ลืลาว 5 - ้พระคัมภีร์ละว้า

รซอม เชีย ยุฮ ด่าวิต, ฮอยจ ละ ฮัวนา โม ป เชีย ไม่ ป ปาึง เปี

¹ โอ พะจาว, ปัว ปะ ดาวง ฮยวก แตะ ละ ซ ง่อต เปอะ รซอม ไววอน อาึ เฮี, ปัว เปอะ ง่อต ฮมอง ป ปัว อาึ ไม่ รพาวม ตุก แตะ เฮี.

² ปะ มัฮ เปอะ กซัต ยุฮ ฮุ, มัฮ โรฮ เปอะ พะจาว ยุฮ ฮุ. อาึ ไววอน ปัว โอเอีฮ นึง ปะ, ปัว เปอะ ง่อต รซอม ปัว อาึ นึง เปอะ เฮี.

³ โอ พะจาว, เมือ กซะ อื ปะ ฮมอง ลอป เปอะ เซียง อาึ, นึง โกฮ ไววอน อาึ ละ เปอะ. อาึ มอง ลอป ปะ ไม่ รพาวม รกวน แตะ.

⁴ ปะ เกือฮ เปอะ โตว ติ แตะ มวน รพาวม นึง กัน ฆอก กัน เบร. โม ป ยุฮ กัน โอ ปุก โอ ลอก เกียฮ อาวต ดิ โตว ไม่ ปะ.

⁵ โม ป อวต ติ แตะ ระ ซ โฮลฮ โตว อาวต ไม่ เปอะ ติ ปุย เนอึม, ปะ เกละ เนอึม เปอะ ยุ โม ป ยุฮ กัน ฆอก กัน เบร เตือง โอยจ อื.

⁶ ปะ ยุฮ เปอะ ไลจ ไม่ โม ป อัฮ ป โอ เนอึม. โม ป ฆวต คัม ตุง ปุย เกือฮ โซะ เกือฮ ยุม ไม่ โม ป ซาวป จุ ปุย ไลจ เจอ, ปะ รแอม เนอึม เปอะ นึง.

⁷ อาึ ปังเมอ ซ เลียก กไน วิฮัน ยุฮ เปอะ เบือ รพาวม ฮรัก ตอน ฮมัน ยุฮ เปอะ ป มัฮ ป ระ ไล. อาึ ซ นุ่ม ติ แตะ ไว ปะ นึง วิฮัน ซง่ะ ซงอม ยุฮ เปอะ ไม่ รพาวม นัปทื แตะ ปะ.

⁸ โอ พะจาว, ปัว ปะ นัม อาึ เกือฮ โฮว นึง คระ ซืไซ ยุฮ เปอะ, นึง โฮวน โม ป เกละยุ อุ. ปัว ปะ นัม นา แตะ เกือฮ คระ โฮว เยอะ ซโฆรฮ ซฆรัน.

⁹ ลปุง ป โอก ฮา มวยญ ปุย โม เซ ไก โตว ป เนอึม นึง. รพาวม รโม่ยฮ อื ง่อต ลอป ตอก ซ ยุฮ แตะ ไลจ ไม่ ปุย. โตะ คราวง อื ตอก โตะ รมอยจ ป โลฮ ปุย โฮ. ดัก อื ซาวป แนฮ อัฮ ลปุง ชอม ละ ซ จุ แตะ ปุย.

¹⁰ โอ พะจาว, ปัว เปอะ เกือฮ ปุย โม เซ ลอก ตุต ฆาื กัน ฆอก ยุฮ อื เซ. แพนกัน ป ตะ อื ยุฮ เซ เกือฮ แปน ตอก ซราว ป ตาวง อื อาึง ละ โกะ แตะ ไอฮ. ปัว เปอะ โครฮ ปุย โม เซ โอก ฮา เปอะ ฆาื มั่ป โฮวน ยุฮ อื เซ นึง เลฮ อื เตียง เปอะ.

¹¹ ละ โม ป เลียก เปิง ปะ นึง อื, ปัว ปะ เกือฮ อื โฮลฮ ไมจ เปละ ลโลวง พาวม. เกือฮ โฮลฮ เชีย ลอป ไม่ รพาวม ไมจ มวน แตะ. ปัว ปะ เฆีญ อื ฮา ป โอ ไมจ, เดอึม โม ป ฮรัก เปอะ เซ ซ ไมจ มวน รพาวม เบือ เปอะ.

¹² โอ พะจาว, ละ โม ปุย ซื ปุย ไซ เยอ, ปะ ปิฮ เปอะ กุนมุ่น ยุฮ แตะ ละ, ปะ เอีจ เฆีญ เนอึม เปอะ ฮา ป โอ ไมจ, เบือ กุนมุ่น ยุฮ แตะ เซ.