ลืลาว 29 - ้พระคัมภีร์ละว้า

รซอม เชีย ยุฮ ด่าวิต

¹ โม เปะ ป มัฮ โม เตปด่า เตือง โอยจ เปอะ, ไมจ เปอะ ลืลาว พะจาว. ลืลาว โญตซัก อื ไม่ อัมนัต ระ ไล ยุฮ อื.

² ไมจ เปอะ ทไว โญตซัก ละ พะจาว เกือฮ โปง ไม่ มอยฮ อื. ไมจ เปอะ นุ่ม ไว พะจาว นึง มัฮ อื ป ตึก นึง ซง่ะ ซงอม แตะ.

³ ปุย ฮมอง เซียง พะจาว นึง ปลัฮ รอาวม. เซียง อื เซ ระ ซนัน ตอก เนอึม บริ โฮ, เซียง อื เซ ลอยฮ เอิน เลี่ป ราว ปลัฮ รอาวม เซ.

⁴ เซียง พะจาว ระ เนอึม อัมนัต, เซียง พะจาว มัฮ ป ตึก นึง คึนัก แตะ.

⁵ เซียง พะจาว โบวก ยุฮ โคะ โซน ซีด่า นึง บลาวง เลบ่านอน. ปัง มัฮ โคะ โซน ตึก นึง ระ แตะ โบวก ตื ยุฮ อื.

⁶ พะจาว เกือฮ บลาวง เลบ่านอน ดุงเดียง เรียง ตอก เอิน กวน โมวก เญือม เตน อื โฮ. บลาวง เฮอโมน ดุงเดียง โรฮ ตอก เอิน โรฮ กวน มวย เจิง โฮ.

⁷ เซียง พะจาว เกือฮ โรฮ ปลุกปลัก ฮอยจ พราวป นึง ปลัฮเตะ.

⁸ เซียง พะจาว เซ รยุ่ ยุฮ ลาึน เวือฮ, เกือฮ โรฮ ลาึน คาเด่ต ดุงเดียง โรฮ.

⁹ เซียง พะจาว เกียฮ ดุงเดียง ยุฮ โคะ ระ โคะ ฮลาวง, โคะ นึง เพระด่าวก ราื โอยจ เอิน ฮละ ฆาื อื. โม ป อาวต นึง วิฮัน ยุฮ อื อัฮ ตื เฮี, “ลืลาว พะจาว เยอ เออ,” อัฮ เซ.

¹⁰ มัฮ พะจาว ป ตัตเตียง ปลัฮ รอาวม ป ตึก นึง โด่ะ แตะ เซ, นึง มัฮ อื กซัต ป ตัตเตียง ลอป โอเอีฮ โอ เญาะ ไก ลอยจ.

¹¹ มัฮ พะจาว ป เกือฮ เรียง แด่น ละ โม ปุย ไน แตะ, ไม่ ปิฮ อื กุนมุ่น ละ, เกือฮ อื โฮลฮ อาวต เฮน อาวต ฮลอง.