YOBA 41 - Lacid Common Language Bible

¹ Nang gi Mainjung: ri wim: myhid nghui" yo' yo" myhid yu wa la" Anghoid lang" nya: da" yhoo: ri tei" wigi yo" tei" yu wa la".

² Nang gi nya: da" nhoo: moo nhoo shu' yo" cu' wa la". Anghoid lang" nya: da" amcam" ri langhui" yo" tab wa la".

³ Nyang: gi nyang: ri nhang: kaid wa shid re" nang ri mho' wa la". Nyang: gi nyang: ri nang wigi nheig khyeug yu wa shid re" nang ri mho' yoid wa la".

⁴ Nyang: gi nang yo' myid veing" khyoo: to" lho: nang ri khanham we' dei byid: wa ga: dangsoo" byid: wa la".

⁵ Nang gi re" dei zoo: myiyi: nu" yiri gau ei" nhang: wa shid re" yhoem: moo khu: to" da" ngho' nu" ri yhang: ti" nyang: ri tei" too" wa rhe".

⁶ Wimdo, kuang zoo: bang: gi nyang: ri gu tid khyo' goo" wa rhe". Phaga: byu yigi nyang: ri phyo' ung" goo" wa rhe".

⁷ Nang gi nya: da" shooyid ri wimdo, thau" lham: yo' yo" thau" phug wa la" Anghoid lang" nya: vhuloem ri wimdo, thau" lakya: yo' yo" goin kyang byid: wa la".

⁸ Nang gi nyang: ri dalheing: yo" zang" tain" thang: ri nang adoem nau tain" wa. Nang gi hau: zain: go" khyoo: ri khanham we' ato" myid loo wa.

⁹ Main: jung: ri myang su: hang" nghoid loug we' voem" myid byug lo" wigi myidjang khyoo: leung gyoo" lo" ago".

¹⁰ Nyang: ri nhau" to' kaid lang" nyang: gye" thain: re" da:. Nya: da" shidkhoin" moo hang" avoem" yab jo, nghoid da:.

¹¹ Nyang: ri khaid zain: wigi hang" yo" goem loem nyid wa la". Myid gung byu xangsu: hang" dayug we' hougsu" ayo" koid nghoid da:.

¹² Main: jung: da" khyid: joem khyoo: nang ri ngoo tid kyo" lho: nyang: khayhi' gyi: sheung: khyoo: yo' khayhi' yoem: bo khyoo: ri sho' kyoo" ba.

¹³ Nya: gung moo nghoeb to" da" akyab ri hang" ayo" shid pyam byid. Nyang: void ci: da" gyi byimi ri hang" ayo" thau" ceig" pyam nghoid da:.

¹⁴ Yu" gyoug tung" da" zei joem byeung" dab jo, da" nya: da" amcam" ri hang" yo" fo' nhang: wa la".

¹⁵ Nya: da" nungkhung: moo lug boem yhang: ti" thain: sho' xo' tei" to" da" goo joem ajen jen dab da:.

¹⁶ Hau: goo joem dakhyab yo' dakhyab agyoo: khyo" lid da jhi' lang" ayo" lid thu loo" loo sho' teing teing jid" jid" za: xo' tei" to" da:.

¹⁷ Hau: joem dangain" gi khanham we' ce: zi wigi we' ayo" phyo' sain" pyam loo sho' teing za: tei" zhoem: to" ago".

¹⁸ Nyang: haid ci: ci: kaid ri bidbang kyi: thu re" da:. Houg: lho: nya: myojid" joem gi thu shid" lo da" bid zhoo: yhang: ti" thoin" pang kaid da:.

¹⁹ Nya: da" nhoid khyo" myiyham: thu da:. Houg: lho: myi jhen" joem dang: thu re" da:.

²⁰ Oug" gyid" moo nge" nyid da" myo, joem mo myikhoug" yhang: ti" nya: da" nhoo: khyo" myikhoug" neing" thu re" da:.

²¹ Nya: da" so' gi myi: yhang: ti" nge" dab shid" kaid da:. Nya: da" nhoid khoug: mo myiyham: thu da:.

²² Nya: da" leung zeung: gi yoem: so' gye" gyi: wigi nyang: yo' shoug" bang: dangain" gyoug dain ago".

²³ Nya: da" shooyid moo yoem: neing: zi dakhyi' we' ajo,. hau: zigi joto' yhang: ti" thain: wigi ci: we' azug nghoid da:.

²⁴ Lug zeing su" thain: da" nya: nheigloem: gi ci: ri we' agyug nghoid da:. Hau: zigi lug lheing: yhang: ti" ci we' azug ko' ko' ga: gye" thain: da:.

²⁵ Nyang: to' yab loo lang" yoem: bo thang bang: lhang" gyoug dain ago". Nyangnu" sung gyoug yoomo zhung: ri anghoid yab ri anghoid bue" ago".

²⁶ Nyang: ri dam yo" tab wa shamcoin" ajo, nyang: ri yo" noo nhang: da" lham: toid- myoo:- lhamdung: ajo, nghoid da:.

²⁷ Nya: shid re" joto' gi khoofoo: yhang: ti" nu: da:. gyid: mid" gi seig phoem" yhang: ti" nham' da:.

²⁸ Nyang: ri yo" tang" phang: nhang: da" myoo: khaid ajo,. Nyang: ri du" gyoin: da" lugzeing joem gi khoofoo: khaid joem yo' du da:.

²⁹ Thung" keing: gi nya: shid re" khoofoo: danghoid da:. Houg: lho: byu joem lham: toid joem goin kaid ri nyang: yi da:.

³⁰ Nya: da" voem: doug: mo akyab joem gi asoo" tho' da" oug" jab yo' du ago". Hau: joem gi thoem" boeb boem" moo yoo phyi" yhang: ti" lang: khyeing" khyam" pyam da:.

³¹ Nyang: gi panglai: ri gyid lung zhu: yhang: ti" zhu: to' kaid da:. Houg: lho: xu: oug" yhang: ti" nyoeb thu nhang: da:.

³² Nyang: gi nya: thang: moo yi yi bue" da" khoo: ri duang nhang: kho' lho: Panglai: ri nyoeb phyu: bue" thu nhang: da:.

³³ Nyang: yo' yo" ki' wa zi myidgung tho' moo ci: anyid. nyang: gi gyoug ga: zi abo da" gougnyhoug dadu: nghoid da:.

³⁴ Nyang: gi nghoid boin: thang da" gougnyhoug joem rilang" yu" nge pyam da:. Nyang: gi siyoo gougnyhoug lam" dangain" da" khokham nghoid da:.