YEREMIA 18 - Lacid Common Language Bible

Oug" Koid su: Yhoem: Moo Yeremia Yhe: Nyid da" Khyoo:

¹ Aseing ngoo ri

² «Oug" koid su: yhoem: khyoo: gyoo" loo" we'. Hougmoo nga" mungdang: ngoo nang ri byid: wa» ga: tid.

³ Houg: yoomo ngoo gi houg: khyoo: gyoo" yhe: wigi oug" koid su: gi nya: oug" koid zuang moo oug" koid nyid ziri yhe: myang.

⁴ Myid vhu" nug dakhyi' oug" koid zi abue" byug khang" moo"- nyang: gi myid vhu" nug ri yu wigi gootu: doem koid da:.

⁵ Hau: thang: Aseing ri -

⁶ «Oug" koid su: myid vhu" nug khyi' ri koid yhang: ti" ngoo gi nanu" Israela byu yiri koid wa akho: akhang" yo" anghoid rhe". Myid vhu" nug khyi' gi oug" koid su: da" lo, khoug: moo bo yhang: ti" nanu" gi nga" lo, khoug: moo bo ago".

⁷ Ngoo gi ayo, yo, moo byumyu" mungdain: anghoid lang" khokham mungdain: daloem: ri phoin' pyam- phyo' pyam- said toem" pyam wa ein: tid nghoid loug we'.

⁸ Byumyu" mungdain: gi akhyeing" da" lo, moo" mo doem tau" lo boem nghoid rigi ngoo koid wa ein: tid to" ziri akoid loo wa.

⁹ Dakhyo" ein: rigi byumyu" mungdain: anghoid lang" khokham mungdain: daloem: loem: ri zhug wigi koid wa ein: tid too" nghoid loug-

¹⁰ Hau: byumyu" yi nga" tid dang: agyoo: loo: akhyeing" da" moo" koid boem rigi ngoo koid wa ein: tid to" ziri akoid loo wa.

¹¹ Houg: lho: Akhid" ngoo gi nyangnu" ri gyi koid wa soin' to" lho: nyangnu" ri yooboo dam byid: wa jen" jen" nghoid bye: da" khyoo: ri Yuda byu yi yo' Yerusalem byu yiri tid kyoo" byid: we'. Yooboo koid da" kangso' dei khyoo: ri theing: pyam wa nyangnu" khyoo: joem ri thid pyam wa nyangnu" koid da" lo, moo" ri theing: pyam goo" wa shid re" tid wa.

¹² Nyangnu" gi «Atheing: wa Ciwim ngoonu" theing: eung: wa la. Ngoonu" nau yhi' nheigloem: thain: wigi akhyeing" da" moo" ri nau yhi' koid wa» ga: tid loo goo" wa.

Byumyu" yi Aseing ri Ngeug Pyam da" Khyoo:

¹³ Aseing tid zigi «Houg: yhang: te" zi shid phyang" bue" yu" bye: nghoid rigi byumyu" khang" moo" myid: ge'. Israela byumyu" yigi yu" gyoug yu" lhung: sho' da" moo" ri koid abye:.

¹⁴ Lebanon boem myhang: lug phoug tho' moo gyu: ajo, bue" yu" la". Jham" da" boem gung joem atho' mo gyid gyung: joem gi kain" kyug byug yu" rhe".

¹⁵ Nghoid loug we' nga" byumyu" yigi ngoo ri to" myhid pyam abye: go". Nyangnu" gi yu phara" soolhoo: joem ri shoem: nam pyo: ja: nghe' ngei" abye: go". Nyangnu" yhi: eung: da" khyoo: moo nyangnu" thung" thue: leung abye: go". Goonham' mo khyoo: ri nyangnu" acang boem loo nghoid ago". Nyangnu" gi aphang to" da" khyoodeing moo so" ago".

¹⁶ Nyangnu" gi he: mougmyid ri gyoug dain ja: koid pyam lho: apyaid atoo: moo she: pyam too" wa koid ago" So" lid loo" bang: dangain" gi nyangnu" shau" myang da" ja: ri dain mo, byug goo" wa. Mau" wigi nyangnu" vhu" pyi: pyi: boem goo" wa.

¹⁷ Nga" byumyu" yiri nyangnu" da" gyivoo yi shidkhoin" moo bidthu shoid mo lid wigi hau' tang" lo" byug da" pheilhoug: yhang: ti" nyangnu" ri abyoo, asain" koid pyam wa. Ngoo gi nyangnu" ri nungthang phug pyam wa. Yau: khi" kyi" khyeug ju" lo uri nyangnu" ri ngoo apang" thoug wa» ga: tid da:.

Yeremia ri Gyi Gau" Koid da" Khyoo:

¹⁸ Byumyu" yigi «Yeremia yo' sen: wigi ngoonu" daja: koid boem shang. Ngoonu" ri jhau" shid byid: wa khainjung yi ngoonu" ri phajhi" byid: da" phajhi" boo bang- Mangso mungdang: ri tid fu" da" lapi: yi khanham we' nyid nyid boem wa. Nyang: ri yooboo foin: wigi nyang: tid da" dang: ri tam" gyoo: wa theing: pyam goo" shang» ga" tid ago".

¹⁹ Houg: yoomo ngoo akyu" mho' zigi «Aseing we"- ngoo tid ziri yo' nga" khyoo: yo' sen: wigi nga" gyivoo yi tid nyid da" dang: ri tam" gyoo: byid: la.

²⁰ Ge zi shid re" akhyeing" zi aphoug" yo" byid: la". Nghoid loug we' nyangnu" gi ngoo byed gyo" vang loo" wa duang: khuang" du: nyid ago". Nang gi nyangnu" ri nheig yo: da" khyo" akoid wa shid re" re" jhang ngoo khasu" ju" re" khyoo:- nyangnu" gungthid ngoo khasu" dang: tid ziri myid boin: byid: la.

²¹ Nghoid loug we akhid"- Aseing we"- nyangnu" da" zooshang: yiri zooyoid kyug shid: nhang: we'. Gyipui" moo nyangnu" ri said pyam shoug" nhang: la. Myiyi: yiri cougmoo" yi yo' zooshang: yi shid: doem: bang: bui" nhang: la. Yuggi yiri noo bue" wigi shid: nhang: la. Zoolu: yiri gyipui" moo said pyam shoug" nhang: la.

²² Ci: ated poin" lho: nyangnu" yhoem: joem ri byugang: phung: yi wigi lhoid zo: nhang: pyam we'. Nyangnu" ri gyoug dain wigi nyhoo: nhang: we'. Nyangnu" gi ngoo byid gyo" vang loo" wa da" duang: khuang" du: abye: go". Ngoo myi" wa lhid' thung: to" abye: go".

²³ Nghoid loug we' Aseing we"- ngoo ri said pyam wa nyangnu" gyi gau" koid khyoo: dangain" ri nang se' da:. Nyangnu" da" akhyeing" moo" yo' nyangnu" da" yooboo joem ri akhyoid byid:. Nyangnu" ri gyi soem" da" joyoo moo she: pyam to" wigi nang nheig yo: da" ayo, gyoo: moo nyangnu" ri dang: phyed we» ein: akyu" mho' bye:.