YOHAN 20 - Lacid Common Language Bible

Loeb Koem:

¹ Akhid" Labain nyid" myo, myang zoo" ri Magadala Mari gi loeb' moo re" yu" da" uri loeb' khoem" mo da" lugloem: tu: se: pyam to" ziri yhe: myang.

² Nyang: gi Simun Petru yo"- Yesu jheddab da" cangzoo: yi jhang khyoo gei lo" lho: Aseing: ri loeb mo wigiyu lo" byug boem bye:- khayoo: too" go" la'- asi ga: lo" tid kyo.

³ Houg: thang" ri Petru yo" goo tu: cangzoo: phoo gi loeb' khyoo: yhe: lo" ago".

⁴ Hau: eig yug gi dage" gei yhe: loo" nghoid loug- goo tu: cangzoo: phoo gi Petru tho' moo je yo" gei yoomo loeb' moo xang: shid" ju" yhe.

⁵ Nyang: gi yhe: goeb' yu" kaid ri loeb' khoug: moo pain" gyo" jo, ziri date: myang. Nghoidloug we' nyang: gi loeb khoug: moo avang loo" loo: za: nyid nyid.

⁶ Nya: thang: moo cang ju" re" da" Simun Petru gi ju" re" yo' loeb' khoug: khyoo: dain: vang lo" ri pain" khyoid: khyo, to" ziri we'

⁷ Yesu da" vhu" loem moo thoeb' da" vhu" thoeb' gi goo tu: joyoo moogyo" jo, ziri we lo" myang.

⁸ Hau: thang: ri loeb' moo xang: shid" ju" re" da" gootu: cangzoo: we' loeb' khoug: moo cang : vang lo" yu" da" uri houg: moo bue" lo da" khyoo: ri myang yoomo loem" jeing" loo bye.

⁹ (Yesu gi shid: jang" mo doem dei to'' loo" wa ga: da" jhoem: mungdang: ri houg: bang: akhid" ju" sho ase' gyo: boem shi.)

¹⁰ Hau: thang: ri cangzoo: eig yug gi doem tau" lo" ago".

Magadala Mari Ri: Yesu Da" Gung Toin" Shed

¹¹ Mari gi loeb nam moo yab lho: ngau nyid. Nyang: gi ngau zoori loeb' khoug: moo goeb' yu" kaid da

¹² Yesu da" gung doem vhuloem yang: moo Mouglagyoo: dayug khyid: thang: khyoo: dayug- Mouglagyoo: eig yug- bang: bang: phyu: da" byimi void ci: lho: zhoung: jo, ziri myang.

¹³ Hau: Mouglagyoo: eig yug gi myiyi: zoo: we" ci: wim ngau nyid lha"» ga: myid. Mari koem gi nyangnu"- Nga" Aseing: ri yu lo" byug bye. Nyangnu nyang ri khayoo: to" zi ngoo asi ga: tid.

¹⁴ Houg: su" tid lho: thang: khyoo: lheing: yu" kaid ri Yesu yab jo, ziri myang. Nghoidloug we' Yesu nghoid zi asi.

¹⁵ Yesu gi myiyi: zoo: nang we"- ci: koid ngau nyid. Nang hang" ri sho: yen? ga: myid. Houg: lang" Mari gi Yesu ri khyam: zung" su: ga: jho: lho: nheig boo phoo we" nang nyang ri yu lo" nghoid rigi nang kha joyoo moo to" zi ngoori tid kyoo" we' ngoo nyang ri yhe: yu ci: loo" wa.

¹⁶ Aseing Yesu gi Mari we" ga: yoid. Houg: lang" Mari gi lheing: yu" lho: Hebre myeing" khyo" Raboni- ga: tu. (Raboni ga: da" dangkang: gi sara: ga: da" dang: nghoid.)

¹⁷ Yesu gi ngoori azei: ci:- ngoo gi nga" pho jhang khyoo: ashau" do, loo" shi"- nghoid loug we' nga" mang nhung" be jhang khyoo: yhe: lho: nga" phoo ga: da" Nanu" da" nya: phoo- Nga" Mangsoo ga: da" nanu" da" Mangso jhang khyoo:- ngoo doem tau" loo" loo: wa da" khyoo: ri tid kyoo" ge' ga: tid.

