YOBA 19 - Lacid Common Language Bible

Yoba

^1-2 Ciwim yoomo nanu" gi ngoo ri dang: khoin" joem wigi shen" yhen nyid boem lha".

³ Alheing: lheing: nanu" gi ngoo ri aphoug" akhyoid cikoid lho: nanu" wigi ngoo ri anghoid akhuang coem' koid ziri ase' sho' nghoid ago".

⁴ Ngoo shoid moo" koid rilang" hau: zigi nanu" ri ci noo nhang: lha".

⁵ Nanu" gi nga" tho' je ge ga: myid jho: ago". Houg: lho: ngoo yau: khi" shoug" zigi nga" da" yooboo yoomo nghoid ga: jho: ago".

⁶ He: ziri koid su: gi Mangsoo nghoid ziri nanu" ashau" myang goo" rhe". Nyang: wigi she' ngoo ri myhi' wa shid re" lhid thung: to" da:.

⁷ Nya: da" athoug" akhyoug: moo" ri ngoo ngeug pyam nghoid loug we' hang" atam" gyoo: byid: nghoid ago". Tarha" khyoo: yo" yu wa shid re" ngoo nyho: nghoid loug we' hang" ashau" gyoo: nghoid ago".

⁸ Mangso wigi khyoo: jhid to" wigi ngoo ayo" lid thu loo". Nyang: gi nga" khyoo: moug: coid teing: no, nhang:.

⁹ Nyang: gi nga" jonu" dangain" ri yu pyam byid: abye:. Houg: lho: nga" myeing gyi: khyoo: ri phyo' shoin' pyam byid: bye:.

¹⁰ Nyang: gi ngoo ri shoid khang" moo" khyo" baid da:. Nyang: gi nga" myid byu khyoo: ri noid pyam byid: lho: ngoo ri yhau" shid: loo" nhang: da:.

¹¹ Mangsoo gi nheigloem: yoin wigi ngoo ri thougtheung nheig yo: da:. Nyang: gi ngoo ri nya: da" age thang da" gyivoo yhang: ti" koid da:.

¹² Nyang: gi ngoo ri khaid zain: wa shid re" gyidab dadab nhang: kaid. Nyangnu" gi kadug khyoo" du: wigi nga" zoem" ri du: lheing to" ago".

¹³ Mangsoo gi nga" mang: nhung" yi wigi ngoo ri she: pyam too" goo" wa khyo" koid da:. Ngoo gi ngoo ri si' bang: shid re" tungbau lami: bue" byug bye:.

¹⁴ Nga" bidnoem yi yo' byencang" yi byug byug bye:.

¹⁵ Nga" yhoem: moo being" voo khyo" nyid lid loo bang: gi ngoo ri to" myhid pyam abye:. Nga" dei zoo: myiyi: nu" yigi ngoo ri being" voo yhang: ti"- tungbau yhang: ti" jho: ago".

¹⁶ Nga" dei zoo: ri ngoo yoid kaid ri nyang" atu" byid: nghoid da:. Ngoo ri pang" yu wa shid re" mho' yoid rilang" atu" byid: nghoid da:.

¹⁷ Nga" yhoem: seing: myhi' gi nga" so' shoem: ri atho' kham: nghoid da:. Houg: lho: nga" mang: nhung" seing: yigi nga" nam khyoo: atab' ri" nghoid da:.

¹⁸ Zooshang: yigi ngoo ri aphoug" akhyoid koid lho: nyangnu" gi ngoo ri myang lang" yi ago".

¹⁹ Ngoo yo' zoem" thang byencang" yigi ngoo ri yu" co' tung" yu" da:. Ngoo jheddab thang da" bang: gi ngoo ri thougtheung pyam ago".

²⁰ Nga" shooyid joem gi nga" shooyoug: joem moo tei" lhang" jo, da:. Ngoo gi nga" kangso' yo' gung cen: loid loo bye:.

²¹ Nanu" gi nga" byencang" yi nghoid. Ngoo ri nheig khyeug yu ge'. Mangso da" lo, wigi ngoo ri baid lheing: kaid bye:.

²² Nanu" gi ciwim ngoo ri Mangso wigi shen" yhen yhang: ti" yhen' go" la". Nanu" ngoo ri coem' shen" yhen zi agi shi" goo" rhe".

²³ Nga" dang: khoin" joem ri dayug yug xoem" ci: lho: Mougsoug" pug moo lhid" xoem" too" yhoo: ein: lhung shau" myid.

²⁴ Anghoid lang" nga" dang: khoin" joem ri apyaid atoo: duang jo, sho' lugzeing moo lugzhen: yo' kyung" tab too" byid: yhoo: ein: shau" myid.

²⁵ Nghoid loug we' lo" thang moo ngoo ri goem loem byid: wa su: Mougkhung: moo nyid ziri ngoo se'

²⁶ Nga" shooyid ri noobau: wigi zo: pyam sho' nghoid loug we' He: gung du: dei nyid shi" uri Mangsoo ri ngoo shau" myang shi" wa.

²⁷ Ngoo gi nyang: ri nga" myo jid" wigi nyang: shau" myang wa. Houg: lho: nyang: gi tungbau lami: anghoid wa. Nanu" hid su" ga: tid yoomo ngoo yoem: shoin: bye:.

²⁸ «Nyang: ri ngoonu" khasu" yo" shen" yhen wa la" ga: tid wigi nanu" gi ngoo ri khaid zain: wa akhyoo" sho: nyid ago".

²⁹ Nghoid loug we' akhid" dang: phyed zi dayug nyid ein: ziri nanu" si' wa shid re" Yooboo adang moo Mangsoo nheig yo: zi bo da" sham: ga: da" Shamcoin" ri gyoug ge'.