YEREMIA 5 - Lacid Common Language Bible

Yerusalem da" Yooboo

¹ Yerusalem voobyu yi we"- nanu" fu" moo" khyoo: cang wigi tang" phang: ge'. Aqei: ayam khyoo: lheing: yu" kaid ge'. Nanu" nyang: yu" myang yu ge'. Kid" oung” jang: cang yu" yu ge'. Jo zi koid wigi Mangsoo ri jhug zug wa yoem: kaid zi dayug rilang" shau" myang go" la". Nanu" shau" myang nghoid rigi Aseing gi Yerusalem ri yooboo khyoid byid: wa.

² Nanu" gi Aseing ri noku ga: phau: tid fu" nghoid loug we' Nanu" tid ziyo' koid zigi azhung" nghoid ago".

³ Gyeing" nyang: Aseing gi jhug zug ziri sho: da:. Nyang: gi nanu" ri baid da:. Nghoid loug we' nanu" gi ci: atam" gyoo: nghoid da:. Nyang: gi nanu" ri phyo' pyam da:. Nghoid loug we' nanu" jhau" yu wa he: ngeug pyam ago". Nanu" gi nheigloem: thain: wigi nanu" da" yooboo joem mo anau lheing: phoug loo nghoid ago".

⁴ Houg: lang" ngoo hid su" shau" myid- «Hid bang: gi myung bang: yo' ci: asi' bang: za: danghoid. Nyangnu" gi nheig agyeing: khyo" koid ago". Nyangnu" gi nyangnu" Mangsoo cimho' ziri asi' nghoid ago". Nyangnu" ri Aseing koid nhang: nau khyoo: ri asi' goo" nghoid da:.

⁵ Ngoo gi yoem: so' gyi: da" byumyu" yi jhang yhe: wigi nyangnu" yo' yhe: ji goo" wa. Gyeing" nyang: nyangnu" gi nyangnu" da" Mangsoo mho' khyoo: ri se' da:. Aseing wigi nyangnu" ri koid nhang: nau ziri se' ago"» ein: shau" myid. Nghoid loug we' nyangnu" dangain" Aseing da" akhang" amyeing" akhang" ri ngeug he: pyam lho: nyang: ri anoug tam" gyo: cang yhi: nghoid ago".

⁶ Hougsu" yoomo siyoo mo khangkhyi gi nyangnu" ri said pyam loo wa. Dain pyoid yoo mo zeigni joem gi nyangnu" ri adu du ngaid phyed ceig pyam loo wa. Houg: lho: zooloo: joem gi nyangnu" da" voogung joem moo shoo: zo: lam" yen" loo goo" wa. Hau: byumyu" yi so" thu lo" nghoid rigi nyangnu" agang gang lang: khyam" pyam zi shoug" wa. Ciwim gari nyangnu" da" yooboo joem gi sung myo: wigi Dalheing: thang: dalheing: nyangnu" gi Mangsoo mo lheing: thu lo" ago".

⁷ Aseing myid: zigi «Ngoo gi ciwim nga" byumyu" yi da" yooboo joem ri khyoid byid: boem wa la". Nyangnu" gi ngoo ri she: pyam too" kho' lho: Mangso gyeing" anghoid da" yu phara" joem ri no' abye: go". Ngoo gi nga" byumyu" yiri nyangnu" gyi: sho' byid: zhoo" byid: jhug bye:. Nghoid loug we' nyangnu" gi myi: shoid lang shoid wigi Nyangnu" da" ayo, akhyeing: ri shava myhi' yi yo' nyid pyam da:.

⁸ Nyangnu" gi gyi: gyi: bug bug zho" xu: to" da" myang: loo joem yo' du wigi yugkhang" moo" gi nyang: nya: yhoem: kyoo" cang" mo yhoem: seing: myhi' yiri yu" shoid ago".

⁹ Ngoo gi he: moo" joem gang mo nyangnu" ri yooboo dam age byid: rhe". Hid yhang: te" da" byumyu" yiri latoo: phug wa a eung: rhe".

¹⁰ Ngoo gi gyivoo yiri nhang: kaid wigi nga" byumyu" yi da" zabyid yoo joem ri zain: pyam nhang: wa. Nghoid loug we' nyangnu" ri bain sho' gi aphyo' shoin' nhang: wa. Ngoo gi nyangnu" ri akung: joem cu: pyam wa shid re" tid wa. Ciwim gari hau: akung: joem gi nga" re" anghoid nghoid da:.

¹¹ Israela yo' Yuda byumyu" yigi ngoo ri bain sho' ab abye: go". Ngoo Aseing tid too" bye:».

Israela ri Aseing Ngeug he: Pyam Khyoo:

¹² Aseing da" byumyu" yigi nyang: ri ngeug pyam lho: tid boem zigi «Nyang: gi gyeing" ci: we' akoid wa. Ngoonu" gi yau: khi" da" ayo, shoug" wa anghoid- ngoonu" gi meing: zain: ziri we' phang" khoug khoug ziri we' shoug" wa anghoid» ga: tid abye: go".

^13-14 Nyangnu" tid zigi Lapi: yigi ci gyeing" anghoid nghoid da:. Lid thung: za: danghoid ago". Houg: lho: nyangnu" moo Aseing mo ce: lu dang: we' ayoo" nghoid ago"» ga: tid boem bye:. Myhang: thang Aseing Mangsoo ngoo ri «Yeremia we"- He: byumyu" yigi houg yhang: te" dang: joem ri tid boem yoomo ngoo gi nga" dang: khoin" joem ri re" nhoid moo myi: yhang: ti" bui" nhang: wa. Hau: byumyu" yigi thang" yo' du wigi myi: gi nyangnu" ri nge" pyam wa» ga: tid.

