ลืลาว 128 - ้พระคัมภีร์ละว้า

รซอม เชีย เญือม ฮาวก ปุย นึง วิฮัน

¹ ปุย เมาะ ป นัปทื เนอึม พะจาว เยอ, โฮลฮ เนอึม รพาวม ไมจ มวน แตะ เบือ อื. ปุย ตอก เซ มัฮ ปุย โฮว ลอป นึง คระ โครง ยุฮ พะจาว.

² ปะ ซ โฮลฮ เปอะ โซม เบือ กัน ยุฮ เปอะ ไอฮ. ซ โฮลฮ เปอะ รพาวม ไมจ มวน แตะ เบือ อื, ไม่ รพาวม เฮน ฮลอง แตะ.

³ ปรโปวน เญือะ เปอะ ซ โฮวน กวน ตอก โคะ อะงุน เกลอึม เปลิ โฮ. โม กวน เปอะ ซ รวิต เอิน ตวก โซม เปอะ ตอก ฆอย โคะ กาวก โฮ.

⁴ โม ป นัปทื เนอึม พะจาว เยอ, มัฮ ป ไมจ ตอก เซ ป ซ โฮลฮ อื.

⁵ ปัว พะจาว ปิฮ มุ่น ละ เปอะ เน่อึม นึง เมือง ซีโยน, ไม่ เกือฮ เปอะ โฮลฮ ยุ ตอก จเลิน เวียง เยรูซาเลม ติ เจน ไอม เปอะ.

⁶ ปัว พะจาว เกือฮ เปอะ โฮลฮ ยุ โม กวนโซะ กวนแซะ เปอะ. ปัว เกือฮ โม อิซราเอน โฮลฮ อาวต เฮน อาวต ฮลอง ลอป.