YOBA 13 - Lacid Common Language Bible

^1-2 Nang tid zi ja: khang" moo" ri shid phyang" ngoo gyo: yu" bye:. Hau: dangain" ri ngoo se' gyoo: bye:. Nang se' gu gi ngoo we' se'. Ngoo gi re" tho' anyhoem:.

³ Nghoid loug we ngoo gi Mangsoo yo' ngeig nyid zi nghoid- nang yo' anghoid. Ngoo gi nga" moo" ri nyang: yo' she' da ngeug nau.

⁴ Nang gi nang ase' ziri mhau' da" dang: yo' shoem" boem" pyam da:. Nang gi hang" ri we' ayo" byang" ge da" macid" sara: yo' du da:.

⁵ Ci: atid loo: nyid we' houg: lang" dayug yug wigi nang ri phajhi" boo nhung: ga: jhoo: goo" wa.

⁶ Nga" moo" ri tid nyid uri tam" gyo: yu" shi" we'.

⁷ Nang ciwim mhau' nyid la". Nang mhau' tid da" dang: joem gi Mangsoo ri akyu" byid: wa ein: jho: rhe".

⁸ Nang gi nyang: ri khoem' wa ein: soin' nyid rhe". Nang gi nya: moo" ri tarha" yung" moo tid ngeug wa rhe".

⁹ Mangso wigi nang ri tab tab mo zhug yu" nghoid rigi nyang: gi ge zi daja: ja: shau" myang wa la". Nang gi byu yiri yo" mhau' fain" loug we' Mangsoo ri yo" mhau' fain" wa ti" myid jho: rhe".

¹⁰ Re" ung: khoug: moo yooboo xoem" shoung: ci: nghoid loug we' Nyang: gi nang ri nheig yo: jhau" loo wa.

¹¹ Houg: lho: nya: da" yoem: so' gi nang ri gyoug dain zi byeung" nhang: loo wa.

¹² Re" dang: zhoem' joem gi myimoeb yhang: ti" ce: akyu" aboo nghoid da:. Nang tid ngeug zigi myidzhoo" yhang: ti" nham' loo" wa.

¹³ Sam: zoo: tam" to" wigi ngoo ri dang: tid wa akhang" byid: we'. Houg: lho: nyangnu" bue" ziri bui" nhang: we'.

¹⁴ Ngoo gi nga" kangso' ri ab pyam wa jen" nyid bye:.

¹⁵ Ngoo gi nga" myid byu khyoo: dangain" ri ci: phyug pyam bye:. Hougsu" yoomo Mangso wigi ngoo ri said pyam nghoid rigi ciwim wa la". Ngoo gi nga" moo" ri nyang: jhang yhe: tid kyoo" wa.

¹⁶ Nga" voem" da" myid wigi lang" ngoo ri yo" khyoid yu abe. Ciwim gari akhyeing" da" byu hang" we' Mangso jhang avoem" yhe: shoug" nghoid da:.

¹⁷ Akhid" ngoo phuid: kyo" da" dang: ri tam" gyoo: we'.

¹⁸ Ngoo gi nga" moo" zoo" ri tid kyoo" wa jen" jen" nghoid bye:.

¹⁹ Mangsoo we"- nang gi ngoo ri yooboo zhug wa la". Nang yooboo zhug nghoid ri ngoo gi sam: zoo: tam" to" lho: shid: loo" wa jen" jen" nghoid bye:.

²⁰ Ngoo eig ja: mho' wa. Hau: gu: ri myid veing" byid: la. Houg: lang" ngoo gi nang mo aphang: gau" yen" wa.

²¹ Ngoo ri yooboo dam byid: zi theing: pyam lho: ngoo ri gyoug dain ziyo' akhyoeb mhoin pyam.

²² O" Mangsoo we"- nang shi" dang: ji yu" we' ngoo phug tid wa. Anghoid lang" ngoo shi" dang: ji wa nang phug tid we'.

²³ Nga" yooboo joem gi ci: nghoid la". Ngoo ci shoid lid loo bye: la" Ngoo ri ce: yau moo" moo yooboo zhug la".

²⁴ Nang ciwim ngoo ri jang" pyam la". Nang gi ciwim ngoo ri gyivoo dayug yhang: ti" koid la".

²⁵ Nang gi ngoo ri kyug nhain' wa soin' nyid la". Ngoo gi ci anghoid- seig fu' dafu' za: danghoid. Nang gi khoofoo: dakhaid ri kyeing" khaid zain: nyid da:.

²⁶ Nang gi ngoo ngi shi" uri koid da" moo" shid re" Ngoo ri kyid: kyid: kho" da" khyo" yooboo zhug da:.

²⁷ Nang gi nga" khyid: moo jangcoo" foid to" da:. Nang gi ngoo ce" lo da" khyid: byi khang" moo" ri zung" yu" nyid da:. Houg: lho: nga" khyid: khoo" joem ri joeb ca: yu" da:.

²⁸ Hau: bue" da" gang mo ngoo gi seig yoem: yhang: ti" boeb lo" wigi nhoug: wigi zo: mhoin' pyam da" adang byi: yhang: ti" moin" loo" wa.