YOHAN 10 - Lacid Common Language Bible

Yang Zung" Su: Da" Dangtu'

¹ Aseing Yesu gi Deing" deing nanu" ri ngoo tid ba- yang khyam: khoug: khyoo: khoem" duang: khyo" avang loo loo: za: goo" khyo" do, rhoid vang loo su: gi khoug" su: yo" khyangtoug: danghoid.

² Khoem" duang: khyo" vang loo su: koem gi yang zung" su: nghoid.

³ Yang zung" su: nghoid rigi khoem" zung" su: we' khoem" lhoem: phang byid: se' nyid. Yang joem we' nya: thui: ri se' gyo. Nyang: gi yang joem ri myeing yu khe: lho: yang khyam: mo, shu" thu' lo.

⁴ Nyang: gi yang joem ri shu" vhu" thu' lo" uri yang joem da" shid' khyoo: shu" vhu" she: yhe: lo. Yang joem we' nya: thui: ri se' gyoo: yoomo thang: moo bo cang lo" boem.

⁵ Yang joem gi byu being" thang: moo gi cang lo" boem wa zi anghoid. Byu being" da" thui: rigi ase' gyoo: yoomo nya: jang" mo gi phang: sain" loo" goo" wa zi nghoid.

⁶ Aseing Yesu gi he: dangtu' khyo" nyangnu" ri tid kyoo" nghoid loug- nyangnu" gi dangtu' da" dangkang: ri ase' gyo: boem.

Ge Da" Yang Zung" Su:

⁷ Houg: lang" Yesu doem tid zigi nanu" ri ngoo tid ba:- ngoo gi yang joem vang loo wa da" khoem" duang: nghoid.

⁸ Nga" shid' moo juri" mo, gi khoug" mo khyangtoug: joem danghoid. Houg: su" nghoid yoomo Yang joem gi houg: bang: da" dang: ri atam" gyoo.

⁹ Ngoo gi khoem" duang: nghoid. Nga" jhang khyo" vang ri" su: gi goem loem joyoo shau" bye. Nyang: gi thu' thu' vang vang yo" koid; wigi mhain" nu" jang: ri shau" myang wa zi nghoid.

¹⁰ Khoug" su: gi khoug" wa said wa ga: lhu: phyo' wa ga: date: re. Ngoo koem gi nanu" da" kangso' yoo" wa tho' moo byeung" shoin: lo" da" kangso' yo" dei nyid wa shid' re" re" zi nghoid.

¹¹ Ngoo gi ge da" yang zung" su: nghoid. ge da" yang zung" su: gi yang joem shid' re" nya: kangso' dain, pyam nyid.

¹² Lang: jhang gi yang zung" su: ti" anghoid. Yang seing: we' anghoid. Yoomo voem, khuid" joem ri" yo" myang lang" yang joem ri she: pyam too" kho' lho: thu' phang: lo" nyid. Houg: yoomo voem, khuid" joem gi yang phung: ri khaid ngaid wigi lhu: sain" pyam nyid.

¹³ Lang: jhang gi lang: jhang date: nghoid nyid ziyo' dakhyoo" ti"-- yang joem ri ce: nheig akhyeig loo:- thu' phang: loo" se' nyid.

^14-15 Ngoo gi ge da" yang zung" su: nghoid. Phoo Mangsoo gi ngoori se' yhangti"- ngoo we' phoo ri se' nyid. Houg: yo" dayhangti"- yang joem ri we' ngoo se' nyid. Yang joem we' ngoori se houg: yoomo ngoo gi yang joem shid' re" kang: ri yo" ab pyam zi nghoid.

¹⁶ He: da" yang khyam: moo abo da" yang- gootu: we' ngoo yoo" shi" Hau: yang joem ri we' nga" yang khyam: khoug: moo shu" vang loo ca" shi. Nyangnu" gi nga" thui: ri tam" gyoo: goo" wa houg: yoomo yang Phung: daphung: za: yang zung" su: dayug za: bue" loo wa nghoid.

¹⁷ Ngoo gi kangso' ri dalheing: doem yo" yu wa shid' re" nga" kang: ri yo" byid: pyam yoo mo phoo Mangsoo gi ngoori jheddab nyid.

¹⁸ Khayug we' nga" kangso' ri ayo" yu pyam byid ngoo nya: myid khyo" ngoo byid: pyam da" khyoo: nghoid. Ngoo gi kangso' ri byid: pyam wa amyeing" yo"- Kangso' doem yo" tau" yu wa amyeing" ngoo ci:- Hid: su" koid; wa shid' re" phoo gi ngoori akhyeing byid: to" amyeing" byid: to" zi nghoid ga: tid.

¹⁹ Hid: su" tid yoomo Yuda byu yi moo nheigloem: aveing" go" boem loo.

²⁰ Byu dayham" gi he: yug gi yu vang ci: da" foin" su: danghoid: ci: wim wigi nya: dang: ri nanu" tam" gyoo: go" ga: tid boem.

²¹ Nghoidloug we' byu dayham" bang: gi yu vang ci: su: gi hid: yhang te" da" dang: ayo" tid. Yu vang ci: mo, hang" su;- myo, amyang su: ri myo, yo" myang nhang: yu" la"» ga: tid boem.

