YOHAN 13 - Lacid Common Language Bible

Yesu Nya: Cangzoo: Yi Da" Khyid: Cid" Byid: Khyoo:

¹ Lhed: kaid da" pui" ju" wa ayo, gi danyid" ca" shi" ri Aseing Yesu gi He: mougmyid mo thu' lo" lho: phoo jhang khyoo: loo" wa da" ayo, ju" loo bye: ziri se' boin: loo bye. Yesu gi he: mougmyid moo nyid da" nya: thang cang mo, ri jheddab lid lo bye. Nyangnu" ri lo" thang bidnyid ju" sho' jheddab bye:..

² Aseing Yesu yo' nya: cangzoo: yi gi myen" xoin: shoin" zo: nyid. Yu satan gi Simun Iskarud da" nya: zoo: Yuda da" nheig loem: moo vang lho: Yesu ri gyivoo yi da" lo, moo ab pyam' wa da" shid' re" phajhi" byid: too" gu nghoid bye.

³ Aseing Yesu gi nyang: ri phoo Mangso wigi amyeing" bain sho' ab byid: to" ziri we' nyang: gi Mangso jang" mo gyoo" lo lho: Mangso jhang khyoo: doem loo" loo: wa da" khyoo: ri we' si' gu nghoid.

⁴ Houg: yoomo zoo: bui" mo to' lho: byi: sheing: ri khyoid wigi phajed' ri yu lho: phyid" doem moo yeing" ci.

⁵ Hau: thang: ri jarung: moo gyid kaid ci: lho: cangzoo: yi da" khyid: ri cang cid" byid: wigi phyid" cu" cu" ci: da" phajed' yo" doem cang soid byid.

⁶ Simun Petru jang" moo ju" rigi Aseing: we" nang nga" khyid: ri cid" byid: wa la". ga: lhoem: myid.

⁷ Aseing Yesu gi Ngoo koid; da" moo" ri nang akhid" asi shi"- thang: phyang" she dase' gyoo: loo wa ga: phoid: kyo.

⁸ Petru gi Nga" khyid ri Aseing: khanham we ayo" cid" byid: ga: tid. Yesu gi Re" khyid: ngoo ayo" cid" byid: lang" gi nang yo' ngoo ci: asen loo: ga: tid.

⁹ Houg: lang" Petru gi Aseing: we" nga" khyid: za: anghoid loo:- lo, yo" vhuloem ri we bo cid" byid: we' ga: tid.

¹⁰ Yesu tid zigi gung bain cid" bye: su: gi dagung goin" young" lhoo, bye: nghoid yoomo khyid: date: cid" ca" lo:- dayug mo lid wigi nanu" dangain" gi young" lhoo gu nghoid boem bye.

¹¹ (Nyang: ri gyivoo yi da" lo, moo ab pyam wa su: hang" nghoid zi: ri si' yoomo Yesu gi dayug mo, lid wigi ga: tid da" khyoo: nghoid.)

¹² Yesu gi cangzoo: yi da" khyid: ri bain cid" byid: lang" byisheing: ri doem yu void ci: lho: zhoung: jo. Nyang: gi nanu" da: shid' re" ngoo koid; da" moo" ri se' gyoo: go" la"» ga: myid.

¹³ Nanu" gi ngoori sara: ga: we' Aseing: ga: wigi we' lhoung yoid ago". Houg: yo" dakhyoo ti"- ngoo nghoid bye:- nanu" yoid da" khyoo: we' gye du da" khyoo nyang nghoid bye.

¹⁴ Ngoo gi nanu" da" sara: moo" we' nghoid- Aseing: we' nghoid. Houg: su" nghoid to" lho: nanu" da" khyid: ri ngoo cid" byid: bye.

¹⁵ Houg: yoomo nanu" nghoid loug we' nyang: cang" nyang: khyid: ri cid" byid: goo" lho,- nanu" ri ngoo koid; yhangti"- nanu" nyang: cang" we' houg: su" koid; wa khyo" akhyoo" ri ngoo shid' too" bye.

¹⁶ Deing" deing nanu" ri ngoo tid nau da" zigi join, gi yhoem: seing: tho' moo je gyi su: anghoid. Lagyoo: we' nhang: kaid su: da" tho' moo je gyi: zi anghoid.

¹⁷ He: da" deung main" da" khyoo: ri akhid" nanu" se' boem bye. Houg: su" si' bye: ziyo' dakhyoo" ti"-- nanu" cang zei: lo" rigi ngi lho, boem wa.

¹⁸ Nanu" dangain" mo, ri ngoo yeung lho: tid zi anghoid. Ngoo khyen: too" mo, ri ngoo se' nyid. Nghoidloug we' Jhoem: mungdang: moo nga" voem: zoo: su: gi ngoori khoo: thang: theing wa ga: lhid" to" zi nghoid.

¹⁹ Houg: su" bue" lo da" uri ngoo gi ngoo nyang: nghoid da" khyoo: ri nanu" ri loem" jeing" nhang: wa da" shid' re" akhid" mo nyang: nanu" ri tid poin" to" zi nghoid.

²⁰ Deing" deing nanu" ri ngoo tid da" zigi ngoo nhang: kaid su: ri lhoem: kham: yu su: gi ngoori lhoem: kham: yu zi nghoid. Ngoori lhoem: kham: yu su: we' ngoori nhang: kaid da" su: ri lhoem: kham: yu zi nghoid ga: wigi tid.

