YOBA 23 - Lacid Common Language Bible

Yoba

^1-2 Ngoo gi Mangsoo ri goemlu to' thougtheung myeing" myo: nyid ashi". Ngoo noo kyeing" kyeing" ziri ayo" zeing: kham.

³ Nyang: ri khamoo: shoug" sho: myang wa ziri si' nau. Nyang: nyid joyoo moo khakhyo" yhe: ziri si' nau.

⁴ Ngoo gi nga" moo" ri nya: shidkhoin" moo phuid: sho' kyo" wigi Nga" shoid khyo" tid kyoo" nau gu: dangain" ri yo" tid kyoo" wa.

⁵ Nyang: khasu" tid wigi ngoo ri khasu" phug tid byid: wa ga ziri ngoo si' nau da:.

⁶ Mangsoo gi nya: yoem: so' dangain" yo' ngoo ri thougtheung nyid la". Anghoid nyang: gi ngoo tid dang: ri tam" gyoo: byid: loo wa.

⁷ Ngoo gi deungmain" da:. Ngoo gi Mangsoo yo' yo" doem goo' wa nghoid. Nyang: gi ngoo ri yooboo ayoo" ga: da lheing: dam bain sho' tid byid: wa.

⁸ Ngoo gi bidthu shoid khyoo: sho: yu" bye:. Nghoid loug we' Mangsoo gi hougmoo anyid. Ngoo bidvang shoid khyoo: sho: lo" uri nyang: ri ngoo amyang.

⁹ Mangsoo gi mougzhung: shoid yo' mougpyi: shoid moo moo" zei: lid loo bye:. Nghoid loug nyang: ri ngoo ashau" myang shi".

¹⁰ Nghoid loug we' Mangsoo gi ngoo so" yhe: da" khyid: byi khang" moo" ri se' da:. Nyang: ngoo ri joeb ca: yu" nghoid rigi ngoo gyeung" shang: ziri shau" myang wa.

¹¹ Ngoo gi nyang: khyen: da" khyoo: moo jhug zug tung" cang yhe: da:. Houg: lho: kha: shoid khyoo: we' aso" lam" loo.

¹² Ngoo gi Mangso amyeing" dang: ri khanham we' cang pyeing nyid. Ngoo gi nya: myid vho: khyoo: ri cang wigi ngoonya: myid vho: khyoo: ri acang.

¹³ Nyang: gi khanham we' myid athid. Nyang: ri hang" wigi we' ayo" ngeug thug. Nyang: koid nau khyoo: ri koid nyid ziri hang" ayo" toem.

¹⁴ Nyang: gi nya" shid re" ga: soin' to" ziri koid pyeing" loo wa. Hau: myid soin' to" da" zigi nya: jhang myoo" sho' jo, jang" mo daja: ja: nghoid da:.

¹⁵ Ngoo gi nya: shidkhoin" moo gyoug wigi nain" nyid.

^16-17 Myhang: thang Aseing gi nga" voem" myid ri phyo' shoin' pyam bye:. Moug coid wigi ngoo ri myo, jid nhang: rilang". Ngoo ri gyoug nhang: zigi moug coid wigi anghoid. Hau: zigi Mangsoo nghoid da:.