YEREMIA 32 - Lacid Common Language Bible

Yeremia Yoothung" Dakhyang" Qei Khyoo:

¹ Zedekia Yuda khokham koid zi daxi: zain ein: zain- Babelon khokham Nebukhadneza khokham koid zi daxe: shed zain ein: zain moo Aseing wigi ngoo ri dang: ji da:.

² Hau: ayo, moo Babelon khokham da" gyidab gi Yerusalem ri gyi zain nyid wigi ngoo gi khokham vang" moo myhid" lhung to" zi shau" da:.

³ Khokham Zedekia gi ngoo ri hougmoo: thung: lhung to" lho: Aseing tid to" da" dang: ri tid fu" to" da" yooboo ngoo ri zhug too" yoomo nghoid. Aseing tid zigi «Ngoo gi he: voomoo" ri Babelon khokham ri seing: yu pyam nhang: wigi

⁴ Khokham Zedekia gi aloid byoin wa. Nyang: gi Babelon khokham lo, khyoo: ab byid: pyam zi shoug" wa. Nyang: gi Balelon khokham Nebukhadneza yo' myonhoo: tab myang wigi gung du nyang: cang" yo" doem goo" wa.

⁵ Zedekia gi Babelon khyoo: shu" lo" zi shau" loo wa. Houg: lho: nyang: gi houg: moo ngoo yo' zoem" khau: da" ayo, ju" sho' nyid deing jo, wa. Nyang: gi Babelon byu yiri gyi koid nghoid loug we' nyang: aoung: wa. Ngoo Aseing tid too" bye:» ga: tid.

⁶ Aseing gi ngoo ri

⁷ «Nga" moo" Shalum da" yuggi zoo: Hanamela gi Benyamin mougmyid mo Anathod moo jo, da" nya: yoothung" ri qei yu wa ga: tid wa shid re" nga" jhang ri" wa. Ciwim gari ngoo gi nya: bidnoem seing: nghoid yoomo hau: ziri qei yu wa akho: akhang" yoo" su: nghoid» ga: tid da:.

⁸ Hau: thang: Aseing tid to" ziyo' dayhang" ti" Hanamela gi hau: khokham vang" khyoo: nga" jhang re" wigi yoothung" ri qei yu byid: wa shid re" tid da:. Houg: yoomo Aseing ngoo ri dang: gyeing" nyang: ji ziri ngoo si bye:.

⁹ Hanamela mo yoothung" ri qei yu wigi nyang: ri ngei leig byid: bye:. Aphoug" ngei pyi" daxe nyhed pyi" nghoid da:.

¹⁰ Ngoo gi lo, xoem" lhid"- dazid thung" wigi sagse: koid to" lho: jang mo ngei leig byid: bye:.

¹¹ Hau: thang: ngoo gi dazid dab da" myid veing" mougsoug" yang: je: khyab joem yo' houg mo akhyoo" joem dazid adab da" soug" khyab yang: je: mo wigi hau: qei da" moo" myid veing" mougsoug" khyab joem ri yu wigi

¹² Hau: joem ri Maseia da" nya: myid: zoo:- Neria da" yuggi zoo: Barug ri byid: bye:. Ngoo gi nyang: ri hau: joem ri Hanamela da" shidkhoin"- hau: qei da" myid veing" mougsoug" moo lo, xoem" bo lhid" boem da" sagse: yi dangain" mo, yo' vang khoug: moo zhung: jo, boem da" byu yi shidkhoin" moo byid: bye:.

¹³ Ngoo gi nyangnu" shidkhoin" moo Barug ri

¹⁴ «Myhang: thang Aseing- Israela da" Mangsoo gi he: myid veing" mougsoug" yo' dazid thung" to" da" yoothung" qei myid veing" mougsoug"- dazid adab da" soug" khyab joem ri yu wigi zain nyid myang" myang" kham wa shid re" zhoo" jhuang: moo hau: joem kaid too" we'.

¹⁵ Myhang: thang Aseing- Israela Mangsoo gi yhoem: joem yoothung" joem zabyid khyam: joem gi he: mungdain: mo doem qei loo goo" wa ga: tid to" da›.

Yeremia Akyu" Mho' Khyoo:

¹⁶ Ngoo gi qei da" moo" myid veing" mougsoug" ri Barug ri bain byid: thang:- Akyu" mho' ziri

¹⁷ «Yoem: moo" bo Aseing we"- re" gyi: sheung: da" yoem: so' yo' yoem: moo" wigi mougkhung: yo' myidjang ri phain" so: to" da:. Re" shid re" ce: ja: we' gye yau: zi ajo, nghoid da:.

