YOBA 2 - Lacid Common Language Bible

Yoba ri Satan Doem Jham" Yu" Khyoo:

¹ Mougkhung: moo nyid bang: gi Aseing jhang re" thu shug wa ayo, doem ju" loo lang" nyangnu" phung: gung moo Satan we' yhe: bo nyid nyid da:.

² Aseing gi nyang: ri «Nang khayoo: lhung nyid yen" la"» ga: myid. Satan gi «Ngoo gi hid: khyoo: thu: khyoo: so" yen" lho: mougmyid ri koem" nyid» ga: tid da:.

³ Aseing gi «Nga" dei zoo: Yoba ri shau" myang rhe" Mougmyid dang mo nyang: yhi' jhug zug wigi ge zi dayug we' anyid. Nyang: gi ngoo ri noku wigi akhyeing" ashoeb da" moo" daja: we' akoid loo sho' zid" nyid da:. Nyang: gi nyang: ri ce: sei: abo jang" moo phyo' shoin' wa shid re" ngoo ri jhu' phyo' nghoid loug we' Yoba gi goonham' mo yhang: ti" za: jhug dazug nyid ashi" da» ga: tid da:.

⁴ Satan gi «Byu dayug gi kangso' yo' dei nyid wa shid re" ja: khang" moo" ri too" kho' boem wa.

⁵ Houg: yoomo akhid" nang gi nya: gung ri dam tab rigi nyang: nang ri re" myo, shid ti: moo nyang: nheing" loo wa» ga: tid.

⁶ Houg: yoomo Aseing gi Satan ri «Nghoid bye:. Nyang: gi re" yoem: so' akhoug: moo nghoid da:. Nghoid loug we' nyang: ri nang age said pyam wa» ga: tid da:.

⁷ Hau: thang: Satan gi Aseing shidkhoin" mo thu lo" lho: Yoba da" gung dagung goin" moo byeing myug nhang: da:.

⁸ Yoba gi mhoid soid boem" nham moo yhe: zhung: jo, lho: oug" jab dajab wigi nya: gung ri khyeug nyid da:.

⁹ Nyang: yhoem: seing: myhi' gi nyang: ri «Nang gi goo" uri yhang: ti" za: dajhug zug nyid ashi" nghoid rhe". Ciwim yoomo Mangsoo ri nheing" wigi ashid: lo" la"» ga: tid.

¹⁰ Yoba gi «Nang ci: dang: kang: abo da" dang: ri tid nyid da:. Mangso wigi ngoonu" ri ge zi daja: ja: byid: uri ngoonu" lhoem: khab yu da:. Nyang: wigi yau: khi" bui" nhang: kaid ri ngoonu" khasu" yo" myeing" myoo: wa la"» ga:. Yoba gi nyang: yau: khi" shoug" kham zoo: nghoid loug we' Mangsoo ri thougtheung khyoo: daja: we' atid nghoid da:.

Yoba da" Byencang" yi Ju" Re" boem Khyoo:

¹¹ Yoba da" byencang" soem" yug gi Teman voomoo" mo Elipha- Shua moug: mo Bildad- yo' Nama moug: mo Zopha bang: nghoid ago". Yoba yau: khi" kha: yhi' kham zo: nyid ga: ziri nyangnu" shoug" gyoo: lang" nyangnu" nyang: ri nheig yhe: teing: wa ga: myid phyed ago".

¹² Nyangnu" gye" vi: shi" mo nyang: Yoba ri myang ago". Nghoid loug we' nyang: ri ase' yu" nghoid ago". Nyangnu" yo" yu" se' boem lang" koug da" khyo" nyangnu" da" byimi ri lang: ceig ziyo' nyangnu" vhuloem moo phei" lhoug: geig gyoin: wigi koug kyi: ngau kaid ago".

¹³ Nyang: khayhi' kyi" khyeug kham zo: nyid ziri shau" myang boem lang" nyangnu" gi ce: dang: dakhoin" we' atid loo nyhed nyid" nyhed myen nyang: yo' dage" yhe: zhung: jo, ago".