YONA 4 - Lacid Common Language Bible

Yona da" Nheig yo: Khyoo: yo' Mangso Nheig Khyeug Khyoo:

¹ Yona koem' gi he: khyoo: yo' sen: wigi myid apyoo: yoomo nheig gye" yo: nyid.

² Houg: yoomo nyang: gi «Aseing we"- ngoo yhoem: mo athu loo shi" uri nang gi hougsu" koid wa ziri ngoo tid bye: anghoid la". Nang gi khanham we' jheddab myid yo' nheig khyeug nyid su:- nheigloem: gyi: sheung: nyid su:- yooboo dam kaid wa jang" mo lei lei doem yoeb pyam da" Mangsoo nghoid nyid ziri ngoo se'. Ngoo Spain mung" khyoo: phang: loo" bye: zi he: gang mo nghoid.

³ Aseing we"- akhid" ngoo ri shid: nhang: la- dei nyid wa tho' moo shid: wa zigi je" ge nyid bye:» ga: mho' nyid.

⁴ Houg: lang" Aseing gi «Nang ce: nheig yoo: cang bo lha"» ga: myid:.

⁵ Yona gi hau: voomoo" mo thu lo" wigi bidthu shoid moo yhe: zhung: jo. Houg: moo nyang: gi nya: shid re" bid shoem: daloem: baid lho:-Nineve voomoo" moo cibue" lo ziri myang sho' ga: hau: bid shoem: khoug: moo zhung: jo.

⁶ Houg: lang" Aseing Mangsoo gi Yona ri bid shoem: byid: wa shid re" nya: tho' moo agam youg loo nhang: da:. Houg: lang" nyang: myenjham" tung" shoug" nyid da:. Yona we' hau: agam yug loo yoomo gye" gau yi nyid.

⁷ Nghoid loug we' Mangsoo gi thang: nab kyoo' myo, myang zoo" ri tung: sang" dadu: ri nhang: kaid lho: agam kyug shid: loo" sho' khe" phyed pyam byid:.

⁸ Hau: lho: Mangsoo gi bid thu ri" lang" bidthu shoid mo lid lung ri houg nhang: kaid wigi bid gi Yona vhuloem moo nge" nyid yoomo coid lo" nyid bye:. Houg: yoomo nya: gung nyang: shid: nau da:. Shid lo" zigi dei nyid tho' mo nga" shid re" je ge ga: wigi tid nyid.

⁹ Houg: lang" Mangsoo gi Yona ri «Agam ri nang ce: nheig yoo cang bo lha"» ga: myid: Yona gi «Ngoo nheig yo: zi gye" jo da:. Shid: wa yhi' nheig yoo: nau» ga: phoug tid da:.

¹⁰ Aseing gi nyang: ri «Koid we' nang akoid- yug we' nang ayug ri" nhang:- damyen za: yug re" lho: damyen dam doem byug lo" da" agam ri nang vhu" byid nyid da:.

¹¹ Hougsu" nghoid rigi he: voomoo" zeing Nineve ri je" nheig khyeug wa eung: nyid da:. Khasu" ga: ga: houg: moo yooboo abo da" zooshang: 120,000 yug yo' gougnyhoug myoo" sho' nyid da» ga: tid da.