RUTHA 3 - Lacid Common Language Bible

Rutha Yhoem: Yo" lo" Khyoo:

¹ Hau: thang: ri Naomi gi nya: dumoo" Rutha ri «Nga" dumoo" we" nang ri nyid gi yab ge nhang: wa shid re" re" da" yhoem: seing: phoo ri ngoo shoo: byid: ca" bye:.

² Akhid" nang yo' zoem" khoug: nyid boem da" myiyi: nu" yi da" aseing: Bua gi he: yhoem: mo da" bidnoem nghoid nyid. Yu" we' akhamyen nyang: gi gug nang: jang: moo yoono, nang: nyid lang" wa nghoid.

³ Houg: yoomo nang gi gung cid" lho: nam pyo: shoem: ri joid ci: wigi ge thang da" byimi ri shoung: yhoung ci: we'. Nya: gug nang: jang: moo yhi: we'. Nghoid loug nyang: voem: abain zoo: shug shi" ri re" gung nyang: ri atoin" shed shi".

⁴ Nyang: yhoeb loo" lang" nya: yhoeb joyoo ri nang xoem" ci: lho: vang yhi: we'. Nya: khyid: moo nghoeb to" da" mi ri tu: lho: khyid: thang: moo bo yhoeb we'. Houg: lang" nang khasu" koid wa ziri nyang: tid wa nghoid» ga: tid kaid.

⁵ Rutha we' «Nang tid moo tid gi ngoo koid wa» ga: kham: yu bye:.

⁶ Houg: lang" nyang: gi gug nang: jang: khyoo: yhe: lo" wigi nya: nid tid ziyo' dakhyoo" ti" koid bye:.

⁷ Akhid" Bua gi bain zoo: bain shug lang" myid pyo: zoo" ri yoono, boem nam moo yhe: yhoeb jo,. Houg: lang" Rutha gi zheig zoo: yu: yhe: lho: nya: khyid: moo nghoeb to" da" mi ri tu: lho: khyid: yang: moo yhe: bo yhoeb jo,.

⁸ Myen" gam gung ri yug gi phoo gi dain so" re" wigi gung phug kaid ri yu" moug" tung" myiyi: myhi' dayug gi nya: khyid: yang: moo bo yhoeb jo, lang"

⁹ nyang: gi «Nang hang" nghoid» ga: myid: kaid ri «Ngoo re" join myhi' Rutha nghoid. Ciwim ga: ri nang gi ngoo ri coug" koid: eung: da" bidnoem seing: nghoid nyid yoomo re" join myhi' ri lo, xo' yu we'» ga: tid.

¹⁰ Bua we' «Aseing gi nang ri mainkaid byid: baja" o". Nang gi yoo" zoo: yoo" shug da" zooyam zoo: anghoid lang" sho" jhen: da" zooyam yiri ge sho: nghoid loug we' nang gi hougsu" akoid nghoid da:. Re" nid ri koid byid: lo da" lo, moo" tho' ri akhid" nang koid nyid da" khyoo: gi je" we' jeju" bo da" gyoug phoug" lo, moo" ri nang toin" shed nyid abye:.

¹¹ Rutha we" gung ayoug. Nang mho' moo mho' gi ngoo koid byid: wa. Nang gi sam" dab ri yung" da" myiyi: zoo: nghoid ziri voobyu yi dangain" bang: se' nyid boem.

¹² Ngoo we' nang ri coug" koid: wa da" yoovoin boo su: nghoid ziyo' bidnoem seing: nghoid. Nghoid loug we' nga" tho' je jhang da" bidnoem seing: dayug nyid ashi".

¹³ Akhamyen gi hougsu" nyid nyid shi" we'. Nab yo nyid" khyoo: eung: ziyo' dakhyoo" ti" hau: yug nyang: koid: nau ri koid: yu baja". Akoid: nau ri we' gi bye:. Anau koid: ga: nghoid rigi Aseing gi ngilho' nyid ziyo' dakhyoo" ti" ngoo koid: wa. Myo, myang sho' dayhoeb jo, shi" we'» ga: tid.

¹⁴ Rutha we' nab kyoo' ju" sho' nya: khyid: yang: moo bo yhoeb jo, lho: suloem: ade: si' shi" ri to' loo" bye:. Khasu" wim gari Bua gi Rutha nya: khyid: yang: moo re" yhoeb khyoo: ri hang" ri we' asi' nhang: noug: yoomo nghoid.

¹⁵ Bua nyang: ri «Re" mi ci: lo lho: hid: moo myhu" kaid we'» ga: tid. Nyang: myhu" too" lang" Bua gi yoono, datang koo: leig byid: lho: lo, sain: tho' moo bo vu, ki" byid: kaid. Houg: lang" nyang: we' voogung khyoo: doem loo bye:.

¹⁶ Nya: yhoem: khyoo: ju" loo" lang" nya: nid gi nyang: ri «Nga" dumoo" we" khasu"» ga: lhoem: myid: ri Rutha gi nyang: moo Bua tid da" khyoo: dangain" ziri tid kyoo" bye:.

¹⁷ Houg: lho: nyang: gi «Re" nid jhang khyoogung koem: aloo" ga: yoono, we' leug byid: kaid» ga: tid kyo".

¹⁸ Houg: lang" Naomi nyang: ri «Rutha we" akhid" he: da" moo" ri khasu" yo" ze" pain' loo" wa ziri si' wa shid re" lang" lho: tam" gyo: yu shi" we'. Bua gi akhanyid" he: moo" zoo" ri aze" pain' looza: gi too" zi anghoid wa» ga: tid.