¹⁸ Nang gi byu khyeing" su: ri abei abyo, da" jheddab myid ci: shug byid: abye:. Nghoid loug we' nang gi byu yiri nyangnu" myi' phoo yi yooboo shid re" yooboo dam ri we' byid: da:. Nang gi gyi: sheung: ziyo' yoem: so' bo da" Mangsoo nghoid da:. Nang gi Myhang: thang Aseing nghoid da:.

¹⁹ Nang gi phajhi" bo da" soin nyheing khyoo: joem ri koid wigi gyi: sheung: da" moo" joem ri koid da:. Nang gi byu yi zei: da" ja: khang" moo" ri myang wigi nang gi nyangnu" lo, moo" joem ri cang wigi nyangnu" ri aphoug" jhungshug byid: da:.

²⁰ Goonham' nang gi Egutu mung" moo mau" pho" alhoo: again: joem yo' mau" pho" moo" zoo" joem koid lo da:. Houg: mo zi akhid" nyid" ju" sho' xo' wigi Israela yi phung: moo nang koid shug lo da:. Houg: yoomo nang ri khyi' khang" moo" mo bang: se' abye:.

²¹ Mau" pho" alhoo: again yo' mau" pho" moo" zoo" joem gang mo ngoonu" da" gyivoo yi dain byug abye:. Re" byumyu" Israela ri Egutu mung" mo shu" thu lo wa shid re" yoem: so' yo' yoem: ri we' nang ci: abye:.

²² Nyangnu" phoug" phyid" yiri nang dangsoo" byid: to" ziyo' dayhang: ti"- nang gi nyangnu" ri he: jonu" yo' myid xu: ge da" mungdain: ri byid: to" da:.

²³ Nghoid loug we' nyangnu" he: mungdain: khyoo: ju" lo wigi hau: ziri lo seing: pyam boem uri re" amyeing" dang: ri nyangnu" atam" gyoo:. Re" jhau" shid khyoo: ri cang wigi kangso' adei nghoid ago". Nang wigi nyangnu" ri koid wa amyeing" byid: to" da" khyoo: ri nyangnu" ci: akoid nghoid ago". Houg: yoomo he: phyo' shoin' khyoo: dangain" nyangnu" jang" moo nang bui" nhang: abye:.

²⁴ «Babelon byu yigi voomoo" ri yo" seing: yu wa shid re" voomoo" lheing khoem myid boem" joem du: ago". Houg: lho: nyangnu" gyi khaid ago". Meing: zain: khyoo:- zooyoid khyoo:- noo phyoo" bue" khyoo: joem gi voomoo" ri nyangnu" lo, khoug: khyoo: vang loo" nhang: loo wa. Nang tid to" zi dangain" joeb byeung" bye: ziri nang shau" myang da:.

²⁵ Nghoid loug we' yoem: moo" bo Aseing we" voomoo" ri Babelon byu yi wigi seing: yu pyam wa yhid danghoid loo sho' nghoid loug we' Sagse: yi shidkhoin" moo ngoo yoothung: ri qei yu wa amyeing" byid: su: gi nang nghoid da» ga: akyu" mho' bye:.

²⁶ Hau: thang: Aseing ngoo ri

²⁷ «Ngoo gi xangsu: byu yi dangain" da" Aseing Mangsoo nghoid. Nga" shid re" gye" yau zi ci: ajo.

²⁸ He: voomoo" ri Babelon khokham Nebukhadneza yo' nya: gyidab lo, khoug: khyoo: byid: pyam loo: wa. Nyangnu" hau: ziri seing: yu pyam wigi myi: wigi

²⁹ Nghe' pyam goo" wa. Nyangnu" gi hau: ziri yhoemkhung: dang moo Bala ri shoem: nam pyo: ja: nghe' ngei" byid: da" khyo" wigi we' gootu: yu phara" soolhoo: joem ri zabyid yhid: xoin" foid shoin" byid: da" khyo" wigi we' byu yi wigi ngoo ri nheig joem: yoo: nhang: boem da" yhoem: joem yo' dage" nghe' pyam goo" wa.

³⁰ Nyangnu" mhoomyid: shid" da" ayo, moo Israela byumyu" yi yo' Yuda byumyu" yigi ngoo ri avho: ngei nhang: koid wigi nyangnu" koid da" lo, moo" wigi ngoo ri nheig joem: yoo nhang: boem.

