YAKU 5 - Lacid Common Language Bible

Yoo Mo, Di Mo, Ri: Zid" Nhang: Da" Khyoo:

¹ Yoo" mo, di mo, we' nga" da" thui: ri tam" gyoo: ge'. nanu" gi nanu" nyang: moo ju" lo nyid da" sho" jhen kyi" khyeug wa khyoo: yoomo jha" yoid ngau nyid loo: ge

² Nanu" da" soidgain jo, nu" joem gi yoem: lo" nyid bye:- nanu" da" mi byi: joem ri we' nhau zo: shoin, pyam byid bye.

³ Nanu" da" ngei sheing: joem we' zo wigi zo: shoin, pyam byid: bye. hau" zoo joem gi nanu" shoid khyo" sagsi: joem nghoid nyid wigi nanu" da" gung shoo" ri we' myi: yhang: ti" nge" joem: loo" nhang: wa hid: lo" thang da" bidnyid ayo, joem shid re" nanu" gi soidgain ri dazheung" to" nyid goonhung: lha".

⁴ Nanu" gi nanu" nya: da" tung yoo yoothung" joem moo moo" zei: nyid da" byu yi gi ce" vhu" kung: phoug" we' ashang" kaid boem. Nyang: nu" nheig yoo: nheig jhug nyho: nyid thui: ri tam" gyo: yu" ge'. Nanu" da" shivoo: shiloem, shung: byid: nyid mo da" thui: gi athang agoin da" yoem: moo" bo da" Aseing: Mangso nukhyab' moo khyang: vang loo" bye.

⁵ He: mougmyid moo nanu" da" byu nyid byuyab, khyoo: gi yoo" zoo: yoo" shug nyid pyoo: yab, pyo: lho: pyo: khyoo: aja: ja: yo' byeung" jo. Nanu" gi said pyam wa da" bidnyid shid re" nyang: nya: da" gung du: ri myhug to" boem abye: go.

⁶ Nanu" gi deing byeung" su: ri dang: phyed' lho: said pyam abye: go. Nyang: gi nanu" ri thoutheung nyid su: anghoid.

Zeung: Kham' Khyoo: Yo' Akyu" Mho' Da" Khyoo:

⁷ Hougsu" nghoid yoomo mang: nhung" yi we"- Nanu" gi Aseing: gyoo" lo da" ayo, ju" sho' zeing: kham lho: nheig byu zoore" dalang" nyid ge'. Yoo thung" phug su: gi nya: yoo thung" mo phoug" dab, da" amyoug: ashi" ri yo" yu sho-zain moug: vo shid" lo jang" mo zi lid" jhin" yu: moo ju" sho' yoem: kaid zeing: shang" lho: lang" nyid.

⁸ Nanu" we" zeing: shang" lho: nheig byu lang" nyid ge' Aseing Yesu doem gyoo" loo wa da" ayo, gi jhang loo bye: yoomo nanu" geing: geing: teing teing dalang" nyid ge'.

⁹ Mang: nhung" yi we"- nanu" nyang: gung nyang:- Mangso ca: kyeing yu: zi ashug" wa shid re" nanu" nyang: cang" nyang: dayug gi gootu: dayug ri yooboo afoin: go" nyid goo"- tarha" agyi phoo gi khoem" moo" duang: moo yab, jo, bye.

¹⁰ Mang: nhung" yi we"- Mangso da" myeing yo' kho" kyo" da" lapi: yi da" khyoo ri myed boin myed so" nyid ge'. Nyangnu" gi shen" yhen zi shau" da" uri nheigloem: sheung: ziyo' yo" kham, zeung: nyid boem da" khyoo: ri khoo" shid: yu" yu ge'.

¹¹ Nyangnu" gi yo" kham: zeing: mo, nghoid yoomo nyangnu" ri ngi: lhoo' mo, ein: ngoonu" tid boem bye. Yoba khasu" kham, zeung: khyoo: ri we' nanu" shau" gyo: yu" boem bye. Lo" thang moo Aseing: gi nyang: ri khasu" coung: goin, khyoo: ri nanu" si' bye. Khasu" wim gari Aseing: gi nheig khyeug wigi athang agoin myed yo' byeung" su: nghoid nyid.

¹² Nga" mang: nhung" yi we"- nanu" jham tang: go" khyoo: gi dajhi' we' akoid goo"- moug: khung: ri we' anghoid- myidjang: myeing yu lho: we' anghoid- ce" noem myeing ri lang: lho: we' jham atang: goo". Nanu" da" dang: gi nghoid ga: lang" gi nghoid bye- anghoid ga: lang" we' anghoid baja"- houg su: nghoid lang" gi nanu" ri Mangso dang: kho' zi ashau" boem wa.

¹³ Nanu" mo dayug yug noo phyoo" jam jau phu" nyid go" la". Nyang gi akyu" mho' nyid baja"- dayug yug gi myid pyo: nyid go" la". Nyang: gi coung" nghei jikhoin" khoin" nyid baja".

¹⁴ Nanu" mo dayug yug gi noo phyoo" shau" nyid go" la". nyang: gi phung ludaid' yi ri khi: baja" Hau" phoug: ludaid' yi gi nyangnu" shid re" akyu" mho' nyid: goo" baja". Nyangnu" gi Aseung: da" myeing khyang" yo' nyangnu" ri namman" xu: joid byid: goo" baja".

¹⁵ Loem" jeing" da" nheigloem: yo' akyu" mho' nyid su: da" dang: gi noo, su: ri yo" ge loo nhang: lho: Aseing: gi nyang: ri ge, loo" nhang: lho: nyang: shoid vhang da" yooboo joem ri we' khyoid pyam byid: zi shau" wa nghoid.

¹⁶ Hougsu" nghoid yoomo nanu" gi nyang: cang" nyang:- nyang: nya: da" yooboo ri tid thu toung" pain go" lho: dayug shid re" dayug- akyu" mho' byid: go" nyid ge'. Houg: su" koid lang" nanu" da" noo phyoo" jamjau mo ge yang" zain: loo wa zi nghoid. Deungmain" su: da" akyu" mho' yoid thui: gi yo" bue" loo" nhang: da" yoem: myoo" sho' bo nyid.

¹⁷ Elia gi ngoonu" yo" dakhyoo" te" da" xangsu: byu za: date: nghoid loug we' nyang: gi moug: avoo loo: wa shid re" nheigloem: yoem: moo" khyo" akyu" gyi" sho' mho' kaid. Houg: su" akyu" mho' yoomo mougmyid tho' moo soem" zain lham" moo" khyug" khyab thang sho' moug: avoo khari" loo.

¹⁸ Hau: thang: ri Elia akyu" doem mho' kaid lang" gi moug: khung: mo moug: gi doem vo lo lho: myidjang: gi amyoug: ashi" ri doem yug loo nhang.

¹⁹ Nga" mang: nhung" yi we"- nanu" mo dayug yug gi deungmain" da" khyo: mo khyoo: vhang: vhang: lo" lho: gootu: dayug yug ge" doem shu" tau" ju" lo ri

²⁰ Hougsu" yooboo shoid su: dayug yug ri khyoo: vhang: lo" jang" mo doem yo" khe: shu" loo su: gi hau: yug da" kangso' ri shid: loo" bye: jang" moo deom yo" khyoid yu lho: nya: yooboo dangain" khyoid pyam byid: zi shau" wa shid re" voin, vu, zei: so' byid: su: nghoid ein: myid boin: nyid ge'.