Roma 7 - Lacid Common Language Bible

Lo Xo, Pui" Mo Lhoo: shug: Khyoo:

¹ Nga" mang: nhung" yi we" nanu" gi tarha" ri soo" soo" si' mo nghoid yoomo - ngoo ci: tid wa zi ri nanu" gyeing" nyang: se' gyoo: wa byu gi kangso' dei nyid daloo gyoo: ri tarha" gi byu yi da" atho' moo jo.

² Dang: tu' tid shang ein: rigi Deingkhu: vang da myiyi dayug gi nya: yhoem: seing: phoo dadei nyid nyid gi hau: yug yo" loxo' to" tarha" khyo" nyid ca. nghoid loug we' yhoem: seing: phoo shid: thang: ri koem' gi loxo' to" da tarha" mo nyang: loid loo" bye.

³ Hougsu" nghoid yoomo nyang: gi - yhoem: seing: phoo kangso' dei nyid shi" ri - gootu: yug gi dayug yo" zoem" nyid nghoid rigi yuggi lhoid' da" myiyi: ga tid wa zi nghoid. nghoid loug we' yhoem; seing: phoo shid: loo" bye su: nghoid rigi gootu: yuggi yo" lo, doem xo' rigi yuggi lhoid' da" myiyi: ga: wa zi anghoid loo.

⁴ Nga: mang: nhung" yi we" - he: da" khyoo: gi nanu" yo" we' sen: nyid. Nanu" gi Khristu da" gung doem nghoid wigi Moshe tarha" khoug: moo nyid da" pyaid she: lhei" pyam' phyed' boem bye. Mangsoo: moozoo" moo- akyu" bo da" dei zoo: yi bui" loo wa shid' re" nanu" gi shid: jang" mo doem dei to'' lo da" nya: byu yi nghoid boem bye.

⁵ Ngoonu" gi gungsho" nheigloem: ri cang lho: - Kangso' dei nyid boem uri Moshe da" tarha" yo" shu" u" she: zi Yo" dakhyoo" -yooboo koid' nau da" nheigloem: gi ngoonu" da" gungdu: ri - shid: wa jang" moo thang loo" nhang:

⁶ Moshe da" tarha" gi ngoonu" ri tei" to" yu" bye. Nghoidloug we' akhid" ngoonu" gi hau: da" tarha" khoug: mo loid lo" boem bye. Akhid" uri ngoonu" gi lhid" to" da tarha" khyooxoug" khyo" anghoid looza: venyi: khyoo khyo" Mangso: moo" voin vu, nyid boem bye.

Moshe Tarha" Yo" Yooboo

⁷ Hougsu" nghoid rigi ngoonu" khasu" ein: tid boem wa lha". Moshe da" tarha" gi yoobo da" tarha" ein: wa la". Hougsu" age tid. Nghoidloug we' yooboo ga: zi ri Moshe tarha" wigi ngoori si nhang:. Gyeing" nyang: Moshe da" tarha" gi myo no, vhoo: age boo ga: atid' to" nghoid rigi myo no, vhoo: bo ga: zi ci: nghoid zi ngoo si wa zi anghoid.

⁸ Youg: noo yooboo gi ngoonu" ri - hau: Moshe da" tarha" ri myid boin: yoomo ngoonu" da" nheigloem: ung: khoug: moo myo no vhoo: bo da" shoid' vhang: khyoo: - aja: ja: ri bue" loo nhang: Moshe tarha" ga: zi ajo nghoid rigi yooboo gi jo zi anghoid.

⁹ Ngoo gi Moshe da" tarha" ri dajhi' we' asi' loo: nyid lid: lo yu" bye. Nghoidloug we' toung: to" da tarha" ri se' lo da" zi yo" dage" yooboo jo lo lho:

¹⁰ Ngoo shid: loo" bye. Ngoo ri doem dei loo nhang: wa shid' re" byid to" da" Moshe da" tarha" nyang: - nga" da" kangso' ri shid: nhang: nyid.

