YOSHU 8 - Lacid Common Language Bible

Ai Voomoo" Ri Seing: Yu Lho: Phyo' Pyam Khyoo:

¹ Aseing gi Yoshu ri «Gyizoo: dangain" nang yo' dage" shu" wigi Ai voomoo" khyoo: yhi: we'. Agyug goo"- yoem: agyoug: goo". Ngoo gi nang ri Ai khokham adang moo: oung: doid nhang: wa. Nya: byu yi voomoo" yo' moug: ri oung: doid nhang: wa. Nya: byu yi voomoo" yo' mougmyid gi nanu" re" nghoid ri" goo" wa.

² Nang gi Yerikho yo' nya: khokham ri koid loo bye: ziyo' dakhyoo" ti" Ai voomoo" ri yo' khokham ri we' koid wa zi nghoid da:. Nghoid loug we' akhid" he: lheing: gi houg: mo zi joem yo' yhoem: gougnyhoug goug doo: joem ri nanu" nyang: nya: shid re" yo" seing: yu ago". Voomoo" nungthang shoid khyo" nyeigdain tung" yhe: zain: yu wa shid re" soin ge'» ga: tid da:.

³ Houg: yoomo Yoshu gi nya: gyizoo: dangain" yo' Ai voomoo" khyoo: yhi: wa soin' bye:. Nyang: gi nya: da" ge thang da" gyidab mo gyizoo: soem" moin ri khyen: yu wigi nyangnu" ri he: amyeing" dang: yo' dage" myen" ri nhang: thu kaid bye:.

⁴ Hau: amyeing" dang: gi «Voomoo" thei tab moo: yhe: gau" nyid ge'. Nghoid loug we' voomoo" mo atung" vi: goo". Gyi zain: wa jen" jen" koid ci: ge'.

⁵ Ngoo yo' nga" byu yigi voomoo" khyoo: tab tab yhe: loo" wa. Ai voomoo" mo bang: ngoonu" ri re" thougtheung khaid zain uri xang: shi" lheing: ngoonu" koid lid lo ziyo' dakhyo" ngoonu" gi doem tau" phang: wa.

⁶ Ngoonu" gi nyangnu" ri voomoo" mo zi vi: khyoo: ju" sho' ngoonu" thang: khyoo: nyangnu" cang khaid wa zi nghoid. Ngoonu" shid vhu" moo: koid bye: yhang: ti" ngoonu" gi nyangnu" mo phang: phug bye: ga: nyangnu" myid goo" wa zi nghoid.

⁷ Houg: lang" nanu" gau" jo, jang" mo thu re" wigi voomoo" ri seing: yu ge'. Nanu" Aseing Mangsoo gi hau: voomoo" ri nanu" ri byid: wa.

⁸ Nanu" voomoo" ri yo" seing: yu pyam lang" Aseing amyeing" byid: to" ziyo' dakhyo" hau: voomoo" ri myi: nghe' pyam ge'. He: zigi nanu" shid re" amyeing" dang: nghoid» ga: amyeing" byid: bye:.

⁹ Houg: lho: Yoshu gi nyangnu" ri nhang: thu kaid da:. Nyangnu" gi nyangnu" da" gau" wa joyoo khyoo: yhe: lo" wigi Ai yo' Bethela agyoo:- Ai da" bidvang shoid moo: yhe: lang" nyid ago". Yoshu gi myen" ri dab moo: theing: nyid da:.

¹⁰ Yoshu gi nab soin no' to wigi gyizoo: joem ri khe: zheing" yu da:. Hau: thang: nyang: yo' Israela vhujhung: yigi houg: bang: ri Ai voomoo" khyoo: shu" yhe: ago".

¹¹ Nyang: yo' dage" gyizoo: yigi voomoo" khoem" moo" duang: shoid khyoo: yhe: lo" wigi mougzhung: shoid moo: dab koid nyid da:. Ai yo' nyangnu" agyoo: moo: janggyoin: daloem: kyo: da:.

