Bìoball air-loidhne

1 ໂກຣິນໂທ 13 - ພຣະຄຳພີລາວສະບັບສະໄໝໃໝ່

¹ ຖ້າຫາກວ່າເຮົາເວົ້າພາສາແປກໆໄດ້ຈະເປັນພາສາມະນຸດ ຫລື ພາສາເທວະດາ, ແຕ່ບໍ່ມີຄວາມຮັກ ເຮົາກໍເປັນພຽງຄ້ອງ ຫລື ແຊ່ງທີ່ກຳລັງສົ່ງສຽງເທົ່ານັ້ນ.

² ຖ້າຫາກວ່າເຮົາມີຂອງປະທານໃນການທຳນວາຍ ສາມາດເຂົ້າໃຈໃນຂໍ້ລັບເລິກ ແລະ ຄວາມຮູ້ທັງໝົດ, ແລະ ຖ້າເຮົາມີຄວາມເຊື່ອທີ່ສາມາດເຄື່ອນພູເຂົາໄດ້, ແຕ່ບໍ່ມີຄວາມຮັກ ເຮົາກໍບໍ່ມີຄ່າອັນໃດ.

³ ຖ້າຫາກວ່າເຮົາຈະບໍລິຈາກຊັບສິນທັງໝົດທີ່ເຮົາມີໃຫ້ແກ່ຄົນຍາກຈົນ ແລະ ຍອມໃຫ້ເອົາຮ່າງກາຍຂອງເຮົາໄປສູ່ຄວາມຍາກລຳບາກເພື່ອເຮົາຈະໂອ້ອວດໄດ້, ແຕ່ບໍ່ມີຄວາມຮັກ, ເຮົາກໍບໍ່ໄດ້ປະໂຫຍດຫຍັງ.

⁴ ຄວາມຮັກຄືຄວາມອົດທົນ, ຄວາມຮັກຄືຄວາມເມດຕາ, ຄວາມຮັກບໍ່ອິດສາ, ບໍ່ໂອ້ອວດ, ບໍ່ຈອງຫອງ,

⁵ ບໍ່ດູຖູກຄົນອື່ນ, ບໍ່ເຫັນແກ່ຕົວ, ບໍ່ໃຈຮ້າຍງ່າຍ, ບໍ່ຈົດຈຳຄວາມຜິດ.

⁶ ຄວາມຮັກບໍ່ຍິນດີໃນຄວາມຊົ່ວ ແຕ່ຍິນດີກັບຄວາມຈິງ.

⁷ ຄວາມຮັກປົກປ້ອງຄຸ້ມຄອງສະເໝີ, ວາງໃຈສະເໝີ, ມີຄວາມຫວັງສະເໝີ ແລະ ອົດທົນສະເໝີ.

⁸ ຄວາມຮັກບໍ່ມີວັນສູນສິ້ນໄປ ເຖິງວ່າການເຜີຍພຣະຄຳຈະຖືກຍົກເລີກ, ການເວົ້າພາສາແປກໆຈະງຽບໄປ, ຄວາມຮູ້ຈະສູນຫາຍໄປ.

⁹ ເພາະພວກເຮົາຮູ້ພຽງແຕ່ບາງສ່ວນ ແລະ ພວກເຮົາກໍເຜີຍພຣະຄຳພຽງແຕ່ບາງສ່ວນ,

¹⁰ ແຕ່ເມື່ອຄວາມສົມບູນມາເຖິງແລ້ວ, ສິ່ງທີ່ເປັນບາງສ່ວນນັ້ນກໍຈະສູນຫາຍໄປ.

¹¹ ເມື່ອເຮົາຍັງເປັນເດັກນ້ອຍຢູ່ນັ້ນ, ເຮົາກໍເວົ້າຄືເດັກນ້ອຍ, ເຮົາກໍຄິດຄືເດັກນ້ອຍ, ເຮົາກໍໃຊ້ເຫດຜົນຄືເດັກນ້ອຍ. ແຕ່ເມື່ອເຮົາກາຍເປັນຜູ້ໃຫຍ່ແລ້ວ, ເຮົາກໍຖິ້ມວິຖີຊີວິດໄວເດັກນ້ອຍໄວ້ເບື້ອງຫລັງເຮົາ.

¹² ເພາະວ່າເວລານີ້ ພວກເຮົາເຫັນແຕ່ເງົາສະທ້ອນເໝືອນເບິ່ງໃນແວ່ນ; ໃນເວລານັ້ນພວກເຮົາຈະເຫັນກັນໜ້າຕໍ່ໜ້າ. ໃນເວລານີ້ເຮົາຮູ້ຈັກພຽງບາງສ່ວນ; ໃນເວລານັ້ນເຮົາຈະຮູ້ຈັກທຸກສິ່ງ, ແຕ່ເໝືອນດັ່ງເຮົາເປັນທີ່ຮູ້ຈັກຢ່າງສົມບູນແລ້ວ.

¹³ ແລະ ບັດນີ້ ຍັງຕັ້ງຢູ່ສາມສິ່ງຄື: ຄວາມເຊື່ອ, ຄວາມຫວັງ, ແລະ ຄວາມຮັກ, ແຕ່ສິ່ງທີ່ໃຫຍ່ທີ່ສຸດຂອງສິ່ງເຫລົ່ານີ້ແມ່ນຄວາມຮັກ.

« Roimhe

Air adhart »

ພຣະຄຳພີລາວສະບັບສະໄໝໃໝ່™ ພັນທະສັນຍາໃໝ່

ໃຊ້ໂດຍໄດ້ຮັບອະນຸຍາດ ສະຫງວນລິຂະສິດທັງໝົດ.

New Testament, Lao Contemporary Version™

Biblica, Inc.

Lean sinn:

Ceanglaichean taic

Sanasan