ZEKHARIA 4 - Lacid Common Language Bible

Myibung: Ki" Jang: Yoeb Myang

¹ Ngoo yo' doem go" yu" bye: da" moug: lagyoo: gi nga" jang" moo dalheing: doem re" lho: yhoeb myhid jo, su: ri nhau" yhang: ti" ngoo ri lhu: nau" kaid.

² Hau: lho: nyang: gi «Nang cenoem myang» ga: myid: «Sheing: yo' koid da" myikug ki" jang: daloem: myang» ein: ngoo tid. «Hau: da" aphyoo" moo xu: kaid wa khu soo" dakhyab jo,- hau: aphyoo" moo myicoo: nyhed khaid khaid bo da" myibung: nyhed loem: zhung: to".

³ Hau: da" myibung: ki" jang: anam moo zhainloin: seig eig gam yug jo,- dagam gi lo, yo shoid moo dagam gi lo, kung" shoid moo yug jo, da» ein: tid kyo".

⁴ Hau: thang: ri ngoo gi «He: zigi cenoem ri tu' to"» ein: moug: lagyoo: ri myid: bye:.

⁵ Nyang: gi ngoo ri «Nang he: ziri asi' la"» ga: myid: lang" ngoo gi «Aseing: we" ngoo asi» ein: phug tid bye:.

Zerubabela ri Byid: To" da" Mangso Dangsoo" Khoin"

⁶ Aseing wigi Zerubabela ri tid kyoo" wa da" mungdang: ri moug: lagyoo: gi ngoo ri tid kyo". Hau: mungdang: gi «Nanu" da" yoem: so' khyo" meing: zain: go" khyo" yo" bue" loo wa zi anghoid- nga" Venyi: khyo" za: danghoid» ga: tid.

⁷ «Gye" gyi: da" boem moo" we"- nang gi cenoem nghoid la". Zerubabela shidkhoin" moo nang gi jang: dam bue" loo" wa zi nghoid. Nyang: gi Noku Yhoem: Moo" ri doem zhug lho: thang" thang moo yhoem: jhoin: mo khung: phoug lug zhug to" uri mung" byu yigi ‹Gye" yung" gye" yung"› ga: nyho: thu lo boem wa» ga: tid.

⁸ Aseing jang" mo mungdang: gootu: nga" jang" moo ju" re".

⁹ Zerubabela gi he: yhoem: ri ayang: zhug too" bye:. Hau: lho: zhug we' bain zhug too" bye:. Hid: myhoo' ja: bue" lo uri nyangnu" nyid jang" moo nyang: ri nhang: kaid su: gi Aseing Mangsoo: ngoo nghoid ziri nga" mung" byu yi se' loo goo" wa nghoid.

¹⁰ He: moo" zoo" zei: shid" lo" ayo, moo azhei' kyeung" da" moo" ga: kyi: yang myeung nyid da" byu yigi akhid" Zerubabela lo, moo ci: da" khung: phoug lug ri myang uri ngei pyo: goug yi boem wa. «Hau: myikug ki" jang: nyhed loem: gi Aseing da" myojid" nyhed loem: ri tid zi nghoid. He: myojid" gi moug: gyab goin" jang" mo jo, moo jo, dangain" ri yu" myang zi nghoid»

¹¹ Houg: lang" ngoo gi nyang: ri «Myibung: ki" jang: lo, yo shoid yo' lo, kung" shoid mo zhainloin: seig eig gam gi cenoem ri tu' to" lha"» ein: myid.

¹² «Zhainloin: xu: foid kaid ja:- sheing: coo: eig khaid da" anam moo jo, da" zhainloin: ko' eig ko' gi cenoem ri tu' to" lha"» ein: ngoo myid: yu" ri

¹³ Nyang: gi ngoo ri «He: ziri nang asi' la"» ga: myid: lang" ngoo gi «Aseing: we" ngoo asi'» ein: phug tid bye:.

¹⁴ Houg: lang" «He: zigi moug: gyab goin" ri seing: su: da" moo" ri zei: wa shid re" Mangsoo wigi shooxu: joid khyen: too" su: tang: nghoid» ga: tid.