YEREMIA 10 - Lacid Common Language Bible

Soolhoo: No' ziyo' Deingmain" da" Noku Khyoo:

¹ Israela byumyu" yi we"- nanu" shid re" Aseing byid: da" mungdang: ri tam" gyoo: ge'

² Nyang: tid zigi «Gootu: byumyu" yi da" khyoo: moo acang yhi: goo". Gootu: byumyu" yi gyoug dain boem nghoid loug we' mougkhung: mo amyang yu" da" alhoo: joem gang mo myid amyoo: go".

³ He: byumyu" yi da" laloem lakhoug: gi ce: akyu" aboo nghoid da:. Siyoo mo seiggam dagam thug lheing: kaid da:. Hau: ziri seig lo, moo" zei: su: wigi kyung" cu' to" da:.

⁴ Houg: lho: ngei yo' sheing: wigi doem tab shoung: pyam ago". Hau: zi aleing loo" wa shid re" tin" zei: wigi baid jen" to" ago".

⁵ Hau: soolhoo: joem gi lashau: yoo moo joo kyug lhoo: joem yo' du ago". Nyangnu" gi dang: ayo" tid nghoid da:. Nyangnu" ayo" soo" yoomo nyangnu" ri vu, yen" ca" ago". Hau: joem ri agyug goo" Nyangnu" gi nanu" ri ce: dam ayo" tab nghoid ago". Houg: lho: nyangnu" gi nanu" ri ge zi ayo" koid byid: nghoid da:.

⁶ Aseing we"- nang yo' du zi hang" anyid nghoid da:. Nang gi myhang: thang su: nghoid. Houg: lho: re" myeing gi gyi: sheung: wigi yoem: so' bo da:.

⁷ Byumyu" dangain" bang: da" khokham nang ri ngi: shab wa hang" nyid la" Nang gi ngi: shab byid: wa moin: su: nghoid Byumyu" yi da" phajhi" boo bang: akhoug: moo nghoid nghoid. Nyangnu" da" khokham khayug nghoid nghoid nang yo' du zi hang" anyid nghoid da:.

⁸ Nyangnu" dangain" bang: gi nheig agyeing: wigi adu: adam: bang: nghoid. Seig soolhoo: joem mo nyangnu" ciyo" jhau" yu wa la".

⁹ Nyangnu" da" soolhoo: joem gi Spain mo ngei wigi tab pyam lho: Uphaza mo sheing: wigi shoin" shoung: pyam da:. Lo, moo" si' bang: da" moo" zoo" za: nghoid da:. Hau: joem ri lo, moo" dab da" yo, gain: yo, bang: yo, to" da:. Khalham" void yo' mi: mi: da" pain" cu' joem wigi shoung: foid to" da:.

¹⁰ Nghoid loug we' Mangsoo we"- nang gi deingmain" da" Aseing nghoid da:. Nang gi kangso' dei da" Mangsoo nghoid wigi apyaid atoo: mo khokham nghoid da:. Nang nheig yoo lang" mougmyid noin" da:. Byumyu" yi re" nheig yo: khyoo: ri atho' zeing: kham: nghoid da:. (

¹¹ Mung" byu yi nanu" khyo" wigi myidgung yo' mougkhung: ri akoid to" da" yu phara" joem ri phyo' shoin' pyam wa ein: nyangnu" ri tid kyoo" ca" ago". Hau: joem gi myidgung tho' khamoo: we' ajo, loo goo" wa.)

Aseing ri Coung" da" JiKhoin" Daloem:

¹² Aseing gi nya: yoem: so' yo' myidgung ri koid to" wigi Nya: da" phajhi" wigi moug: gyab ri phain" so: to" wigi mougkhung: ri pyo: myhu" to" da:.

¹³ Nyang: amyeing" byid: kaid lang" mougkhung: mo gyid myeing lo da:. Nyang: gi jhoemmoug" joem ri mougmyid thang: mo khe: yu da:. Nyang: gi moug: voo nyid akhoug moo lhab' myeig nhang: da:. Houg: lho: lid ri nya: zi too" yab mo nhang: kaid da:.

