YOBA 12 - Lacid Common Language Bible

Yoba

^1-2 Nghoid bye:- nanu" gi byu yi da" thui: nghoid da:. Nanu" shid: lo" uri phajhi" we' nanu" yo' dage" bo shid: loo" wa.

³ Nghoid loug we' nang yhi za: gi ngoo we' se' myid yu" Ngoo gi khakhaid khyo" nghoid loug we' nanu" vhoo: moo anyhoem: gyoo" Nanu" tid zi dangain" ri yugkhang" moo" se' ago".

⁴ Akhid" nga" byencang" yi lang" ngoo ri yi juang" pyam ago". Ngoo gi deungmain" ziyo' yooboo foin: khyoo: ci: ajo, nghoid loug we' nyangnu" ngoo ri yi juang" pyam da:. Nghoid loug we' nga" akyu" mho' thui: joem ri Mangsoo tu" byid: da" ayo, ju" da:.

⁵ Nanu" gi yau: khi" ci: ashu" yoomo ngoo ri juang" yi pyam ago". Nanu" gi leung lo" nyid su: ri coem' doin: lheing: ago".

⁶ Nghoid loug we' khau" foeb yi yo' Mangsoo aboo bang: gi Nyangnu" nya: yoem: gi nyangnu" nya: yu phara" nghoid loug we' yug yoo thung" yo" nyid da:.

⁷ Ngho' joem yo' gougnyhoug joem lang" nang ri jhau" shid wa khyoo: gye" yo" ago".

⁸ Mougmyid yo' panglai: mo dei noem joem mo nyangnu" da" phajhi" myid: yu we'.

⁹ Nyangnu" dangain" gi Aseing wigi phain" so: to" ziri se' da:.

¹⁰ Mangsoo gi nyang: phain" so: to" da" dei noem joem ri khyoo: shid su: nghoid. Byu yugkhang" mo" da" kangso' gi nya: yoem: so' khoug: moo bo jo, da:.

¹¹ Nghoid loug we' nanu" da" yhoo: gi ngham" da" main ri vho: yhang: ti" nanu" nu khyab we' dang: pyoo: ri gyo: nyid nau da:.

^12-13 Phoug" mang: yigi phajhi" bo da:. Nghoid loug we' Mangsoo gi phajhi" yo' yoem: so' bo da:. Phoug" mang: yigi jhab' jid" co' yo" se' myang. Mangsoo gi jhab' jid" co' yo" se' myang ziyo' koid bui" wa yoem: so' bo da:.

¹⁴ Mangso wigi phyo' soin' pyam ziri hang" doem yo" zhug too" wa la". Houg: lho: Mangso wigi myheig lhung to" zi shoug" su: ri hang" yo" lhoid pyoin' kaid wa la".

¹⁵ Mangso wigi moug: gyid ri toem' ci: lang" myidgung kyug hei' lo" da:. Nyang: wigi gyid phang thu kaid lang" gyid je: re" da:.

¹⁶ Mangsoo gi yoem: bo lho: khanham we' oung: doid da:. Mhau' fain" shoug" su: yo' mhau' fain" su: eig yug goin" Mangso yoem: so' khoug: moo nghoid ago".

¹⁷ Nyang: gi mung" vhoeb zoug: yi da" phajhi" ri yu pyam byid: da:. Houg: lho: vhujhung: yiri koodoug: joem yhang: ti" koid yen" nhang: da:.

¹⁸ Nyang: gi khokham yiri aya: khyo' pyam wigi thung: byu bui" nhang: pyam da:.

¹⁹ Nyang: gi khainjung yi yo' yoem: so' gyi: bang: ri doin: khyo' pyam da:.

²⁰ Nyang: gi sube" wigi myid loem to" da" bang: ri sam: za: tam" loo" nhang: wa. Houg: lho: phoug" mang: yi da" phajhi" ri yu pyam byid: wa.

²¹ Nyang: gi yoem: so' yo" too" bang: ri ngi: yoem" nhang: wa. Mung" vhoeb zoug: yi da" yoem: ri thang lo" byug nhang: wa.

²² Nyang: gi shid: te" da" moug: coid khoug: khyoo: bidbang ri nhang: kaid da:.

²³ Nyang: gi byumyu" mungdain: yiri yoem boo nhang: wigi gyi: sheung: nhang: da:. Nghoid loug we' thang: ri nyangnu" ri soem" nhang: wigi phyo' shoin' pyam da:.

²⁴ Nyang: gi nyangnu" da" vhujhung: yiri koodoug: bui" nhang: da:. Houg: lho: nyangnu" ri anhung akhoid bui" nhang: lho: du: dam: loo" nhang: da:.

²⁵ Nyangnu" gi moug: coid khoug: moo soeb dam: yen" lho: yhid: yed bang: yhang: ti" leung baid yen" ago".