YOBA 15 - Lacid Common Language Bible

Eig Lheing: ein: Lheing: Dang: Doem go" Khyoo: Elipha

^1-2 Yoba we"- dang: koem: dang: myid danghoid. Dang: koem: dang: myid danghoid.

³ Phajhi" boo su: hang" dayug we' nang yhang: ti" dang: ayo" tid. Anghoid lang" houg yhang: te" da" dang: kang: abo dang: joem wigi nyang: nya: gung ri hang" goem loem yu.

⁴ Nang gi nanya: khyoo: khyo" lo" ri Mangsoo ri hang" agyug phoug" goo" wa. Nyang: ri hang" akyu" amho' goo" wa.

⁵ Nang tid jang" moo re" da" akhyeing" khyoo: gi di: di: myang thu jo, da:. Nang gi nhoid yung" dang: khoin" joem yo' nghoeb pyam wa soin' nyid da:.

⁶ Ngo wigi nang ri yooboo zhug aca" nghoid da:. Nanyang: tid da" dang khoin" khang" moo" wigi nanyang: dang: phyed yu abye:.

⁷ Nang gi xang: shi" khu: shid" da" byu nghoid ein: myid jho: rhe" Mangso wigi boem joem ri phain" to" uri nang houg: moo nyid la".

⁸ Mangsoo koid wa soin' to" khyoo: ri nang bo shau" gyo: rhe". Xangsu: byu da" phajhi" gi nang za: yo" rhe".

⁹ Ngoonu" ase' ziri nang wigi se' ga: zi daja: we' ajo,.

¹⁰ Ngoonu" gi re" phoo lang" akhu: shi" ri khu: bye: da" phoug" mang: xam: phyu: bang: mo phajhi" jhau" yu zi nghoid.

¹¹ Mangsoo gi nang ri yug yoo tung" nyid wa akhang" byid: too" bye:. Nang ciwim ngeug he: nyid ashi". Ngoonu" gi nyang: yo' dang: nu" dang: nham' za: tid bye:.

¹² Nghoid loug we' nang gi nheigloem: zhu: wigi ngoonu" ri nheig yo ziyo' zhug yu" da:.

¹³ Nang gi Mangsoo ri nheig yo: wigi nyang: ri yooboo zhug dang: tid da:.

¹⁴ Byu xangsu: dayug gi gyeing" nyang: yo" gyeung" shang: wa la". Byu dayug gi Mangsoo yo' yi" wa la"

¹⁵ Mangsoo gi ciwim wigi nya: moug: lagyoo: yiri lang" aloem lha". Nyangnu" lang" nya: myo, jang moo atho' gyeung" shang: nghoid da:.

¹⁶ Houg: lho: ngoonu" gi akhyeing" ziri gyid yhang: ti" shug nyid da:. Nghoid- byu gi byo, yoin" da:. Byu gi ce: aphoug" nyang: adab nghoid da:.

¹⁷ Yoba we"- akhid" ngoo se' ziri tam" gyoo: we'.

¹⁸ Phajhi" boo bang: wigi ngoo ri nyangnu" phoug" phyid" yi mo jhau" yu da" deingmain" khyoo: ri jhau" byid: abye: go". Houg: lho: nyangnu" ci ri we' anghoeb shoung: too" nghoid da:.

¹⁹ Nyangnu" da" mougmyid moo tungbau byu yi anyid nghoid ago". Nyangnu" ri Mangsoo mo vi: khyoo: shu" phang: loo" wa byu anyid.

²⁰ Subi" gootu: yiri doem zeug zo: da" akhyeing" su: gi Nyang: dei nyid gu: moo kyi" khyeug kham zo: nyid wa.

²¹ Gyug dain wigi nyhoo: thui: joem gi nya: nukhyab moo shoug" gyoo: wa. Houg: lho: nyang: gau: gau: nyid ga: myid loem nyid uri khyangtoug: joem wigi nyang: ri khaid zain: wa.

²² Nyang: gi moug: coid mo phang: loid wa khyoo: ayoo" nghoid da:. Ciwim ga: ri nyang: ri said pyam wa shid re" dajo, yoo yoo moo shamcoin" lang" nyid.

²³ Langda joem gi nyangnu" da" manggung joem ri zoo: wa ga: lang" nyid. Nyangnu" da" ju" loo wa ayo, gi moug: coid coid jo, ziri nyangnu" se'.

²⁴ Kyi" khyeug zigi yoem: so' gyi: da" khokham yhang: ti" Nyangnu" ri khaid zain: wa ga: lang" nyid boem.

²⁵ Hau: zigi Mangsoo ri lo, zhoeb ci: shug lho: Myhang: thang su ri aphoug" akhyoid koid bang: da" vhu" pi: lo, kyo" nghoid.

^26-27 Nyangnu" gi nghoid boin: wigi goemlu too' wa myid bo da:. Nyangnu" gi nheigloem: thain: thain: nyangnu" goo ri zei: ci: wigi Mangsoo ri khaid zain: wa yoem phain" tang" yhe: ago".

²⁸ Hau: bang: gi voomoo" joem ri lhoid seing: yu lho: Voobyu yiri khaid sain" pyam wigi yhoem: joem ri seing: pyam bang: nghoid. Nghoid loug we' gyipui" gi hau: voomoo" joem yo' yhoem: joem ri phyo' shoin' pyam wa.

²⁹ Nyangnu" gi myang" sho' yoo" zoo: yoo" shug wa zi anghoid. Nyangnu" seing: to" zi ci: we' myang" sho' deing jo, wa zi anghoid. Nyangnu" da" bid shoem: lang" gi myang" sho' adeing jo, wa.

³⁰ Houg: lho: nyang: gi moug: coid mo ayo" phang: loid wa. Nyangnu" gi myi: wigi seig kung: joem ri nge" pyam byid: da" seiggam joem Aboo" joem ri lid wigi vi: khyoo: moid tang" pyam byid: da" seiggam joem yo' du da:.

³¹ Nyangnu" gi akhyeing" ziri loem khoug: sho' ko" nghoid rigi hau: akhyeing" zigi nyangnu" da" aphoug" jhungshug nghoid wa.

³² Nyangnu" gi nyangnu" da" ayo, aju" shi" ri nyau" shoem: byug wa. Seig kung dakung: yhang: ti" yhau" shoem: byug lho: khanham we' adoem nyoug loo wa.

³³ Nyangnu" gi ashi" ayang" shi" ri shu: gyo" byug da" zabyid nei yhang: ti" Aboo" joem shu: gyo" byug da" zhainloin: gam yhang: ti" nghoid wa.

³⁴ Mangsoo ri ase' bang: gi amyed ashen ayoo" wa. Houg: lho: khougvhoid ngei wigi zhug to" da" yhoem: joem ri myi: wigi nghe' pyam wa.

³⁵ Yau: khi" ri kyam: to" wigi akhyeing" moo" ri koid nyid da" byu dayham" nyid ago" Nyangnu" da" nheigloem: moo khanham we' mhoug fain" zi byeung" jo, ago".