TARHA" AGYI 5 - Lacid Common Language Bible

Debora yo' Barag Eig Yug da" Jikhoin"

¹ Hau: bidnyid moo Debora yo' Abinoam da" yuggi zoo: Barag gi he: jikhoin" ri khoin" da:.

² Aseing ri coung" ge' Israela byu yigi gyi koid wa myid phyed wigi byumyu" yi ngei bu: tung" za: nyang: nya: myid khyo" bo boem ago".

³ Khokham yi nanu" we"- tam" gyoo: ge'. Vhoeb khang" bang: nanu" we"- nyeing" za: tam" gyoo: ge' Ngoo gi Israela da" Aseing Mangsoo ri music thui: yo' coung" nghei wa.

⁴ Aseing we"- Seira boem mo nang gyo" lo lho: Edom mung" mo nang thu' lo da" uri Myid gung gi nain" re" lho: mougkhung: mo moug: vo: gyoo" lo da:. Nghoid bye:- jhoemmoug" mo moug: vo gyo" lo da:.

⁵ Israela byu yi da" Aseing Mangsoo shidkhoin" Sina boem mo Aseing shidkhoin" mo boem joem dei loeb ago".

⁶ Anad da" yuggi zoo: Shamga da" pyaid moo yo' Yaela da" pyaid moo Phaga: byu yi hau: mung" khyoo: aso" lid loo goo" nghoid da Gyung soo" bang: we' khyoo: kyang khyo" za: daso" ago".

⁷ Israela voogung joem gi jham" dung" khi" nghoid nyid da:. Debora we" Nang ju" ri" sho' hau: joem gi akoem: nghoid nyid ago". Debora gi Israela byu yi shid re" nya: myhi' yhang: ti" ju" loo wa.

⁸ Israela byumyu" yi yu phara" aseig ri khyen: yu boem lang" hau: mungdain: moo gyi khaid pui" bue" loo wa. Israela byumyu" myid: moin mo dayug yug gyi goo ci: wa rhe" Lham: toid ci: wa rhe"

⁹ Nga" nheigloem: gi Israela byumyu" yi da" gyizoug: yi yo' dage" Ngei bu: za: nyang: nya: myid khyo" cang boem da" bang: yo' dage" nghoid nyid da:. Aseing ri coung" ge'.

¹⁰ Loo zei: phyu: joem dang moo ju: mo, Doo: dang moo zhung: mo, Khyid: khyo" soo" ca" mo, nanu" we" hau: khyoo: ri tid ge'.

¹¹ Tam" gyoo: ge'. Gyid thung" joem lheing khoem moo doem go" nyid bang: Byu phung: gi Aseing da" oung: doid khyoo: joem yo' Israela byu yi da" oung: doid khyoo: joem ri tid nyid boem ago". Hau: thang: Aseing da" byu yigi nyangnu" voomoo" khyo" jen gyoo" lo boem ago".

¹² Shu" yhi: we' Debora we"- shu" yhi: we' Shu" yhi: we' Jikhoin" nghei we'. Shu" yhi: we' Abinoam da" yuggi zoo: we"- shid vhu" khyoo: re" da" thung: byu yiri shu" loo" we'.

¹³ Hau: thang: jhug zug da" bang: gi nyangnu" da" vhujhung: yi jhang gyoo" re" lho: Aseing da" byumyu" yigi gyi zain: wa jen" jen" nya: jhang ju" re" ago".

¹⁴ Nyangnu" gi Ephrim mo zi janggyoin: khyoo: ju" re" ago". Benyamin kung: yo' hau: byumyu" yi nungthang moo nghoid da:. Gyi zoug: moo" yigi Makhira mo gyoo" lo da:. Gyizoug: yigi Zebulun- mo gyoo" lo da:.

¹⁵ Ishakha kung: da" vhujhung: yigi Debora yo' dage" ju" re" da:. Nghoid bye:- Ishakha ju" re" lho: Barag we' ju" re" da:. Hau: thang: nyangnu" gi janggyoin: khyoo: nya: thang: cang yhe: ago". Nghoid loug we' Ruben kung: bang: gi kho' lo" ago". Nyangnu" gi ri" wa ayo" myid phyed nghoid ago".

¹⁶ Nyangnu" gi nungthang moo yang joem yo' ciwim theing: nyid boem ago" lha". Yang zung" bang: yang kyung ri khe: da" thui: ri shoug" gyoo: wa shid re" rhe". Nghoid bye:- Ruben kung: bang: gi kho' lo" ago" Nyangnu" gi ri" wa ayo" myid phyed nghoid ago".

