YOBA 6 - Lacid Common Language Bible

Yoba

^1-2 Nga" yau: khi" yo' kougshu: ziri jang mo dato" leig nghoid rigi

³ Hau: joem gi panglai: mo midcoo: joem tho' je lid: wa. Hug yoomo ngoo dang: thain: tid nyid zigi cimoug" cang aboo.

⁴ Myhang: thang Mangsoo gi nya: myoo: khaid joem wigi ngoo ri beig abye:. Houg: lho: hau: joem mo myino, gi nga" gung moo byo loo bye:. Mangsoo gi nya: da" gyoug dain ja: ri nga" shid re" jung too" byid: bye:.

⁵ Loo zei: gi vufu" zo: nyid uri nheugdeug da:. Nu" zeing gi khoofoo: zo: nyid uri sam: zoo: tam" to" da:.

⁶ Nghoid loug we' main aboo xoo" angam" da" zoo: noem ri hang" yo" zoo: wa la". Gyo, u usham: moo ce: main bo la".

⁷ Hougsu" za: voem: ri nhoid ngam" thui: agyoo:. Houg: lho: ngoo zo: zi ja: khang" moo" gi ngoo ri nheig noo nhang: da:.

⁸ Ngoo mho' ja: ri Mangsoo ciwim ngoo ri abyid: wa la". Ngoo akyu" mho' dang: ri ciwim nyang: atu" byid: wa la".

⁹ Nyang: wigi shi" ngoo ri said pyam yhoo: o".

¹⁰ Nyang: hougsu" koid wa ngoo dase nghoid rigi ngoo khayhi' no nyid loug we' ngoo gi gau ziyo to' byam yen" wa. Mangsoo gi gyeung" shang: zi ngoo se' da:. Nyang: amyeing" byid: ziri ngoo khanham we' angeug he: pyam yu".

¹¹ Ngoo xo' dei nyid wa shid re" ngoo moo ce: yoem: so' bo la" Ngoo moo myid byu khyoo: ajo, zi ciwim se' xo' dei nyid wa la".

¹² Ngoo ri lugzeing yo' koid to" la". Nga" gung du: gi gyid: mid" nghoid la".

¹³ Ngoo nya: gung ri khyoid yu wa yoem: vhoo" ngoo moo abo. Ngoo ri pang" yu wa shid re" lheing: yu wa joyoo ajo,.

¹⁴ Mangsoo ri ngoo she: pyam bye: zi nghoid nghoid ashe: pyam nghoid nghoid Hid yhang: te" da" yau khe" da" uri ngoo gi jhug zug da" byencang" ca" da:.

¹⁵ Nghoid loug we' nga" byencang" yi nanu" gi moug: avoo lang" kyug hei lo" da" gyid zoo: gyung: yhang: ti" ngoo ri mhau' fain" zo: da:.

¹⁶ Gyid zoo: gyung: joem ri nghain: yo' gyu: joem wigi jhid teing pyam nghoid loug we'

¹⁷ Bid lung ri" lang" houg: joem gi yau bei: lo" ago". Houg: lho: gyid zoo: gyung: thoem" kang gi myid cen: doem: kyug hei jo, da:.

¹⁸ Gyung: soo" bang: gi gyid ri sho: lho: khyoodam: dam: byug da:. Nyangnu" gi so" lam" yen" lho: dain" pyoid yoo moo shid: lo" ago".

¹⁹ Sheba mung" yo' Tema mung" mo gyung: soo" bang: gi gyid ri sho: yen" ago".

²⁰ Nghoid loug we' kyug hei' jo, da" gyid zoo: gyung: nam moo nyangnu" da" myid byu khyoo: thang byug da:.

²¹ Nanu" gi nga" shid re" hau: gyid zoo: gyung: yo' du. Nanu" gi nga" vhu" pi: lo, kyo' ri myang wigi gyoug ziyo' nung zoid zoid phang: lo" ago".

²² Ngoo gi nanu" ri jhungshug byid: ge' ein: mho' yu" lha". Dayug yug ri nga" gungthid khyo" khougvhoid jhungshug bui" nhang: rhe".

²³ Anghoid lang" gyivoo dayug yug mo zeig zo da" zoug: dayug yug lo, mo lang" ngoo ri khyoid yu wa mho' yu" rhe".

²⁴ Nghoid bye:- ngoo ri jhau" shid ge'. Nga" yooboo joem ri toin" shed we'. Ngoo gi sam zoo: tam" jo, wigi nanu" dang: ri tam" gyoo: wa.

²⁵ Deing main da" dang: joem gi loem ge" da:. Nghoid loug we' nanu" ce: dang: kang: abo ziri tid nyid ago".

²⁶ Nanu" gi ngoo ri ci: ase' tid lho: lid za: moid nyid ga: myid jho: ago" Ciwim yoomo nga" nheigloem: thang da" dang: khoin" joem ri tu" byid: go" la"

²⁷ Nanu" gi coug" zoo: nu" rilang" join koid wa shid re" phid baid lho: Nanu" da" jhang thang bidnoem yi atho' moo jonu" yoo" sho' koid loo go" wa.

²⁸ Nga" myonhoo: ri zhug yu" ge'. Ngoo amhau' wa.

²⁹ Nanu" sung lid abye:. Atarha" ziri theing: too" loo ge'. Ngoo ri yooboo abyid: goo". Ngoo gi deungmain" nyid.

³⁰ Nghoid loug we' nanu" gi ngoo mhau' nyid ga: jho: ago". Nanu" gi ngoo ri jo ziyo' ajo ziri ayo" kho' tid ga: jho: ago".