¹⁸ Houg: yoomo Magadala Mari gi cangzoo: yi jhang khyoo: lo" lho: nyang: Yesu ri nyang: myang khoo, bye: da" khyoo: yo' nyang: nyang ri pyeung: kaid da khyoo: ri lo" tid kyo" Aseing: khasu" ga: pyeung: kaid da" khyoo: ri lo" tid kyo.

Nya: Cangzoo: Yiri Nya: Gung Thu' Shoug Khyoo:

¹⁹ Cangzoo: yi gi Yuda zoug: myeing" ci: mo, ri gyoug yoomo Labain myen, gamgung yoo ri yhoem: khoem" myhed" pyam lho: zeung: foem: nyid boem. Hau: da" uri Yesu gi ju" lo lho: nyangnu" da" mo, phung: gung moo lo yab jo. Nanu" moo myenjham" ngei pyo: khyoo: dajo, nyid baja" ga: tid.

²⁰ Houg: su" bain tid lang" gi Yesu da" lo, yo nam joug ri cangzoo: yi ri toin" shid. Cangzoo: yi gi Yesu ri shau" myang boem yoomo gau yi nyid boem.

²¹ Hau: thang: ri we' dalheing:- Yesu gi nanu" moo myenjham" khyoo: dajo, jo, baja" ga: nga" phoo gi ngoori nhang: kaid ziyo' dakhyoo" ti"-- nanu" ri we' ngoo nhang: kaid ga: tid.

²² Houg: su" bain tid thang: ri Yesu gi cangzoo: yi da" tho' moo so' moid kaid lho: gyeungshang: da" Venyi: ri kham: yu ge" ga: tid.

²³ Nanu" gi sube" da" yooboo ri khyoid pyam byid: ri nyangnu" gi yooboo gyoid loo" wa zi nghoid. Nanu" wigi akhyoid byid: nghoid rigi nyangnu" da" yooboo gi khyoid pyam shau" wa zi anghoid ga: tid.

Yesu Yo' Thoma

²⁴ Yesu jure" da" ayo, moo (Zoo: zoem" ga: myheing da") cangzoo: daxe eig yug mo, dayug nghoid da" Tho" ma gi cangzoo: yi yo" dage" anyid eung:.

²⁵ Houg: yoomo cangzoo: byen cang" yi gi Yesu ri ngoonu" myang bye:- ga: lhoem tid kyo" boem. Thoma gi lo, mo da" ten" zei: baid khoo: yo' nam joug mo da" dam, khoo: ri za: ashau" soeb' yu" rigi ngoo aloem" ga: tid.

²⁶ Hau: thang: shed nyid" koo: myang" ri cangzoo: yi gi yhoem: khoug: moo doem zheing: foem: to" boem. Thoma we' dage" nyid. khoem" dangain" ri myhed" too" nghoid loug we' Aseing Yesu gi vang lo wigi nyangnu" da" mo, phung: gung moo yab jo, lho: nanu" moo myenjham" khyoo: dajo, jo, baja" ga: tid.

²⁷ Hau: thang: Thoma ri re" lo, nyoug" yo" hid: moo thau" yu" we' nga" lo, joem ri we yu" we' Re" da" lo, yhoin" kaid lho: nga" nam joug moo soeb yu" we' aloem" jeing" loo: loem shoid khyoo: akoid. Loem" jeing" nyid we' ga: tid.

²⁸ Thoma gi Nga" Aseing:- Nga" Mangsoo- nang nghoid bye: nhung: lha"» ga: phaug tu".

²⁹ Aseing Yesu gi nang gi ngoori myang lho: daloem" la". Ngoori amyang loug loem" jeing" mo gi ngi lho, boem wa" ga tid.

He: Jhoem: Pug Da" Myid Too" jang:

³⁰ Yesu gi he: da" mougsoug" moo abo lhid" to" da" mau" pho" alhoo: again myoo" sho' ri nya: cangzoo: yi da" Shid khoin" moo toin" shid bye.

³¹ Nghoidsho' loug we' Yesu gi Mangso da" nya: zoo: Meshia nghoid da" khyoo: ri nanu" loem" jeing" loo wa ziyo' nanu" nyang ri loem" jeing" lho: kang so' yoo" wa shid re" he khyoo: joem ri lhid" to" zi nghoid.