³¹ He: voomoo" byu yigi ngoo ri nheig yoo nhang: wigi houg: yhang: ti" zi koid da" bidnyid mo nheig joem: yoo: nhang: ago". Ngoo gi hau: ziri phyo' shoin' pyam wa myid phyed too" bye:.

³² Ciwim gari Yuda yo' Yerusalem byu yi nyangnu" khokham- vhujhung: yi khainjung yi lapi: yi wigi koid lo da" akhyeing" da" moo" zoo" gang mo nghoid da:.

³³ Nyangnu" gi ngoo ri nungthang phug pyam boem bye:. Ngoo nyangnu" ri xo' wigi jhau" shid nghoid loug we' anau tam" gyoo: anau jhau" yu nghoid ago".

³⁴ Ngoo ri noku wa shid re" koid to" da" Noku Yhoem: Moo" moo nyangnu" da" aco' ajhoid da" yu phara" soolhoo: joem rilang" nyangnu" to" wigi hau: ziri ayung" alho' koid pyam ago".

³⁵ Nyangnu" da" yuggi zoo:- myiyi: zoo: yiri Moleg yu phara" ri ngei" byid: wa shid re" Hinnom lang: khung" moo Bala ri nyangnu" phoin: koid byid: ago". Hid su" koid wa nyangnu" ri ngoo amyeing" abyid: too". Nyangnu" houg: yhang: ti" da" lo, moo" ri koid nau goo" wa ziri yo' Yuda byu yiri yooboo koid nhang: goo" wa ziri nga" myid moo lang" abo yu" nghoid da:.

Myid Byu wa Dang: Soo"

³⁶ Israela Aseing Mangsoo ngoo ri - «Yeremia we"- gyipui"- zooyoid- noo dam bue" khyoo: joem gi he: voomoo" ri Babelon khokham da" lo, khyoo: gyo" vang loo" nhang: wa. Akhid" ngoo tid wa gootu: ri we' tam" gyoo: we'.

³⁷ Ngoo nheig yo: wigi nyangnu" ri ngoo nyhid: sain" to" da" mungdain: dangain" mo byu yiri ngoo zheing" yu wa. Nyangnu" ri ngoo he: joyoo khyoo: doem shu" tau" yu wigi hid moo: gau: gau: za: nyangnu" ri nyid nhang: wa.

³⁸ Houg: lang" nyangnu" gi nga" byumyu" bue" lho: ngoo gi nyangnu" da" Mangsoo nghoid loo wa.

³⁹ Ngoo gi nyangnu" da" kangso' gyung: khyoo: moo myid byu khyoo: daja: za: byid: wa. Hau: zigi ayo, byeung" nyangnu" akyu" shid re" we' nyangnu" amyed ashen yi shid re" we' ngoo ri ngi: shab byid: wa zi nghoid da:.

⁴⁰ Ngoo gi nyangnu" yo' apyaid atoo: dang: theing koid wa. Nyangnu" shid re" gi koid ziri ngoo athang nhang: wa. Nyangnu" ngoo mo aphoug loo" wa shid re" nyangnu" da" nheigloem: dangain" wigi ngoo ri gyoug phoug" da" myid nyangnu" ri kaid byid: wa.

⁴¹ Nyangnu" shid re" gi koid jang" moo ngoo pyoo: wa. He: mungdain: moo ngoo nyangnu" ri abei: abyo, de: nyid nhang: wa.

⁴² «He: byumyu" yi dang moo he: yau: khe" kyi" khyeug zi ngoo bui" nhang: bye: ziyo' dayhang: ti" ngoo dangsoo" byid: too" bye: da" ge da" ja: dangain" nyangnu" ri ngoo byid: wa.

⁴³ He: mungdain: gi byu we' gougnyhoug we' anyid da" dain" pyoid yoo yhang: ti" bue" wigi Babelon byu yiri byid: pyam zi shau" loo wa ga: byu yi tid nyid ago". Nghoid loug we' yoothung" joem ri he: mungdain: moo doem qei loo goo" wa.

⁴⁴ Byu yigi yoothung" ri qei loo wa. Myid veing" mougsoug" ri lo, xoem" lhid" dazid thung"- sagse: too" wigi koid loo goo" we'. He: zigi Benyamin mougmyid moo Yerusalem lheing khoem voogung joem moo boem moug: mo voogung joem moo boem khyid: mo voogung joem moo Yuda mung" mougpyi: shoid moo bue" loo wa. Byumyu" yiri nyangnu" mungdain: moo doem pyeing byid: wa. Ngoo Aseing tid bye:» ga: tid.