¹² Nyang: gi byu wim khyeing" yug ri shu" yu wigi Ai yo' Bethela agyoo:- voomoo" bidvang shoid gau" nyid joyoo moo: nyid nhang: to" da:.

¹³ Gyizoo: yigi voomoo" mougzhung: shoid dab ajhung: moo gyi zain: wa shid re" soin ago". Deing bang: gi voomoo" bidvang shoid khyoo: yhe: ago". Yoshu gi myen" ri janggyoin: moo: nyid da:.

¹⁴ Ai voomoo" khokham phoo Yoshu da" byu yiri myang lang" nyang: gi moo" myab myab zei bye:. Nyang: yo' nya: byu yigi nungthang shoid khyoo: gyi zain: wa soin to" ziri asi yoomo xang: shi" mo yhang: ti" dajho: yoomo za: Israela byumyu" yiri gyi zain: wa shid re" Yodan janggyoin: khyoo: yhe: lo" ago".

¹⁵ Yoshu yo' nya: byu yigi nung zoid zoid goin koid lho: myid pyoid yoo khyoo: tang" phang: lo" ago".

¹⁶ Voomoo" mo yuggi dangain" mo, gi houg: bang: jhang cang khaid wa shid re" dage" khe: zheing" yu zi shau" bye:. Nyangnu" Yoshu ri cang khaid uri voomoo" yo' soo" soo" ve: jang" moo: ju" yhe: lo" ago".

¹⁷ Ai voomoo" mo yuggi yugkhang" moo" gi Israela byu yi thang: khyoo: cang khaid ago". Voomoo" gi goem loem wa dayug we' anyid loo: too" kho' ago".

¹⁸ Hau: thang: Aseing gi Yoshu ri «Re" Lham: toid ri Ai voomoo" khyoo: yeing we'. Hau: voomoo" ngoo nang ri byid: nyid bye:» ga: tid. Yoshu gi nyang: ri tid ziyo' dakhyo" koid bye:.

¹⁹ Nyang: nya: lo, ri tu: kaid yo' dage" gau" nyid bang: myab myab to' yhe: lo" wigi voomoo" khyoo: tang" vang yhe: ziyo' hau: voomoo" ri yhe: seing: yu bye:. Nyangnu" dalheing: dam voomoo" ri myi: nghe' pyam bye:.

²⁰ Ai voomoo" mo yuggi yi doem tau" yu" kaid ri myikhoug" moug: khyoo: do, nyid ziri myang boem ago". Nyangnu" phang: loid wa khyoo: ajo, loo: nghoid da:. Ciwim gari: myid pyoid khyoo: tang" phang: lo" boem da" Israela byumyu" yigi akhid" nyangnu" ri khaid zain: wa shid re" doem tau" lheing: lo boem ago".

²¹ Yoshu yo' nya: byu yigi goo" bang: voomoo" ri seing: pyam wigi hau: ziri nghe' pyam bye: ziri myang lang" nyangnu" doem lheing: tau" lo lho: Ai voomoo" mo byu joem ri khaid zain: ago".

²² Voomoo" moo: nyid boem da" Israela byumyu" yigi gyoo" re" lho: gyi re" bo zain: da:. Houg: yoomo Ai voobyu yigi Israela byu yi wigi teing vang: too" bye: ziri se' wigi nyangnu" dangain" said pyam zi shau" bye:. Ai khokham mo lid wigi hang" we' aphang loid- hang" we' adeing loo: nghoid ago".

²³ Ai khokham koem gi myheig yu zi shau" wigi Yoshu jhang shu" lo zi shau" da:.

²⁴ Israela byumyu" yigi nyangnu" ri cang khaid boem da" joyoo myid pyoid moo gyivoo yugkhang" moo" ri said pyam abye: go". Hau: thang: nyangnu" Ai khyoo: doem tau" lo" lho: houg: mo yugkhang" moo" ri said pyam bye:.

