YEREMIA 42 - Lacid Common Language Bible

Byumyu" yigi nyangnu" Shid re" Akyu" Mho' Byid: wa ziri Mho' Yoid Khyoo:

¹ Hau: thang: Karea da" yuggi zoo: Yohanan- Hoshaia da" yuggi zoo: Azaria bo bo wigi gyidab vhujhung: yi dangain" yo' mung" byu yi azhang cang: joeb ju" re" wigi

² Ngoo ri «Jeju" mo ngoonu" tid ziri koid byid: la. Ngoonu" da" Aseing Mangsoo ri ngoonu" shid re" akyu" mho' byid: la. Nyid deing gyoo" bang: dangain" shid re" akyu" mho' byid: la. Goonham' ngoonu" gi myoo" sho' nghoid. Nang myang ziyo' dayhang: ti" akhid" gi ngoonu" dajhi' khyeing" dadeing lo.

³ Ngoonu" yhi: eung: da" khyoo: yo' koid eung: da" moo" ri ngoonu" Aseing Mangsoo gi ngoonu" ri khyoo: shid byid: baja" akyu" mho' byid: la» ga: tid ago".

⁴ Ngoo gi «Nghoid bye:. Nanu" mho' boem ziyo' dayhang: ti" ngoonu" Aseing Mangsoo ri ngoo akyu" mho' wa. Nyang: citid tid ngoo nanu" ri doem tid kyoo" wa. Daja: we' nanu" ri ngoo azoug" wa» ein: tu" bye:.

⁵ Hau: thang: nyangnu" gi ngoo ri «Ngoonu" Aseing Mangsoo gi nang ri ngoonu" shid re" byid: da" amyeing" dang: joem dangain" ri ngoonu" atam" gyoo: acang yhe: nghoid rigi Aseing gi ngoonu" shid re" gyi koid zigi deingmain" ziyo' jhug zug da" sagse: bui" baja".

⁶ Ngoonu" ri myid vho: ri vho:- amyid vho: ri avhoo:- nang ri akyu" mho' byid: la ein: ngoonu" mho' da" su: ngoonu" Aseing Mangsoo ri ngoonu" tam" gyo: cang yhi: wa. Nyang: ri ngoonu" tid dang: gyoo: byid: rigi ngoonu" ja: noem joeb bue" loo wa» ga: ngoo ri tid ago".

Yeremia da" Akyu" Mho' Dang: ri Aseing Tu" Byid: Khyoo:

⁷ Daxi: nyid" thang: ri Aseing gi ngoo ri dang: ji da:.

⁸ Houg: yoomo ngoo gi Yohanan- nyang: yo' dage" nghoid da" gyidab vhujhung: yi byumyu" gooji yi dangain" ri khe: zheing" yu bye:.

⁹ Ngoo gi nyangnu" ri «Nanu" wigi ngoo ri mho' nhang: kaid su:- Israela da" Aseing Mangsoo gi hid: su" ga: tid.

¹⁰ ‹Nanu" he: mungdain: moo xo' nyid nau nghoid rigi nanu" ri ngoo zhug too" byid: lho: nanu" ri aphyo' khyo' pyam wa. Nanu" ri ngoo sho" yhoug to" wigi aphoin' pyam wa. Nanu" adang moo byo, yoin" khyoo: ngoo bui" nhang: zigi ngoo ri gyi" sho' nheig koug nhang: da:.

¹¹ Babelon khokham ri gyoug khyoo: ri theing: pyam we'. Ngoo gi nanu" yo' dage" nghoid wigi nya: da" yoem: so' moo ngoo khyoid yu wa.

¹² Ngoo gi nheig khyeug shoo" myen: yug nghoid yoomo nyang: nanu" ri nheig khyeug sho' ngoo koid wigi yhoem: khyoo: tau" loo" nhang: wa. Ngoo Aseing tid too" bye:›.

^13-15 Nghoid loug we' Yuda mung" moo nyid deing nyid da" bang: nanu" gi nanu" Aseing Mangsoo ri tid dang: agyoo: age koid. He: mungdain: moo nyid wa ziri age he: pyam wa. Nanu" gi ‹Anghoid- ngoonu" Egutu khyoo: yhe: nyid wa. Houg moo ngoonu" gi gyipui" we' athung" shoug" wa. Gyi khaid pui" khi: thui: we' ashau" gyoo: wa. Zooyoid zi we' ashau" wa› ein: nanu" age tid goo" wa. Nanu" hidsu" tid boem nghoid rigi myhang: thang Aseing Israela da" Mangsoo gi «Nanu" Egutu mung" khyoo: yhe: nyid wa myid phyed boem nghoid rigi

¹⁶ nanu" gyoug boem da" hau: gyipui" gi nanu" ri khaid myhi: loo wa. Nanu" gyoug da" zooyoid zigi nanu" thang: cang loo wigi nanu" hau: Egutu mung" moo shid: boem goo" wa.

¹⁷ Egutu mung" khyoo: yhe: nyid wa myid phyed bang: dangain" gi gyipui" moo anghoid lang" zooyoid jang" moo anghoid lang" noophyoo" moo shid: boem wa. Nyangnu" mo dayug we' anyid deing wa. Nyangnu" dang moo ngoo bui" nhang: wa da" yau: khe" kyi" khyeug mo dayug we' ayo" phang: loid boem wa» ga: tid da:.

¹⁸ «Israela da" Aseing Mangsoo tid zigi ‹Nanu" Egutu mung" khyoo: yhe: nghoid rigi nga" nheig yo: ziyo' nheig joem: yo: ziri Yerusalem voobyu yi dang moo foid shoin" byid: ziyo' dayhang: ti" nga" nheig joem: yo: zigi nanu" adang moo foid shoin" byid: wa. Nanu" gi yu" gyoug yu" lhung: sho' da" myo, jang bui" wa. Byu yigi nanu" ri juang" wigi nanu" myeing ri nheing" khoin" khyo" ci: loo goo" wa. He: joyoo ri khanham we' adoem myang goo" wa› ga: tid da:.

¹⁹ Hau: thang: ngoo gi xo' lho: «Yuda mung" moo nyid deing nyid da" nanu" we' Egutu mung" khyoo: ayhi: wa shid re" Aseing tid da:. Houg: yoomo akhid" ngoo nanu" ri

²⁰ Shid: moin: da" shoid moo" zoo" ri koid nyid ago" ein: tid poin" bye:. Ngoonu" Aseing Mangsoo ri nanu" shid re" akyu" mho' byid: wa shid re" nanu" ngoo ri mho' ago". Nya: da" amyeing" dang: joem ja: khang" moo" ri nanu" cang koid wa ga: dangsoo" byid: ago".

²¹ Akhid" nanu" ri ngoo tid bye:. Nghoid loug we' nanu" ri ngoonu" da" Aseing Mangso wigi ngoo ri tid nhang: kaid da" ja: khang" moo" ri nanu" atam" gyoo: nghoid ago".

²² Houg: yoomo he: ziri myid boin: we'. Nanu" gi nanu" yhe: nyid nau da" mungdain: moo gyipui"- zooyoid moo noo phyoo" bue" jang" moo shid: boem goo" wa» ga: tid da:.