YEREMIA 6 - Lacid Common Language Bible

Yerusalem ri Gyivoo yi wigi Lheing Khoem' To" da" Khyoo:

¹ Benyamin byumyu" yi we"- goem loem khyoo: yo" yu wa shid re" tang" phang: we'. Yerusalem mo phang: loid loo" ge'. Tekoa moo laboo" moid wigi Bed Hakherem moo: myi: moid lho: asoo" byid: ge'. Byo, yoin" ziyo' phyo' shoin' zigi mougzhung: shoid khyo" gyoo" lo nyid abye:.

² Ziun voomoo" gi young" da:. Nghoid loug we' hau: ziri phyo' shoin' pyam loo goo" wa.

³ Khokham yigi nyangnu" gyidab joem yo' hau: joyoo moo dab koid nyid loo goo" wa. Nyangnu" gi voomoo" lheing khoem moo nyangnu" zung joem ri koid wigi nyang: yug nyang: nau khyi' moo theing: boem goo" wa.

⁴ Nyangnu" tid zigi «Yerusalem ri khaid zain: wa shid re" soin' ci: ge'. jen" jen" koid ge' bid gung tu: ri ngoonu" khaid zain: wa» ga: tid ago". Nghoid loug we' hau: thang: nyangnu" gi «Bid gyoem bye:- akhid" nyid" gu: atham: lid: byug bye:- myen" thang: zoo" ri bidvang jham" lo" nyid bye:.

⁵ Ngoonu" gi myen" ayo, ri dakhaid zain: loo wa voomoo" gyi pyuzung ri phyo' shoin' pyam wa» ga: tid loo wa.

⁶ Myhang: thang Aseing gi he: khokham joem ri seiggam joem thug pyam lho: Yerusalem ri vang: wa shid re" myid boem" joem du: boem" nhang: too" bye:. Nyang: tid zigi «He: voomoo" moo doin: zeig zo: zi soung byeung" jo, bye: yoomo hau: ziri ngoo yooboo dam byid: wa.

⁷ Gyid thung" gi ngham" da" gyid gyeing: ri thu' loo nhang: yhang: ti" Yerusalem we' nya: da" akhyeing" ziri thu' loo nhang: da:. Ngoo gi voomoo" khoug: moo pyijoem: sho: khaid said ziyo' phyo, shoin' moo" ri shau" gyo: da:. Noophyoo" yo' dam dab ziza: ngoo shau" myang da:.

⁸ Yerusalem voobyu yi we"- he: yau: khi" joem gi nanu" shid re" tid poin" zi nghoid baja". Hougsu" anghoid lang" nanu" ri ngoo she: pyam loo wa. Ngoo gi nanu" voomoo" ri byu hang" we' anyid da" joyoo dain" pyoid yoo bui" nhang: wa.

Goemlu To' da" Israela

⁹ Myhang: thang Aseing ngoo ri «Israela gi zabyid shi" dangain" phyo' yu pyam bye: zabyid yoo yo' dayhang: ti" phyo' shang: pyam wa. Houg: lho: ayo, yoo" shi" uri nang gi yugkhang" moo" ri khyoid khyu: yu ca" da» ga: tid.

¹⁰ Ngoo gi «Nyangnu" ri ngoo dang: wigi tid poin" ziri hang" se' tam" gyoo: goo" wa lug la". Nyangnu" gi nheigloem: thain: wigi re" mungdang: ri tam" gyoo: wa shid re" he: pyam da:. Nyangnu" gi nang ngoo ri tid nhang: khyoo: ri yi juang" pyam byid: ago".

¹¹ Nyangnu" ri nang nheig yo: zigi nga" gung khoo: moo we' nge" lung" jo, da:. Aseing we" hau: ziri ngoo ayo" zeing: ci: loo: nghoid kyi» ein: tid bye:. Houg: lang" Aseing gi ngoo ri «Nga" nheig yo: zigi fu" moo" khyoo: mo zooshang: yi adang khyoo: foid shoin" kaid wa. Houg: lho: zoolu: yi phung: moo foid shoin" kaid wa. Yhoem: seing: phoo yi yo' yhoem: seing: myhi' yiri we' shu" lo" boem wa. Houg: lho: gye" mang: byug bye: bang: rilang" teing too" byid: wa zi anghoid.

¹² Nyangnu" da" yhoem: joem ri goobang: ri byid: pyam goo" wa. Houg yo' dayhang: ti" nyangnu" da" mougmyid yo' yhoem: seing: myhi' joem ri byid: pyam zi shoug" loo goo" wa. Ngoo gi he: mougmyid mo byu yiri yooboo dam byid: loo: wa.

¹³ Byu gyi: zoo: nge zoo: yugkhang" moo" gi ngei ri adeingmain" da" khyo" sho: yu wa soin' ago". Lapi: yi yo' khainjung yi lang" mung byu yiri mhoug zo: ago".

¹⁴ Nyangnu" gi nya: byumyu" yi dam joid ri shoo" yoem" yid" zi za: danghoid yhang: ti" koid boem. Dangain" age ziri nyangnu" gi ‹Dangain" ge› ga: tid.

¹⁵ Nyangnu" he: aco' ajhoid moo" joem ri koid wigi sho' boem go" rhe". Asho'- nyangnu" dajhi' we' asho' nghoid ago". Nyangnu" gi myonhoo: lang" abyo, nghoid da:. Houg: lho: ngoo yooboo dam byid: uri goo" yug leung gyoo" lo" yhang: ti" nyangnu" we' leung gyoo" loo" wa. Hau: zigi nyangnu" da" lo" thang ayo, nghoid wa. Ngoo Aseing tid bye:.