¹⁵ Israela byumyu" yi we"- Aseing gi nanu" ri khaid zain: wa shid re" moug: vi: mo byu damyu" ri shu" lo loo wa. Hau: byumyu" gi yoem: bo wigi nyangnu" myeing" ri nanu" ase' gyo: da" goonham' mo byumyu" damyu" nghoid ago".

¹⁶ Nyangnu" da" lid: ci: bang: gi nheig akhyeug loo: byu said da" yoem: moo" bo gyizoo: yi nghoid ago".

¹⁷ Nyangnu" gi nanu" da" shivoo: shiloem joem yo' zoo: noem joem ri lhoid zo: pyam loo goo" wa. Nyangnu" gi nanu" da" yuggi zoo: myiyi: zoo: yiri said pyam loo goo" wa. Nyangnu" gi nanu" da" coid kyung yang kyung yo' nu: kyung joem ri said pyam wigi nanu" da" zabyid nei joem yo' lafoem' gam joem ri phyo' shoin' pyam byid: goo" wa. Nanu" loem khau: nyid da" gyidab voomoo" joem gi nyangnu" gyidab wigi phyo' shoin' pyam zi shau" boem wa.

¹⁸ Aseing tid zigi «Hau: bidnyid moo lang" ngoo gi nga" byumyu" yiri bain sho' aphyo' shoin' pyam wa.

¹⁹ Yeremia we"- ngoo ciwim yoomo he: gu: ri koid loug la'- ga: nyangnu" myid: lo boem ri nyangnu" ri hid su" ein: tid kyoo" we'. Nyangnu" ngoo mo phang: lo" wigi nyangnu" nya: moug: moo tungbau yu phara" joem ri dei byid: yhang: ti" nyangnu" gi nyangnu" nya: moug: anghoid jang" mo being" voo yiri dei byid: ca" goo" wa ein: tid kyoo" wa» ga: tid da:.

Nya: Byumyu" yiri Aseing Tid Poin" Khyoo:

²⁰ Aseing tid zigi «Yaku da" amyed ashen yiri tid kyoo" ge'. Yuda byumyu" yiri tid kyoo" we'.

²¹ Myojid" dab loug amyang- nukhyab dab loug ashau" gyo: da" nheig agyeing: ko" da" byumyu" yi nanu" we"- goolhoo' tam" gyoo: we'..

²² Ngoo gi Aseing nghoid. Nanu" gi ngoo ri ciwim agyug go" la". Nga" shidkhoin" moo ciwim yoomo nanu" ko' ko' anain" boem la". Ngoo gi panglai: da" mougkyoo" khyo" midcoo: doem: ri to" too" byid: bye:. Hau: ziri ayo" ge lid: phyid yhe: da" apyaid atoo: moo geing: teing bye: mougkyoo" nghoid da:. Panglai: gyid boug joem to' ri too' wa nghoid loug we' hau: zigi hau: mougkyoo" mo ayo" lid: nghoid da:. Being: lhung" joem myeing ri myeing wa nghoid loug we' hau: joem gi ayo" lid: phyed goo" wa.

²³ Nghoid loug we' byu nanu" we"- nanu" gi nheigloem: thain: wigi goemlu too' wa myid bo ago". Nanu" gi khyoo: thung vang wigi ngoo ri too" kho' ago".

²⁴ Nanu" gi ngo wigi nanu" shid re" byang gain lid jhen" moug: yo' xung" thu yid ri moug: voo nhang: wigi zain khang" moo" shivoo yhoem" yo, ri byid: nghoid loug we' ngoo ri ngi: shab wa ga: khanham we' amyed nghoid ago".

²⁵ Hau: gungthid nanu" da" yooboo joem wigi he: ge khyoo: joem ri toem' pyam byid: ago".

²⁶ Akhyeing" da" byu yigi nga" byumyu" yi phung: gung moo bo nyid boem ago". Nyangnu" gi ngho' joem ri kuang wa shid re" nyangnu" goin ri myu" too" bang: yhang: ti" gau" lhoem: nyid ago". Nghoid loug we' nyangnu" gi byu yiri kuang yu wa shid re" nyangnu" da" lhid: joem ri thoung: to" ago".

²⁷ Shoo" khaid su: gi nya: da" gyoin: khoug: moo ngho' joem byeung" sho' kaid ci: yhang: ti"- nyangnu" gi nyangnu" yhoem: joem khoug: moo lanyhoeb byeung" sho' kaid to" ago". Houg: yoomo nyangnu" gi yoem: so' bo lho: jonu" yo" ago".

²⁸ Nyangnu" gi lid: sho' xu: wigi zooshug goolhoo: shau" zo: ago". Nyangnu" da" akhyeing" moo" joem gi thang ga: zi ajo, nghoid ago". Nyangnu" gi coug" zoo: nu" yiri nyangnu" akho: akhang" ri abyid: lho: doin: zeig zoo: shoug" bang: ri tarha" deingmain" zi ayo" byid: nghoid da:.

²⁹ Nghoid loug we' ngoo Aseing gi hid: joem shid re" nyangnu" ri yooboo dam byid: wa. Ngoo gi he: byumyu" ri latoo: phug wa.

³⁰ Hau: mougmyid moo gye gyoug pho" ziyo' dain mau" pho" joem bue" loo bye:.

³¹ Lapi: yigi mhoug dang: za: tid thu ago". Khainjung yigi Lapi: yi amyeing" byid: da" khyo" vhoeb ago". Houg: lho: nga" byumyu" yigi ci: dakhoin" we' angeug nghoid da:. Nghoid loug we' he: gu: dangain" lo" thang bain byug ri nyangnu" cikoid loo goo" wa la".