YOBA 11 - Lacid Common Language Bible

Zopha

^1-2 He: dang: kang: abo ziri hang" aphug tid goo" wa la". Houg: yhi' dang: myo: sho' tid zigi byu dayug ri jo ein: yo" tid rhe".

³ Yoba we"- nang ri ngoonu" ayo" phug tid ein: jho: rhe". Re" juang" dang: wigi ngoonu" ri aji nhang: loo yo" koid wa la".

⁴ Nang tid zi jo ga: nang phau: da:. Nang gi Mangso: myo, jang moo deingmain" ga: nang phau: tid da:.

⁵ Mangso wigi nang ri phug tid byid: yoo: ein: ngoo lhung myid vho:.

⁶ Nyang: gi nang ri phajhi" aja: ja: jo, ziri tid kyoo" wa. Xangsu: byu yi shid re" sung no, da" khyoo: joem jo, da:. Mangsoo gi nang ri nang loem zoo: wa moin: yi" da" tho' je neing: khyo" yooboo dam byid: nyid da:.

⁷ Mangso da" gyi: sheung: khyoo: yo' yoem: so' tu' ke' to" ziyo' kyoo" doem: ri nang yo" sho: myang byid: wa la.

⁸ Mougkhung: gi Mangso shid re" thang ga: zi ajo, nghoid da:. Nghoid loug we' hau: zigi nang atho' myhi: da" joyoo moo jo, da:. Mangsoo gi moovo moug: ri se' da:. Nghoid loug we' nang gi hau: ziri asi' nghoid da:.

⁹ Mangso da" gyi sheing: khyoo: gi myidgung tho' je gyi: da:. Panglai: tho' je lam: da:.

¹⁰ Mangsoo gi nang ri myheig yu wigi tarha" yung" moo tid go" ri nyang: ri toem' pyam wa hang" nyid la.

¹¹ Mangsoo gi khayug phau" adab ziri se' da:. Nyang: ri nyangnu" da" akhyeing" da" lo, moo" dangain" ri myang da:.

¹² Loo zei: lam" joem ri mi" sho' yo" khu: loo lang" she Nheig agyeing: bang: phajhi" bo shid" re" da:.

¹³ Yoba we"- re" nheigloem: ri nyheing lho: Mangsoo jhang tain" yhi: we'.

¹⁴ Re" yhoem: mo akhyeing" ziyo' shoid ziri yu pyam we'.

¹⁵ Hau: thang: nheigloem: teing teing koid lho: voem" da" myid yo' mougmyid doem lheing: yu" we'.

¹⁶ Houg: lang" re" yau: khi" joem dangain" gi Youg lid lo" lho: amyid boin: lo: da" gyid je gyung: yhang: ti" re" vhu" nug mo shoem: bei: lo" byug wa.

¹⁷ Re" apyaid gi bid gungtu: da" ayo, moo zho: da" bid tho' je bang wa. Houg: lho: kangso' gyung: khyoo: da" moug: coid thang ayo, gi nab soin: moug: boo" zoo" yhang: ti" bo" loo wa.

¹⁸ Nang gi goem loem ziyo' myid byu jang: byeung" sho' yo' dei nyid wa. Mangsoo gi nang ri lhoug zung" byid: wigi doug yo" no: yu wa.

¹⁹ Nang gi re" gyivoo joem ri agyug ca". Byu myoo" sho' bang: gi pang" thoug yu wa shid re" nang ri re" mho' boem wa.

²⁰ Nghoid loug we' akhyeing" bang: gi nheigloem: thang ziyo' yu" yen" loug phang: loid wa khyoo: ashau" myang nghoid ago". Nyangnu" da" myid byu jang: daloem: gi shid: wa khyoo: za: nghoid da:.