SHOLUMON JIKHOIN" 4 - Lacid Common Language Bible

Yuggi phoo

¹ Nga" jhed we" nang khayhi' young" lha". Re" myo, nghoeb za: pain" akhoug: mo jheddab myid yo' re" myojid" gi khayhi' bang nyid lha". re" xam: gi Gilead boem yam cang so" yen" da" coidbaid phung: yhang: ti" go" nyid da:.

² Re zei joem gi moug" yham" wigi cid" yung" cid" lho' pyam bye: da" yang yhang: ti" phyu: nyid da:. Dakhaid we' gyau: ga: zi aboo dangain" zi byeung" byeung" yug jen to".

³ Re" nhoid yid gi gyo, suid" void yhang: te" da" phe" pain" tei" yo' du wigi nang dang: tid uri hau: joem gi gye" young" da:. Re" baloid gi re" myo, nghoeb za: pain" akhoug: mo myi: su" bang young" nyid da:.

⁴ Re" leung zeung: gi David da" gyi pyuzung yhang: ti" loem: loem: wim gi jhoid young" nyid da:. Hau: jang" moo loem: lheing khab' goo joem dakhyeing" yo' du da" yi: ri foid lhang" to" da:. Hau: yi joem gi loem: loem: lheung" ziyo' jhoid young" nyid da:.

⁵ Re" noug: gi shoocid: joem yo' du ziyo' myioeb bain: yoo moo lhu: nyid da" xaid zoozoem nu" tang: yo' du nyid da:.

⁶ Nab soin: lid jham" ahau' shi" ziyo' moug: acoid loo shi" uri ngoo gi Mura boem yo' nam pyo: da" boem moo nyid nyid bye:.

⁷ Nga" jhed nang gi khayhi' young" la". Nang gi khayhi' joeb byeung" la".

⁸ Nga" myhiseig we" Lebanon boem mo ngoo yo' dage" Lebanon boem moug: mo thu loo we'. Amana boem tho' mo we' zooloo: joem yo' loo: moo" joem nyid da" Senira boem yo' Hermon boem khyo" so" gyoo" loo we'.

⁹ Nga" jhed nga" myhiseig da" myojid" yo' nyang: void ci: da" yi: ri yu" uri nga" nheigloem: ri khoug" yu pyam bye: nhung:.

¹⁰ Nga" jhed nga" myhiseig we" re" jheddab myid gi ngoo ri gye" nheugdeug nhang: nyid da:. Re" jheddab myid gi zabyid yhid: tho' re" je ge nyid da:. Re" nam pyo: da" shoem: gi nam pyo: ja: dangain" tho' moo je ge nyid da:.

¹¹ Nga" nheugdeug su: we"- re" nhoid kug gi byoo: yhid: yhang: ti" cau: da:. Re" yhoo: gi nga" shid re" nunoug" yo' byoo: yhid: nghoid nyid da:. Re" byimi joem moo Lebanon mo nam pyo: ja: dangain" bo nyid da:.

¹² Nga" nheig tei"- nga" myhiseig we"- nang gi shoung: to" da" khyam:- kyam' to" da" khyam:- seung: to" da" gyid bug nghoid nyid.

¹³ Houg: moo shivoo: gam yo' byeung" jo, da:. Houg: joem gi Lamei shigam yo' du wigi gye" ge da" shi" zei: jo, da:. Houg: moo Hena yo' Nardu-

¹⁴ Jamga gam- Gumsho gam- Maza gam yo' Lobain gam aja: ja:- Mura gam- Ajho gam yo' je nam pyo: da" ja: dangain" bo nyid da:.

¹⁵ Khyam: khoug: mo gyid balang: yau nyid da" gyid zoo: lang Lebanon boem joem mo youg gyoo" lo da" gyid lang joem gi khyam: moo gyid byid: da:.

Myiyi: myhi'

¹⁶ Mougzhung: lid we"- too' we'. Mougpyi: lid we"- nga" khyam: khyoo: moid loo we'. Nam pyo: ja: yo' neing" jo, baja". Nga" jhed gi nya: khyam: khyoo: vang re" wigi houg: mo shi" je ge thang ziri zo: nyid baja".