^25-26 Yoshu gi nya: lham: toid ri Ai voomoo" khyoo: yeing to" wigi houg: mo yugkhang" moo" ri abain said toem" pyam pyam gi myidjang khyoo: akhyoo' nghoid da:. Yuggi myiyi: dangain" damoin eig khyeing" nghoid da" byu dangain" ri said pyam ago".

²⁷ Israela byu yigi Aseing wigi Yoshu ri tid to" ziyo' dayhang: ti" voomoo" ri seing: yu jang" mo gougnyhoug yo' zi joem ri nyangnu" shid re" seing: yu boem bye:.

²⁸ Yoshu gi Ai voomoo" ri nghe' pyam lho: phyo' sain" too" khoo' bye:. Hau: voomoo" gi akhid nyid" ju" sho' hougsu" dajo, jo, shi".

²⁹ Nyang: gi Ai khokham phoo ri seiggam moo: tei" lhang" said wigi nya: manggung ri myen" thang: ju" sho' too" kho' da:. Bidvang yo, ri Yoshu gi hau: manggung ri yu pyam wa shid re" amyeing" byid: da:. Hau: ziri voomoo" vang khyam: khoem" moo" duang: khyoo: she: khyo' yu wigi nyangnu" gi hau: ziri lugboem joem myoo" sho' yo' du" boem" nghoeb to" ago". Hau: zigi akhid nyid" ju" sho' hougmoo: jo, da:.

Ebala Boem Moo Tarha" Ri Nghab Khyoo:

³⁰ Hau: thang: Yoshu gi Israela byumyu" yi da" Aseing Mangsoo shid re" Ebala boem tho' moo: phoin: daloem: koid da:.

³¹ Nyang: gi «Phoin: ri joto' zi yo' aphyed da" lug boem joem yo' koid wa zi nghoid» ga: Moshe da" tarha" moo: tid to" ziyo' dakhyo" Aseing da" dei zoo: nghoid da" Moshe wigi Israela byu yiri byid: to" da" tarha" ri ci: wigi hau: ziri koid to" da:. Hau: dang moo: nyangnu" gi Aseing ri xoin" nghe' ngei" byid: ago". Houg: lho: nyangnu" gi nyangnu" da" zoem" khau: xoin" ri we' shugbyid: ago".

³² Yoshu gi Israela byumyu" yi yu" nyid da" hau: joyoo moo nyang: Moshe lhid" da" tarha" ri lug boem tho' moo: lhid" to" da:.

³³ Israela byumyu" yigi nyangnu" da" vhujhung: yi gyizoug: yi tarha" agyi yi yo' nyangnu" phung: mo tungbau byu yigi Aseing Dang: Theing Kuid: ri vu, ci: da" Levi khainjung yiri myonhoo: shu: lho: Aseing Dang: Theing Kuid: eig shoid moo yab jo, ago". Byumyu" yi agung dayi" gu: gi Gerizim boem khyoo: nungthang shu: wigi gootu: agung dayi" gu: gi Ebala boem khyoo: nungthang shu: wigi yab jo, ago". Main kaid jeju" kham: yu wa ayo, ju" loo lang" he: ziri nyangnu" koid goo" wa shid re" Aseing da" dei zoo: Moshe amyeing" byid: to" da:.

³⁴ Hau: thang: Yoshu gi tarha" pug moo: lhid" to" ziyo' dakhyo" mainkaid jeju" yo' nheing" khoin" yo' dage" hau: tarha" dangain" ri thui: zeing yo' nghab da:.

³⁵ Yoshu gi myiyi: yi zooshang: yo' nyangnu" phung: khoug moo: nyid nyid da" tungbau byu yi yo' dage" byu phung: goin" ri Moshe da" Dang: theing khoin" khang" moo" ri nghab kyoo" bye:.