SHOLUMON JIKHOIN" 2 - Lacid Common Language Bible

¹ Ngoo koem' gi Sharon jang: pa: mo zukyen: bain: boem gyoo: cang yug da" myioeb bain: danghoid da:.

Yuggi phoo

² Zu: gyoem" mo myioeb bain: yhang: ti" nga" jheddab su: gi byid: zoomyi: yi myoo" sho' akhoug: moo nyid nyid da:.

Myiyi: myhi'

³ Nga" jhed ri gootu: yuggi yi yo' tu' yu" ri siyoo gyoem" mo shisang" gam yo' du nyid da:. Ngoo hau: bid shoem: moo zhung: nau wigi agam moo shi" gi nga" shid re" gye" coug: nyid zi nghoid.

⁴ Nyang: gi ngoo ri pui" yhoem: khyoo: shu" vang lo" wigi nga" atho' moo jheddab ga: da" dungkhoin: ri tab to" da:.

⁵ Ngoo ri zabyid shi" yo' yoem: boo nhang: wigi shi" sang" yo' gyeing: loo" nhang: zi nghoid. Ngoo gi jheddab myid yoomo noo shoug" nyid.

⁶ Nya: lo, kung" lo, nga" vhuloem gyid" moo kaid to" wigi nya: lo, yo lo, yo' ngoo ri po: ci:.

⁷ Yerusalem myiyi: myhi' yi we". Nanu" gi ngoonu" da" jheddab myid ri aphyed pyam wa ein: shoocid: joem yo' xaid joem ri jham' tang: lho: ngoo ri dangsoo" khoin" byid: we'.

Eig loem: Ein: da" jikhoin" Myiyi: myhi'

⁸ Nga" jheddab su: da" thui: ri ngoo shau" gyo: Nyang: gi nga" jhang khyoo: boem gung khyo" we' boug bu" zoo: joem khyo" we' byam gi gi tang" lo nyid da:.

⁹ Nga" jheddab su: gi xaid yam" zoo: yo' du da:. Shoo" cid: loo: yhang: ti" du da:. Nyang: gi vang khyam: yam moo lo yab jo. Nyang: gi bang: zoo: khoem" mo we' xi' yam duang: bang" mo we' jau" yu" kaid da:.

¹⁰ Nga" jhed su: gi ngoo ri dang: tid nyid da:. Nga" jhed we" cang loo we'. Nga" kang: tei" we" ngoo yo' dage" yhi: shang.

Yuggi phoo

¹¹ Xung" lid lo wigi moug: we' avoo loo:.

¹² Kyoem: khoug: moo bain: boo" bo" young" jo, bye:. Jikhoin" khoin" wa da" ayo, ju" bye:. Yoodam moo pheing" kyoug" myeung thui: ri shau" gyo:.

¹³ Lafoem' shi" joem we' myheung shid" loo bye:. Zabyid boo" bo" ziyo' nam pyo: nyid da:. Nga" jhed we" cang loo we'. Nga" kang: tei" we" ngoo yo' dage" yhi: shang.

¹⁴ Nang gi lug pyo' gyoo: moo nyid da" pheing" kyoug" yo' du da:. Re" da" yu" jheddab tung" myonhoo: ri ngoo ri yu" nhang: we'. Re" gyoo: noug tung" da" thui: ri ngoo ri gyoo: nhang: we'.

¹⁵ Zeigni joem yo' zeigni zoo: yiri myheig too" we'. Nyangnu" gi ngoonu" da" aboo" boo" bye: da" zabyid khyam: ri lhu: shoin' pyam bye: zi nghoid.

Myiyi: myhi'

¹⁶ Nga" jheddab su: gi ngoo seung: su: nghoid wigi ngoo ri we' nyang: seung: da:. Nyang: gi nya: gougnyhoug joem ri myioeb bain: yoo moo coung" zho" nyid da:.

¹⁷ Nga" jhed we" nab soin: lid zoo" aloo: shi" uri Myen" thang: moug: acoid shi" uri Bethera boem gung moo xaid zoo: shoocid: loo: yhang: ti" doem tau" loo we'.