Yesu Ngeig Pyam Shau" Khyoo:

²² Hau: ayo, moo Yerusalem voo mo, no ku" yhoem moo"- ab noung" pui" zeing: daloem: jo,- hau: ayo, gi xung" gung ayo, nghoid.

²³ Aseing Yesu gi no ku" yhoem moo" mo, Sholumon da" vang khoem" moo so" lheing yen.

²⁴ Hau: uri byu yi gi Yesu ri re" lheung: khoem, ci: lho: nang gi kha: myhang myang" sho' ngoonu" ri nheigloem: soin: yau: nyid nhang: wa lha". nang gi Meshia anghoid la".- ngoonu" ri bang bang tid kyoo" we' ga: myid: boem.

²⁵ Yesu gi nanu" ri ngoo tid kyoo" gu, nghoid bye:- nghoid loug we' nanu" gi aloem" jeung" boem. Phoo byid: da" amyeing" akhang" yo' dakhyoo ti"-- ngoo koid; shug da" moo" dangain" gi nga" da" khyoo: ri sagsi: kham: nyid zi nghoid.

²⁶ Nghoidloug we' nanu" ngoori aloem" jeing" yoo mo manu" ginga" yang joem anghoid.

²⁷ Nga" da" yang joem gi nga" da" dang: thui: ri tam" gyo: boem. Ngoo we' nyangnu" ri se' lho: nyangnu" we' nga" thang: moo cang ago".

²⁸ Ngoo gi nyangnu" ri apyaid ato: kangso' ri byid: bye: yoomo nyangnu" gi khanham we' ashid: loo: wa. Hang" we' nga" da" lo, mo houg: bang: ri ayo" lhoid yu loo.

²⁹ Nyangnu" ri nga" lo, moo ab byid: to" da" Phoo gi dangain" tho' moo je gyi: su: nghoid yoomo hang" nghoid loug- nyangnu" ri pho da" coung: goem nyid jang" mo ayo" lhoid yu loo.

³⁰ Phoo yo" ngoo gi dagung dashoo" za: nghoid ga: tid.

³¹ Houg: lang" mung" byu yi gi Asing: ri du" wa da" luggo, doem koid: ci: boem bye.

³² Yesu gi nyangnu" ri Phoo koid nhang: da" - moo" gi ri nanu" da" shig khoin" moo zei: bye. Hau: moozoo" kha: loem: yoomo nanu" ngoori luggo, yo" du" noug go" la"» ga: myid.

³³ Nyangnu" phug tu" zigi moo" gi dajaja: zei: yoomo Nang ri luggo, yo" du" nau zi anghoid. Nang gi byu kyeing" te: nghoid da: zi Mangso ayid void ci: lho: Mangsoo ri shoid vhang: da" dang: tid nyid yoomo luggo, yo" du" wa ga: tid ago".

³⁴ Aseing Yesu phougtu" zigi Nanu" da" tarha" : lhid" to" jang" moo Mangsoo ga: tid pang to" da- Jhoem: dang: moo toin" shid to" khyoo: yi gi khanham we' deingmain" nyid ziri nanu" se.

³⁵ Mangsoo gi nya: da" mungdang: tam gyo: nyid mo, ri Mangsoo ga: tid pang to.

³⁶ Phoo gi ngoori khyen: yu lho: he: mougmyid khyoo: nhang: kaid. Houg: su" nghoid yoomo Ngoo gi Mangso da" nya: zoo: nghoid ein: tid da" uri Ngoo gi Mangsoo ri shoid da" dang: tid ein:- nanu" khasu" koid; yo" tid go" lha".

³⁷ Phoo zei: nhang: nau da" moo" ri ngoo avoin, vu, nghoid ri ngoori aloem" jeing" goo"

³⁸ Ngoo ci: voin vu nyid nghoid ri koem gi ngoori aloem" jeing" nghoid loug we' ngoo voin, vu, da" moozoo" ri loem" jeing" ge'. Houg: lang" ngoo zei: da" moozoo" moo Phoo gi nga" khoug: moo nyid nyid lho wigi ngoo we' phoo yo" dadeing: daloem: za: nyid ziri nanu" se' gyo: loo wa ga: tid kyo".

³⁹ Houg: lang" nyangnu" gi Yesu ri myheig wa zi doem yoem: kaid go" lo" boem bye. Nghoidloug we' Yesu gi nyangnu" jang" mo, gau" jang" phang: thu' lo" byug.

⁴⁰ Yesu gi Yodan gyung: thei: tab' moo goonham, Yohan Babtisma kham: byid: joyoo khyoo: doem yhe: lho: hau: khyi moo nyid nyid.

⁴¹ Byu yi myoo" sho' nyang: Yesu jang" moo jure" boem. Nyangnu" gi Yohan gi ce: mau" pho" moo" ayo" zei: shug- Nghoidloug we' he: youg khyoo: yo" sen: lho: wigi Yohan kho" kyo" dang: gi dangain" deung nyid ga: tid boem.

⁴² Houg: su" nghoid yoomo hau: joyoo moo byu myoo" sho' nyang:- Yesu ri loem" jeing" lo boem.