¹⁴ He: ziri shau" myang lang" byu yigi akoo" adoug:- nheig coid noo yug bue" byug da:. Soolhoo: joem ri koid too" bang: gi myid myo: byug da:. Ciwim gari nyangnu" koid to" da" yu phara" joem gi gung pyeig danghoid wigi kangso' aboo nghoid da:.

¹⁵ Hau: joem gi ce: aphoug" adab wigi co' ngheing" pyam ca" da:. Nyangnu" ri Aseing wigi dang: phyed wa ga: re" uri phyo' shoin' pyam zi shoug" goo" wa.

¹⁶ Yaku da" Mangsoo gi houg: joem yo' adu nghoid da:. Nyang: gi ja: khang" moo" ri koid too" su: nghoid. Houg: lho: nyang: gi Israela byumyu" yiri nya: shid re" khyen: too" bye:. Myhang: thang Aseing ein: zi nya: myeing nghoid da:.

Pyoung" She: Loo" Shau" wa Ju" lo Nyid Khyoo:

¹⁷ Yerusalem voobyu yi we"- nanu" gi vang: lhung to" zi shau" abye:. Nanu" da" jonu" joem ri koid: zheing" ge'.

¹⁸ Aseing gi nanu" ri he: mougmyid mo khaid thu kaid loo wa. Nyang: gi nanu" ri dayug we' adeing loo sho' khyoeb said pyam loo wa myang. Aseing tid too" bye:.

¹⁹ Yerusalem voobyu nyho: yoid zigi «Ngoonu" gi gye" nyang: dam no boem bye: nhung:. Ngoonu" da" dam gi age byug loo wa. Houg: lho: ngoonu" gi hid: yhang: ti" zi yo" zeing: kham: wa ein: lhung jo:.

²⁰ Ngoonu" da" zoem" joem gi phyo' pyam shoug" bye:. Hau: joem ri tei" to" da" tei" joem gi byid shang lo" byug bye:. Ngoonu" da" zooshang: yi dangain" bang: gi phang: shang lo" byug bye:. Ngoonu" da" zoem" joem ri doem tu: zhug wa hang" anyid loo nghoid da:. Hau: joem da" pain" ruang: joem ri koid: lang" byid: wa hang" anyid loo» ga: tid da:.

²¹ Ngoo gi «Ngoonu" da" vhujhung: yigi nheig agyeing: nghoid ago". Nyangnu" gi Aseing ri khyoo" shed wa amho' nghoid ago". Houg: yoomo nyangnu" aoung: doid wigi Ngoonu" da" byumyu" yi byo sain" lo" abye: go".

²² Tam" gyoo: ge'. Lu dang: ju" loo bye:. Mougzhung: shoid mo byumyu" damyu" moo lhu: zuang" wigi lu: fu: go" nyid. Hau: byumyu" yi da" gyidab joem gi Yuda voomoo" joem ri khuidkoo" joem nyid da" dain" pyoid yoo bui" nhang: pyam wa» ein: tu" bye:.

²³ Aseing we"- hang" we' nyang: nya: vhu" pi: lo, kyo' ri ayo" seing: zi ngoo si' bye:. hang" we' nyang: nya: kangso' ri ayo" vhoeb ziri ngoo si' bye:.

²⁴ Aseing we"- Re" byumyu" yiri so' jhau" yu we' nghoid loug we' ngoonu" dang moo dam xoo: sho' akoid. Nang nheig yo: ziri ngoonu" ri yooboo dam abyid. Hau: zigi ngoonu" da" lo" thang zi nghoid loo wa.

²⁵ Nang ri anoku da" byumyu" yi jhang yo' Nang ri ngeug he: pyam da" byumyu" yi jhang re" nheig yo: khyoo: ri lheing: phug kaid we'. Nyangnu" gi re" byumyu" yiri said pyam ago". Nyangnu" gi ngoonu" ri bain sho' phyo' shoin' pyam wigi ngoonu" da" mungdain: ri byo, yoin" jo, nhang: to" kho' bye:.