Israela gi Aseing Khyoo: ri Ngeug He: Pyam Khyoo:

¹⁶ Aseing gi nya: byumyu" yiri «Khyoo: kang" moo yab jo, wigi yu" kaid we'. Goonham' mo khyoo: ri myid: yu" wigi khyoo: khakhaid je ge thang ziri myid: yu" we'. Hau: khyoo: khyo" soo" ge' houg: lang" nanu" gi yug yo myenjham" ziyo yo" nyid goo" wa» ga: tid da:. Nghoid loug we' nyangnu" gi «Anghoid- ngoonu" asoo"» ga: tid boem.

¹⁷ Hau: thang: Aseing gi laboo" wigi tid poin" da" thui: ri tam" gyoo: wa shid re" lhoug zung" byu yiri khyen: nyid: to" da:. Nghoid loug we' nyangnu" gi «Ngoonu" atam" gyoo wa» ga: tid ago".

¹⁸ Houg: yoomo Aseing tid zigi «Byumyu" yi we"- tam" gyoo: ge'. Houg: lho: nga" byumyu" yi moo ci bue" loo wa ziri yu" yu" ge'.

¹⁹ Mougmyid we" tam" gyoo: we'. Nyangnu" myid soin' khyoo: yoomo yooboo dam byid: da" khyo" wigi he: byumyu" yiri byo, yoin nhang: wa. Ciwim gari nyangnu" gi nga" jhau" shed ziri ngeug he: pyam lho: nga" mungdang: joem ri acang nghoid ago".

²⁰ Nyangnu" Sheba mo zi nga" jang" moo ci: ri" byid: da" nam pyo: xu: joem ri ngoo cishu: nhang: byid: la". Moug: vi: mo ci: loo byid: da" xoin" phei" joem ri ngoo cishu: nhang: byid: la". Ngoo gi nyangnu" jhungshug xoin" ri akham: yu byid: wa. Nyangnu" xoin" joem ri we' alhoem: ngei" byid: wa.

²¹ Hau: thang: ngoo gi he: byumyu" yiri khyid: vhu" thung" wigi leung baid nhang: wa. Myhi' phoo yi yo' zooshang: yi shid: wa. Bid noem yi yo' yhoem: kyoo" cang" yi shid: wa.

Mougzhung: Khyo" Jhen" Vang Lo Khyoo:

²² Aseing tid zigi «Mougzhung: shoid mungdain: daloem: mo byu yi re" lo nyid ago". Moug: vi: mo yoem: so' gyi: da" byumyu" damyu" gi gyi soin' nyid boem.

²³ Nyangnu" gi lid: joem yo' shamcoin" joem ri koid ci abye:. Nyangnu" gi akhyi" akhyoid ziyo' nheig ase' khyeug bang: nghoid da:. Nyangnu" gi myang: jui: ri myeing nyid da" panglai: yhang: ti" thui: thu boem. Nyangnu" gi Yerusalem ri gyi khaid wa shid re" jen" jen" soin' ci: abye: go"» ga: tid.

²⁴ «Ngoonu" gi lu dang: shoug" gyoo: bye:» ga: Yerusalem voobyu yi tid ago". Hau: thang: «Ngoonu" lo, joem gi gyau: byug bye:. Ngoonu" gi zoo: khu: no da" myiyi: dayug yhang: ti" no khe" ziyo' byeung" jo, da:.

²⁵ Ngoonu" gi siyoo khyoo: avoem" yhi:- fu" moo" khyoo: moo avoem" soo"- Ciwim gari ngoonu" da" gyivoo joem gi gyi jonu" ci: wigi ngoonu" da" aqei: ayam moo yu" gyoug tung" nyid boem da» ga: tid nyid boem.

²⁶ Aseing gi nya: byumyu" yiri «Jid: moo" byimi void wigi myiyab boem" moo lu: leung nyid ge'. Yuggi zoo: zooti" zoo: shid: re koug ngau yhang: ti" ngougbyid ngougnhab yo' koug ngau ge'. Ciwim gari nanu" ri phyo' shoin' pyam wa su: gi nyeigdain tung" re" khaid zain: loo wa.

²⁷ Yeremia we"- to' joem ri nang joeb ca: yu" yhang: ti" nga" byumyu" yiri we' joeb ca: yu" wa. Houg: lho: nyangnu" khayhang ti" bang: nghoid boem ziri yu" yu" we'.

²⁸ Nyangnu" dangain" bang: gi gyid: mid" yo' joto' yhang: ti" nheigloem: thain: goemlu too' bang: nghoid. Nyangnu" dangain" bang: nheigloem: agi wigi sube" gei sang: lheing: yen" bang: nghoid.

²⁹ Khyoem moo" myi: khayhi'" dab nyid nghoid loug we' to' khyid" ange" youg- shang we' ashang gyoo" nghoid da:. Nga" byumyu" yi we' yhe: shang: kyeing loug ce: akyu" aboo- ciwim gari hau: akhyeing" ashoeb bang: ri ayu pyam yoomo nghoid da:.

³⁰ Nyangnu" ri ce: akyu" abo da" to' khyid" paid ga: myheing pyam loo goo" wa. Ciwim gari:- ngoo Aseing gi nyangnu" ri ngeug he: pyam bye:» ga: tid.