່ອຈໍາກັດພວກເຈົ້າ, ແຕ່ເພື່ອພວກເຈົ້າຈະໄດ້ດຳເນີນຊີວິດໃນທາງທີ່ຖືກຕ້ອງໃນການອຸທິດຕົນແກ່ອົງພຣະຜູ້ເປັນເຈົ້າໂດຍບໍ່ມີໃຈແບ່ງເປັນສອງກ້ຳສອງຝ່າຍ. 36 ຖ້າຜູ້ໃດວິຕົກກັງວົນວ່າຕົນເອງຈະປະຕິບັດຕໍ່ຄູ່ໝັ້ນທີ່ເປັນສາວບໍລິສຸດຢ່າງບໍ່ເໝາະສົມ ແລະ ຖ້າຫາກວ່າກິເລດຕັນຫາຂອງລາວຮ້ອນແຮງເກີນໄປ ແລະ ລາວຮູ້ສຶກວ່າຕົນເອງຄວນຈະແຕ່ງງານ ລາວກໍຄວນເຮັດຕາມທີ່ລາວຕ້ອງການ. ລາວກໍບໍ່ໄດ້ເຮັດບາບ. ພວກເຂົາຄວນຈະແຕ່ງງານກັນ. 37 ແຕ່ຊາຍຄົນໃດທີ່ຕັ້ງໃຈຄັກແນ່ແລ້ວ ບໍ່ໄດ້ຖືກບັງຄັບ ແຕ່ຄວບຄຸມຄວາມຕັ້ງໃຈຂອງຕົນເອງໄດ້ ແລະ ຕັດສິນໃຈທີ່ຈະບໍ່ແຕ່ງງານກັບສາວບໍລິສຸດ ຊາຍຜູ້ນີ້ກໍເຮັດສິ່ງທີ່ຖືກຕ້ອງເໝືອນກັນ. 38 ດັ່ງນັ້ນແຫລະ ຊາຍທີ່ແຕ່ງງານກັບສາວບໍລິສຸດກໍເຮັດຖືກຕ້ອງ, ແຕ່ຊາຍທີ່ບໍ່ແຕ່ງງານກັບນາງກໍເຮັດດີຫລາຍກວ່າ. 39 ຕາບໃດທີ່ຜົວຍັງມີຊີວິດຢູ່ ແມ່ຍິງຕ້ອງຢູ່ກັບຜົວຂອງນາງ. ແຕ່ຖ້າຜົວຂອງນາງຕາຍໄປ, ນາງກໍເປັນອິດສະຫລະທີ່ຈະແຕ່ງງານກັບຜູ້ໃດກໍໄດ້ຕາມທີ່ນາງປາຖະໜາ, ແຕ່ຊາຍຜູ້ນັ້ນຕ້ອງເປັນຜູ້ທີ່ເຊື່ອໃນອົງພຣະຜູ້ເປັນເຈົ້າ. 40 ຕາມຄວາມເຫັນຂອງເຮົາ, ນາງຈະມີຄວາມສຸກຫລາຍກວ່າຖ້ານາງຢູ່ຕາມຖານະທີ່ນາງເປັນຢູ່ ແລະ ເຮົາຄິດວ່າ ເຮົາກໍເໝືອນກັນ ມີພຣະວິນຍານຂອງພຣະເຈົ້າ. |
ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່
ສະຫງວນລິຂະສິດ © 2023 ໂດຍ Biblica, Inc.
ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.
New Testament, Lao Contemporary Version™
Copyright © 2023 by Biblica, Inc.
Used with permission. All rights reserved worldwide.
Biblica, Inc.