¹¹ Yooboo gi - ngoori lhid" to" da" tarha" ri myid boin: nhang: wi ngoori lheing jhoem' - ngoori shid: nhang.

¹² Houg: yoomo Moshe da" tarha" gi gyeungshang: lho: hau: dangkang: gi gye ge gyeungshang: deingbyeing.

¹³ Hougsu" nghoid ri gye ge da" zi gi ngoonu" ri ciwim shid: nhang: la". Ashid: nhang: nghoid da: - ngoori shid: loo" nhang: zi gi yooboo nghoid da. Yooboo gi shid: lo" khyoo: ri kang kaid' lho: - agung yab shug loo nhang: wa shid' re" ge da" tarha" ri ci: lho: ngoori shid: nhang: da" khyoo: za nghoid. Hougsu" nghoid yoomo yoobo gi khayhi' gyoug ge da" khyoo: ri Moshe tarha" wigi toin" shid' nyid.

Byu Nheugloem: gyeung" Moo Bo Da" Soozoo Eig Ja:

¹⁴ Moshe da" tarha" gi venyi khyoo: yo" ngoonu" se' nghoid lhoug we' ngoo gi yoobo join doid da" byu nghoid.

¹⁵ Ngoo nyang: koid' da" moo" ri ngoo ase' gyoo. Khasu" wim lha" ga: ri - ngoo nyang: koid' nau zi ri gi akoid' loo za: ngoo ngheing" da" moo" ngoo koid' nyid yoomo nghoid.

¹⁶ Ngoo gi - ngoonyang: anau koid' da" moo" ri zi nyid da" uri Moshe da" tarha" deingmain" nyid khyoo: ri ngoo yhen: yu.

¹⁷ Houg: yoomo ngoo koid' da" moo" ri bo koid' su gi - gyeing" nyang: ga ri - ngoo anghoid. Nga" da" nheigloem: jeung" moo dei nyid da" yooboo wigi koid' nyid zi nghoid.

¹⁸ Xangsu: byu nghoid da" ngoo moo ge da" moo" ri yo" zei: wa da" yoem: so' abo zi ngoo se'. Khasu" wim ga ri ngoo moo ge da" moo" ri zei wa da" amyeing" boo nghoid loug we' yo" zei: wa yoem: so' aboo.

¹⁹ Ngoo gi ge da" moo" ri - zei: noug nghoid loug we' azei: loo: za: - anau koid' da" akhyeing" ashoeb' moo" ri za: te: zei: nyid.

²⁰ Ngoo anau koid' da" moo" ri zei: nyid su: gi - ngoo anghoid. Nga" dangkang: gi nheigloem: jeung" moo dei nyid da" yooboo nghoid.

²¹ Hougsu" yoomo ngoo gi ge da" khyoo: koid' nau da" uri - akhyeing" da" khyoo: ri za: khyen: yu nhang: da" tarha" ri za myang.

²² Mangso: da" tarha" ri nga" nheigloem: gi gau yi ngei pyoo: za lhoem: yu bye.

²³ Nghoidloug we' nga" gungdu: khoug: moo hau vhoo ngei khyoo: yo" shai" lho: khaid zain: lu: khang nyid da nheigloem: gootu boo shi. Hauda" nheigloem: gi ngoo moo khaid zain: lu khang nyid lho: - ngoori yoobo tarha" khoug; khyoo: doem doin: jhoin" kaid.

²⁴ Ngoo gi nheigloem: gye" apyoo: su: nghoid nyid ngoori shid: loo" nhang: da" he: gungdu: mo hang" se' khyoid' yu loo wa lha".

²⁵ ngoonu" da Aseing Yesu' Khristu khyo" khyoid' yu da" Mangsoo: jeju" zeing gi gyi: sheung: jo nhung: Jhung: shoem: khyo" wigi - ngoo moo bue" da" khyoo: ri tid phoid' kyo" nghoid ri ngoo gi nheigloem: khyo" Mangso: deizoo: koid' nyid nghoid loug xangsu: gung sho" nheigloem: xoug" gi yoobo da" deizoo: dakoid' nhang: nyid.