YOELA 3 - Lacid Common Language Bible

Mangsoo gi Byumyu" yiri Dang: Phyed Loo wa Khyoo:

¹ Aseing tid zigi «Hau" ayo, moo Ngoo gi Yuda yo' Yerusalem ri nyid gi nyid de: lo khyoo: doem byid: wa nghoid.

² Ngoo gi byumyu" yi dangain" ri zheung" yu lho: nyangnu" ri dang: phyed lang: khoug: khyoo: shu" loo" wa. Houg: moo nyangnu" wigi nga" byumyu" yiri koid lid lo da" moo" dangain" shid re" ngoo gi nyangnu" ri dang: phyed byid: wa nghoid. Nyangnu" gi Israela byumyu" yiri tungbau mung" khyoo: khaid sain" pyam lho: nga" mungdain: Israela ri kho' sain" pyam da:.

³ Nyangnu" gi shau" myheug to" da" byu yi kha: yug ri hang" seing: wa phicab' du" boid phyed yu ago". Nyangnu" gi shava myhi' yo' yhid: shid re" ngei byid: wa shid mo yug gi nu"- myiyi: nu" yiri join khyo" ung" zo: ago".

⁴ Turu- Sidon yo' Philisti mung" byu yi dangain" bang: we"- nanu" gi ngoo ri ce: noem koid wa ein: soin' go" lha". Nanu" gi daja: ja: gungthid- ngoo ri latoo: phug wa ein: soin' go" la". Hougsu" koid wa nghoid rigi nanu" ri we' ngoo wigi myab, myab, latoo: phug loo wa nghoid.

⁵ Nanu" gi nga" da" ngei yo' sheing: ri lhoid pyam. Nga" da" phoug" dab ziyoo jonu" joem ri nanu" da" yu phara" yhoem: khyoo: ci: vang lo" boem ago".

⁶ Nanu" gi Yuda yo' Yerusalem mo da" byumyu" yiri nyangnu" da" moug: mo wigi vi: khyoo: myheig shu" lo" lho: Greek byumyu" yiri ung" byid: pyam ago".

⁷ Akhid" ngoo gi nanu" wigi nyangnu" ri ung" byid: kaid da" moug: joem mo nyangnu" ri doem shu" tau" loo wa zi nghoid. Nanu" gi nyangnu" ri koid ziyo' dayhang: ti" nanu" ri we' ngoo hougsu" doem koid wa nghoid.

⁸ Ngoo gi nanu" da" myiyi: yug gi zoo: yiri Yuda byumyu" yi jhang khyoo: ung" zo: pyam nhang: wa. Yuda byumyu" yigi nyangnu" ri moug: vi: mo Sabean byumyu" yi jhang khyoo: doem ung" zo: pyam goo" wa. Ngoo Aseing gi tid bye:.

⁹ Byumyu" yi da" mo, phung: gung moo hidsu" tid fu" kyoo" byid: we'. Gyi khaid meing: zain: wa soin' ge'. Nanu" da" sarhi' gyizoo: yiri khe: kaid ge'. Re" gyizoo: yi dangain" ri khe: zheung" lho: meing: zain: wa to' yhe: loo" ge'.

¹⁰ Nanu" da" khoin joem ri shamcoin" baid pyam ge'. Shigam cu: da" sham: nghui" joem ri lham: toid baid ge'. yoem: neing: bang: lang" gyi khaid yhe: lo" ca".

¹¹ Ayam aqei: mo da" byumyu" yi we"- hain: hain: re" lho: hau: lang: khoug: pa: dam moo zeung: foem: nyid ge'. O" Aseing we" nyangnu" ri zain: pyam wa shid re" Re" gyiphung: moo" ri gyoo" ri" nhang: we'.

¹² Byumyu" yigi byen soin' lho: dang: phyed lang: khoug: khyoo: ri" ca" bye:- hau: joyoo moo Ngoo Aseing gi ayam aqei: mo byumyu" yi dangain" ri dang: phyed wa shid re" zhung: jo, wa nghoid.

¹³ Nyangnu" gi gye" akhyeing" ashoeb yoomo nyangnu" ri gug yham" yo, mo gug ri yhang: ti"- yham" pyam we'. Zabyid pyeig jang: xoem: mo zabyid yhid: byeung" shoin: lo" yhang: ti"- nyangnu" ri pyeig pye" pyam ge'.

¹⁴ Byu khyeing" su: khyeing" su: gi dang: phyed lang: khoug: moo nyid boem abye: go"- Aseing da" bidnyid gi hau" joyoo moo amyang" ri ju" loo wa nghoid.

¹⁵ Bid yo' lhammoo" gi moug: coid teing no, lo" byug lho: kyi: joem gi ayo" doug bang jo, loo.

Mangsoo gi Nya: Byumyu" yiri Mainkaid Byid: wa Khyoo:

¹⁶ Aseing gi Ziun boem tho' mo thui: zeing yo' nyho: kaid wigi Yerusalem mo nya: thui: moo" wim kaid lang" mougkhung: myidjang gi nain" loo wa nghoid loug we' Aseing gi nya: byumyu" yiri goem loem byid: wa.

¹⁷ Hau: thang: Israela byu yi nanu" gi ngoo nanu" Aseing Mangsoo nghoid ziri se' loo goo" wa. Ngoo gi nga" da" gyeung" shang: bouggung Ziun moo nyid. Yerusalem gi gyeung" shang: da" voomoo" bue" lo lho: tungbau byumyu" yigi hau: ziri ayo" doem zain: oung: boem loo: wa.

¹⁸ Hau: bidnyid moo boem joem gi zabyid nei joem yo' nghoeb pyam wa. Boug gung dangain" jang" moo nu: kyung joem ri shau" myang wa. Yuda mung" dangain" shid re" gyid agoin agoo" yau wa. Aseing da" Noku Yhoem: Moo" mo gyid bug yau thu lo wigi Shug gam lang: khung" gyid yo" loo wa.

¹⁹ Nyangnu" gi Yuda mung" ri khaid zain: lho: ce" yooboo we' ayo" da" byumyu" yiri said pyam yoomo Egutu mung" gi moug: koem: bue" lo" lho: Edom mung" we' jham' dung" khe" da" siyoo bue" loo" wa nghoid.

^20-21 Ngoo gi said pyam shau" da" byumyu" yi shid re" latoo: phug wa zi nghoid. Ngoo gi yooboo yoo" mo, ri teung too" wa zi anghoid. Nghoid loug we' Yuda yo' Yerusalem gi apyaid atoo: moo geing: teing jo, wa. Ngoo Aseing gi Ziun boem tho' moo: danyid nyid wa nghoid.