YOBA 16 - Lacid Common Language Bible

Yoba

^1-2 Houg: yhang: ti" da" dang: khoin" joem ri shid phyang" ngoo shau" gyo: yu" bye:. Nanu" ngoo ri nheig teing byid: zigi ngoo ri shen" yhen zi za: danghoid da:.

³ Nanu" gi apyaid atoo: moo xo' ji nyid shi" wa la" Nanu" gi khanham nghoid loug dang: thang: yo" said wa la".

⁴ Nang nga" joyoo moo nyid wigi ngoo re" joyoo moo nyid nghoid rigi Nang tid nyid dang: ngoo dangain" yo" tid wa. Ngoo gi phajhi" boo boo za: nga" vhu" pyi: pyi: lho: nang ri dang: khoin" joem wigi yo" tid zeig pyam wa.

⁵ Ngoo gi nang ri phajhi" byid: dang: wigi nang ri yoem: boo nhang: wa. Houg: lho: nang ri yoem: byid: dang: yo" tid wa.

⁶ Nghoid loug we' ngoo ci: ayo" pang" tid Houg: lho: sam: zoo: tam" jo, ri we' nga" dam khe" no zi yo loo" wa zi anghoid.

⁷ Mangsoo we"- nang gi ngoo ri jhoid za: shang: pyam byid: bye:. Nang gi nga" yhoem: byu yiri said pyam nhang: bye:.

⁸ Nang gi ngoo ri myheig yu bye:. Nang gi nga" gyivoo nghoid da:. Ngoo gi shooyoug: moo shooyid za: dalhoem" lo. Houg: lho: byu yigi nga" yooboo wigi hougsu" bue" ga: jho: ago".

⁹ Mangsoo nheig yo: wigi ngoo ri agang gang lang: khyam" pyam bye:. Nyang: gi ngoo ri ngheing" ziyo' zhug yu" nyid da:.

¹⁰ Byu yigi ngoo ri yu" juang" ago". Nyangnu" gi ngoo ri lheing khoem to" wigi nga" myonhoo: ri pyug ago".

¹¹ Mangsoo gi ngoo ri akhyeing" bang: da" lo, khyoo: kaid pyam bye:.

¹² Ngoo gi yug yo myenjham" tung" nyid lid loo nghoid loug we' Mangsoo gi ngoo ri khyung" kang: moo myheig wigi Baid lho: mhoin' pyam bye:. Mangsoo gi ngoo ri thang" thi: tu wa shid re" ci: da:.

¹³ Myoo: joem wigi ngoo ri shoid khang" moo" khyo" beig da:. Hau: myoo: joem ngoo ri zang" wigi dam dab nghoid loug we' Nyang: gi nheig khyeug myid lang" aci: shug byid: nghoid da:.

¹⁴ Nyang: gi ngoo ri dam doem tab tab koid nyid da:. Nyang: gi ngheing" da" nheigloem: byeung" jo, da" gyizoo: dayug yhang: ti" khaid zain: da:.

¹⁵ Ngoo gi koug ngau wigi jid: moo" byimi coeb ci: wigi he: pheilhoug: boem" moo asoem" byid: zhung: jo, bye:.

¹⁶ Ngoo gi nga" myonhoo: byang: byang: ni sho' ngoug bye:. Nga" myojid" gi yam: wigi myo, koem' youg: me: byug bye:.

¹⁷ Nghoid loug we' ngoo gi athoug" akhyoug: yooboo moo" ci: akoid. Houg: lho: Mangsoo ri ngoo akyu" mho' da" dang: gi gyeung" shang: da:.

¹⁸ O" mougmyid we"- ngoo ri koid da" shoid moo" ri ashung: too". tarha" deungmain" zi yo" yu wa shid re" ngoo mho' yoid thui: ri atam" loo" nhang:›

¹⁹ Nga" thang: dab wigi nga" shoid yab byid: wa mougkhung: moo dayug nyid da:.

²⁰ Nga" byencang" yigi ngoo ri juang" ago". Nga" myojid" mo ngoug byid joem gi Mangso jhang khyoo: foid shoin" kaid bye:.

²¹ Byu dayug gi bidnoem dayug shid re" bo pang" mho' yoid byid: yhang: ti" Nga" shid re" Mangso jhang bo pang" mho' yoid byid: wa byu dayug vho: nyid.

²² Akhid" nga" zain nyid joem lid lo" nyid bye:. Houg: lho: ngoo gi adoem yo" tau" lo da" khyoo: moo so" nyid.