YEREMIA 47 - Lacid Common Language Bible

Philisti yo' Sen: da" Aseing Mungdang:

¹ Gaza: ri Egutu gyi azain: shi" uri Philisti yo' sen: wigi Aseing ngoo ri dang: tid da:.

² Nyang: tid zigi «Yu" ge'. Mougzhung: shoid mo gyid do, lo nyid lho: gakhyoid lang yhang: ti" thain: wa zi nghoid. Nyangnu" gi mougmyid ri yo' hau: dang mo ja: khang" moo" ri voomoo" joem yo' houg: moo nyid da" byu yiri nhoeb pyam wa. Byu yigi pang" yu wa nyho: yoid wigi mougmyid tho' moo nyid da" yugkhang" moo" gi nheig khoo" sho' kyi: ngau loo goo" wa.

³ Nyangnu" gi myang: joem khyid: so" myheing thui: myang: rheing" joem kyeug thui:- rheing" cab joem leung thui: ri shau" gyo: ago". Myhi' phoo yigi nya: zoo: yi jhang khyoo: pang" thoug byid: wa adoem loo wa. Nyangnu" lo, joem gi nyangnu" da" namzoin" moo gyau: lhang" jo, wa.

⁴ Philisti ri phyo' shoin' pyam wa Turu yo' Sidon shid re" deing jo, shi" da" pang" thoug wa khyoo: dangain" ri we' phyed pyam wa ayo, ju" bye:. Ngoo Aseing gi Kreti gyid yam mo re" da" Philisti byu yi dangain" phyo' shoin' pyam wa.

⁵ Gye" kougshu: ca" khyoo: Gaza: byu yi jhang ju" re" wigi Ashkelon byu yigi sam: zoo: tam" jo, lo boem wa. Deing nyid da" Philisti byu yi khamyhang ju" sho' koug ngau nyid boem shi" wa la".

⁶ Nanu" gi ‹Aseing da" shamcoin" we"- Kha myang ju" sho' nang zain: nyid shi" wa la". Re" da" shambyang khyoo: doem vang loo" we'. Houg: moo loung" jo, we› ga: yoid nyho:.

⁷ Nghoid loug we' ngoo hau: ziri zei: wa moo" byid: to" uri khasu" doug yo" noo: wa la". Ngoo gi Askhelon ri yo' gyid yam cang nyid da" byu yiri khaid zain: wa amyeing" byid: bye:.