Yesu Ri: Ung" Zo: Pyam Wa Da" Khyoo:- No" Re" tid To"

²¹ Hid: su" ga: bain tid da" thang: ri Yesu gi atho' tid loo: sho' nheigloem: myid myo: lho: Deing" deing nanu" ri ngoo tid da" zigi nanu" da" akhoug: mo byu dayug gi ngoori gyivoo yi da" lo, moo ab pyam wa"- ga: bang" bang tid kyoo" bye.

²² Kha: yug ri yeung lho: tid nyid zigi cangzoo: yi ase' boem yoomo nyang: cang" nyang: yu" moug" go" nyid boem.

²³ Hau: da" uri Aseing Yesu jheddab da" cangzoo: dayug gi Aseing: da" nam, moo zhoung: jo.

²⁴ Simun Petru gi hau: yug jhang yhe: lho: «kha: yug ri yeung lho: tid nau la' myid: yu" we'» ga tid.

²⁵ Hau: cangzoo: gi Aseing Yesu da: namtain" moo yu: re" lho: Aseing: we" houg: su" koid' wa zigi kha yug nghoid wa lha". ga: myid.

²⁶ Yesu gi he: zooyho' daloem: ri xoin" khu, moo joem lho: ngoo byid: su: gi hau: yug nyang: nghoid bye: ga: tid kyo. Hau: thang: ri zooyho' dakhyi ri xoin" khu, moo joem lho: Simun Iskarud da" nya: zoo:- Yuda ri byid.

²⁷ Hau: zoo: yho' ri Yuda zo: kaid ziyo' dage" satan gi nya: nheigloem: khoug: moo vang loo" bye. Yesu gi nyang ri nang koid; wa da" moo" ri myab myab zei: we' ga: wigi tid.

²⁸ Yuda ri houg: su" ga: cikoid; tid da" zi zoobui" moo zhoung: jo, mo, hang" we' ase boem.

²⁹ Yuda gi ngei thung: zoem su: nghoid yoomo pui" shid' re" yhoug: gyen: da" zi qei wa ga: la' shojhen: mo, ri gam byid: wa shid' re" la'- Yesu dang: pyeung: nyid sam" ga: cangzoo: yi dayham" jho: nyid boem.

³⁰ Yuda Iskarud gi zooyho' dakhyi, ri kham: yu ci: lho: myab myab thu' loo" khari" bye. Hau: ayo gi myen" ayo, nghoid nyid.

Tarha" Aseig

³¹ Yuda thu' loo" khare" thang: ri Aseing: Yesu gi Akhid" byu da" nya: zoo: gi myo, nhoo: ngei: lang: bug thu' sheing" jhu" lo zi shau" bye. Mangsoo we' hau: yug: yoomo myonhoo: bug thu' sheing" jhu" lo zi shau" bye.

³² Mangsoo gi hau: yug khyo" wigi myonhoo: ngei: lang:- bug thu' sheing" jhu" lo rigi phoo Mangsoo gi nya: gungdu: khyo" wigi byu da" nya: zoo: ri we' myonhoo: bug thu' sheing" jhu" loo nhang: wam bye.

³³ Nga" zoo: yi we"- ngoo gi nanu" yo daso' date: nyid loo: wa. Nanu" gi ngoori sho: goo" wa. Nghoid loug ngoo yhe: lo" nyid da" khyoo: moo nanu" ayo" cang loo ga: wigi Yuda zoug: myeing" ci: mo, ri kho" kyo" yu" ziyo' dayhangti"- nanu" ri we' akhid" ngoo kho" kyo.

³⁴ Nanu" nyang: cang" nyang: jheddab goo" ge" ein: da" tarha" aseig ri nanu" ri ngoo byid: bye. Ngoo nanu" ri jheddab yhangti"- nanu" we' nyang: cang" nyang: jhed' dab, go" nyid ge'.

³⁵ Nanu" nyang: cang" nyang: se' jheddab go' nyid rigi Byu dangain" mo, hau: jhed' kang: da" khyoo: ri yu myang lho: nanu" gi nga" da" cangzoo: yi nghoid da" khyoo: ri se' lo boem wa ga: tid kyo.

Yesu Ri: Petru Ngeig Pyam Wa Khyoo:- No" Re Poin" Bye

³⁶ Simun Petru gi Aseing: we"- nang khayoo: loo" wa lha"» ga: myid. ‹‹Yesu gi ngoo yhe: lo" nyid da" jang" moo akhid" nang ayo" cang.» ‹‹Nghoid loug thang: phyang" ri dayo" cang loo wa» ga: tid.

³⁷ Petru gi ‹‹Aseing: we"- ciwim akhid" ngoo re jhang ayo" cang wa lha".» ‹‹Aseing: da" shid' re" nga" da" kangso' lang" ab pyam wa zi jen" jen" nghoid bye.»

³⁸ Yesu tid zigi nang gi nga" shid' re" kangso' yo" ab wa jen" bye: la". Deing" deing nang ri ngoo tid da" zigi gyo, atoin: shi" ri nang gi ngoori asi ga: soem" lheing: ju" sho' ngeig pyam wa su: nghoid ga: tid kyo" to.