YAKU 3 - Lacid Common Language Bible

NghoidYho: Da" Khyoo:

¹ Nga" da" mang nhung" yi we"- Sara koid mo, nanu" gi taraha" dang: phyed da" khyoo: byu gooje tho' moo je" shau" wa ziri se' nyid ge'. Houg: yoomo nanu" yug khang" moo" sara ade: koid nau nyid goo.

² Ngoonu" dangain" mo, gi atheing: loo: shoid vhang" loo" se' nyid. Kha: uri we' ci: tid cang aboo: su: gi joeb byeung" su: nghoid- Houg: yhang: te" su: gi Nya: gungdu" dangain" ri yo" vhoeb khang" ung: su: nghoid nyid.

³ Ngoonu" gi myang: nhoid moo lung" thung" kaid' byid: lho: ngoonu" da" amyeing" ri cang nhang- ngoonu" vho: khyoo: yo' loo" nhang.

⁴ Gye" gyi: da" gyid sang phoo zeing ri we' ug lid moo" hau, lo da" uri lang" nyhab, cam" nu" zo: wigi khang" lo" lho: sang phoo khang" su: vho: jang" khyoo: yo" khang" lheung: lo" ziri myid, yu" shang.

⁵ Yhoo: we' houg: yo" dakhyoo" ti" nghoid- hau: zigi gunggoin" jang" moo nge thang da" ako zoo: te: nghoid loug we' gye" yo" phau: khuang nyid. Houg: yo' dakhyoo: ti" dajhi' kyeung" da" myi: we' houg: yhi' gyi: da" siyoo zeing ri yo" nge" pyam' ziri myid, yu" ge'.

⁶ Yhoo: we' myi: yo' du nyid wigi shoid vhang: da" khyoo: yo' byeung" jo- hau: zigi gung du: mo ako' daloem: za: te: nghoid loug we' - ngoonu" da" gung goin" moo yooboo yo" dab, loo nhang: nyid. Hau: yhoo: gi ngoonu" da" gung goin: ziri aco' ajhoid koid pyam wigi ngarai mung" mo myi: yo' nyang:- ngoonu" da" kangso' gyung: khyoo: dangain" ri yo" nge" joem: loo" nhang: pyam.

⁷ Byu xangsu: yi gi kyang: da" goug: nyhoug nghoid da" myeing khuid" zeig ni- ngo, joem yo' do: yu: yen" se' ja: yo' ngoo: do' joem ri yo" mhe, yu zi nghoid wigi houg: bang: gi me" lo boem bye.

⁸ Nghoid loug we nyang nya: da" yhoo: rigi hang" we' mi" sho' alhoung yo" mhe, yu boem nghoid ago". Hau" yhoo: gi akhyeing" ashoeb, ziyo'- shid: nhang: se' myoo no, dug yo' byeung" jo, wigi ayo" zei: ci: loo: sho' akhyeing" ashoeb zi nghoid nyid.

⁹ Ngoonu" gi phoo Mangso: myeung ri coung" ngei nyid da" jang" moo yhoo: ri ci: boem, Mangso: da" aved alhoo: yo' dakhyoo" ti"- phain" so: to" da" byu xang: su: yi ri nheing" jang" moo we' hau: yhoo: ri ci nyid.

¹⁰ Nhoid dakhyab, za: mo coung nghei, thui: ge thu' loo nhung: lha". Nga" mang nhung" yi we" hid: su" gi age koid.

¹¹ Gyid bug dakhyung: mo za: gyid coug: gyid khoo" ge yau thu loo wa la".

¹² La form, gam moo zhain loin: shi" yo" zei: ri wa la". zhabyid" nei moo la foem shi" yo" zei: ri" wa la". Houg: yo' dakhyoo" ti" xoo" gyid bug gi gyid gi ayo" bue" loo.

Moug Tho' Mo Phajhi"

¹³ Nanu" da" akhoug: moo se' yeug da" phajhi" boo su: dayug yug nyid nghoid rigi hau: yug gi nyang: se' da" phajhi" boo su: gi nyang: se' da" phajhi" khyoo: ri zei so' da" moozoo" khyo" we' khyo, nyhoem: khyoo: khyo" we' ge, da" moozoo" ri zei: so' khyo" we' sag si: kham, nyid baja".

¹⁴ Nghoid loug we' gyeing" nyang: ga: rigi nanu" da" nheigloem: khoug: moo no" zo nheigloem:- nheig yo: da" nheigloem: yo' nya: akyu" za: shoo: nau ziyo' nghoid boin: phau: khuang khyoo: yo' za: byeung" jo, nghoid rigi hau: deungmain" da" khyoo: ri shoid vhang: khyo" koid nyid zi nghoid.

¹⁵ Houg: yhang: te" da" phajhi" gi tho' khyo" gyoo" lo da" phajhi" anghoid- moug: myid tho' mo Venyi yo' sen: da" yu join zhadain: da" phajhi" danghoid.

¹⁶ Khasu" wim gari no" zo da" nheigloem:- nyang: nya: da" akyu" ri za: te: shoo: nau, da" joyoo moo gi amyen, akhyoid myeing" myoo: yhoo: she: khyoo: ri we' akhyeing" ashoeb da" moozoo" aja: ja: ri we' bue" thu loo nhang: nyid.

¹⁷ Nghoid loug we' tho' khyo" ju" gyoo" lo da" phajhi" ju yhi: koem gi xang: shid" re young" gyeung"- hau: thang: moo myenjham" ngei pyo: khyoo:-nu" nham, khyoo: young" du, nyeung veung" khyoo: ri bue" thu loo nhang:- hau: tho' moo gootu: nheig khyeug khyoo: yo' joeb byeung" wigi ge thang moozoo" ein: da" aboo" bo" lho: ashi" zei: loo nhang: se' nyid. hau: zigi myonhoo: ase' khyen:- nghoid boin: da" khyoo: aboo - akug ase' void.

¹⁸ Myenjham" khyoo: vhoo: mo' - myenjham" tung" sho" to" da" amyoug: ashi" mo zei: thu' lo da" ashi" gi ge, lho, da" khyoo: za: nghoid nyid.