¹⁷ Gad kung: bang: gi Yodan gyid lang bidthu shoid moo theing: nyid ago". Dan kung: bang: gi gyid sangphoo joem anam moo nyid boem ago". Ashe kung: bang: gi panglai: gyid yam nam moo theing: nyid ago". Nyangnu" gi gyid yam cang theing: nyid boem ago".

¹⁸ Nghoid loug we' Zebulun kung: yo' Nabthali kung: bang: gi gyi khaid pui" moo nyangnu" kangso' shid: gyoin noogyoin shau" da:.

¹⁹ Megido gyid lang zooyam mo Tanag joyoo moo Khokham yi re" wigi gyi zain: ago". Khanan khokham yi gyi zain: ago". Nghoid loug we' nyangnu" gi ngei ayo" yu loo" nghoid ago".

²⁰ Kyi: joem gi moug: khoug: moo dang: yen" da" khyo" nyangnu" mougkhung: moo gyi zain: ago". Nyangnu" gi Sisera ri thougtheung gyi khaid ago".

²¹ Kishon gyid lang mo dagyid gi nyangnu" ri khyoid she: lo" da:. Kishon gyid lang gi gyid lo, thain: da:. Ngoo gi so" yhi: wa yoem: yo' so" yhi: wa.

²² Hau: thang: myang: joem gi thau" byam lho: ju" re" da:. Myidjang gi nyangnu" da" khyid: khoo: joem za: nghoid nyid.

²³ Aseing da" moug: lagyoo: gi «Mero ri nheing" khoin" kaid ge'» «Houg: moo nyid bang: ri nheing" khoin" zang" goo" baja". Nyangnu" gi Aseing ri are" pang" yu goo" nghoid da:. Nya: shid re" gyi khaid wa gyizoo: khyo" ari" goo" nghoid da» ga: tid da:.

²⁴ Gam ge thang da" myiyi: myhi' gi Yaela nghoid. Nyang: gi Keni byu Hebera da" yhoem: seing: myhi' nghoid da:. Nyang: gi zoem" joem khoug: moo nyid da" myiyi: yi tho' gam ge thang yug nghoid da:.

²⁵ Sisera gi gyid mho' da:. Nghoid loug we' nyang: gi nunoug" byid: jhug da:. Nyang: gi khu young" mo nunoug" paid ri Sisera jhang ci: loo byid: da:.

²⁶ Nyang: gi lo, dashoid moo zoem" dung" zeing ci: lho: Gootu: dashoid moo moo" zei: bang: da" du ri ci: da:. Nyang: gi Sisera ri baid lho: nya: vhu" khang" ri baid khyoeb pyam da:. Nyang: gi Sisera da" vhuloem ri baid kyang pyam da:.

²⁷ Nyang: gi nya: poid lug khyoo: jha" gyoo" lo" ziyo' leung lo" lho: Yaela da" khyid: yang: moo aloeb loo: leung jo, da:. Yaela da" khyid: yang: moo nyang: gi nya: poid lug khyoo: jha" gyoo" lo" lho: leung jo, da:. Nyang: gi myidgung khyoo: leung lo" lho: shid: jo, bye:.

²⁸ Sisera da" nya: myhi' gi bangzoo: khoem" khyo" yu" kaid da:. Yab kyo' pain" ruang: nungthang mo zhug yu" nyid da:. Nyang: gi «Nya: gyi myang: rheing" gi ciwim hid: yhi' thang: gyo" nyid lha" Nya: myang: joem gi doem tau" loo phyang" houg: yhi' yoem" nyid go" lha"» ga: myid: da:.

²⁹ Nya: da" phajhi" bo thang da" myiyi: yigi nyang: ri dang: phuid: byid: wigi Nyang: we' pug gi pug gi tid da:.

³⁰ Nyangnu" gi lanyhoeb joem ri cang sho: zheing" yu wigi gam go" nyid zi za: danghoid wa. Gyizoo: dayug ri zoomyi: nu" dayug anghoid lang" eig yug- Sisera shid re" pain" gi Khokham myhi' leung zeung: moo void wa za: thau" to" da" ja: joem ri gam nyid go" boem wa zi nghoid.

³¹ Aseing we"- re" gyivoo yi dangain" houg yo' dakhyo" shid: boem goo" baja". Nghoid loug we' re" bidnoem yigi bid yo' dakhyo" zhoo: goo" baja" o"» ga: khoin" ago". Houg: lho: mungdain: gi zain loem: myid: xi: yug yo nyid da:.