Roma 6 - Lacid Common Language Bible

Yooboo Yoomo Shid: Lho: Khristu yo" Dadeing: Daloem Kang So' Dei

¹ Hougsu" nghoid rigi khasu" ein: tid boem wa lha". Mangso: da" jeju" ri je myo: loo wa shid re" yooboo khoug: moo daxo' loung" jo shi" wa la".

² Hougsu" anghoid o"- yooboo yoomo ngoonu" bain shid: bye: mo ngoonu" gi khasu" wigi yooboo khoug: moo daloung" jo, shi" wa la".

³ ngoonu" gi Aseing Yesu yo" dadeing: daloem: za bui" wa shid' re" Babtisma ri kham: yu da" uri - Khristu yo" dage" shid: kham bye: da" khyoo: ri nanu" gyeing" nyang: se boem bye.

⁴ Houg: yoomo nyangnu" gi Babtisma kham khyo" wigi Khristu yo" dage" shid: kham: lho: - nyang: yo" dage" myhoeb pyam' zi shau" boem bye. Aseing yo" dage" shid: kham: da" khyoo: gi pho da phung" yoeb yoem: so' yo" Khristu ri shid: da" jang" mo doem dei to'' loo nhang: zi yo" dakhyoo" - ngoonu" gi kangso' Aseing moo doem yo" dei nyid wa shid' re" nghoid.

⁵ Khasu" wim ga: ri ngoonu" gi nyang: yo" dakhyoo" ti" nyang: yo' dage" shid: lo" boem nghoid loug we' nyang: yo" dakhyoo" ti" shid: jang" mo doem dei to'' loo wa zi nghoid.

⁶ Hau: tho' moo gootu: ngoonu" da" byu xoug" nheigloem: ri Khristu yo" dage" pyang" zeing moo baid jen" said' pyam' nhang: bye: da" khyoo: - hidsu" baid jen" said' pyam' nhang: da" khyoo: gi yooboo da" yoem: so' da" byuxoug" nheigloem: ri phyo' koid pyam' khyo" wigi yooboo join pyaid mo lhoid' byoin loo" nhang: wa zi nghoid da" khyoo: ngoonu" se boem.

⁷ Khristu yo" dage" shid: kham su: gi yooboo yoemso' khoug: moo anyid loo.

⁸ ngoonu" gi Khristu yo" dage" shid: rigi nyang: yo" dage" kangso' dei nyid wim bye: zi ri loem" jeung"

⁹ Khristu gi shid: jang" mo doem dei to'' loo" bye: yoomo thang: phyang" khanham we' ashid: loo wa zi ngoonu" se'. Shid: lo" da" khyoo: gi nyang: ri ayo" vhoeb khang" ci loo.

¹⁰ Hougsu" nghoid yoomo nyang: shid: kham khyoo: gi youg: noo yooboo shid' re" dalheing: za shid: kham zi nghoid. Nyang: gi Mangsoo: shid' khoin" moo kangso' dei zoem" khau: nyid bye.

¹¹ Houg: yo' dakhyoo" ti" nanu" we' yougnoo yooboo moo shid: lo" nghoid loug we' Khristu Yesu yo" dadeing: daloem: khyo" Mangsoo: shid' khoin" moo kangso' dei zoem" khoug: nyid bye.

¹² Houg: yoomo nanu" gi nanu" nya: da" gung sho" nheigloem: ri acang loo" wa shid' re" yooboo yougnoo gi shid" loo" se' da" nanu" gungdu: ri thang: phang" khanham we' vhoeb khang" loo: wa anghoid.

¹³ Nanu" da gungdu akung: ako'' joem ri we' Khanham we' yooboo akoid' nhang: loogoo. Houg: yooboo koid wa tho' rigi nanu" gi shid: jang" mo doem dei loo mo agyeing" khyo" we' deingbyeing" moozoo" dagung goin" ci: yhung: nyid khyo" we' nyang: tu: nyang: gung ri Mangso: jang" moo xoin" to' pyam' ge'.

¹⁴ Yooboo gi nanu" da Aseing anghoid loo- khasu" wigi nanu" gi Moshe tarha" vhoo moo anyid loo: Mangso: jeju" khoug: moo nyid mo danghoid lo.

Deingmain" Tarha" Da" Join Yi

¹⁵ Hougsu" nghoid yoomo ngoonu" gi Moshe da tarha" vhoo moo anyid loo yoomo ngoonu" gi ciwim yooboo koid' shi" wa go" la". Hougsu" koid' wa shid' re" dangkang: ajo, loo.

¹⁶ Byu dayoug nhang: zo zi shau" nyid sugi nhang: zoo: su: da" join nghoid zi nanu" goo" lhoo: si bye. Gyeing" nyang: nanu" ri yooboo wi nhang zo zi dashau" nyid shi" rigi - Nanu" gi yooboo join nghoid nyid shi" - Nanu" koid' da" yoobo aphoug" gi shid: lo" da" khyoo: nghoid. Gyeing" nyang: nanu" gi Mangso: da" dang: ri tam" gyo: da" aphoug" gi Mangsoo: da" shid moo deingbyeing" mo bue" loo wa.

¹⁷ Nanu" gi dalheing: ri - Yoobo join koid' yu" nghoid loug we' akhid" gi jhau" mho' khyoo: ri tam" gyo: loem" jeung" da" deing byeung" khyoo: ri nheigloem: ung: khoug: dangain" yo" nanu" kham: yu bye: yoomo ngoo gi Mangso: da jeju" ri coung" nghei" nyid.

¹⁸ Nanu" gi yoobo da join pyaid mo loid byoin lo lho: - deing byeung" da join bue" lo boem bye.

¹⁹ (Nanu" gi gungsho" nheigloem: khyo" ase' gyoo: yoomo lei da" dang: khyo" tid nyid). Goonham' gi age akhyeing da khyoo: aja: ja: ri zei: wa shid' re" - nanu" nya: da" gungdoem: ri - anyhoin: athoung" aco' ajhoid' khoug: moo join khyo" bain sho' ab pyam' boem bye. Houg: yo' dakhyoo" ti" - akhid" nanu" gi - gyeungshang: ge thang da" moo" ri zei: wa shid' re" nyang: tu: nya: da" gung doem ri - deingbyeing" da" khoug: moo join gyeing" khyo" nanu" gung ri ab pyam' ge'.

²⁰ Nanu" gi Yoobo da" join koid' nyid da uri - deingbyeing" da" khoug: mo loid byoin lo" boem.

²¹ Hau: da" uri nanu" zei: nyid da" moozoo" gi - nanu" nyang: ri akhid" ju" sho' asho" ashid: bui" nhang: zi nghoid. Hau: da akyu" gi - shid: lo" khyoo: nghoid.

²² Nghoidloug we' akhid" nanu" gi yoobo da" lo, khoug: mo, loid byoin thu' lo lho: - Mangso: da: join yi bue" lo loem bye. Nanu" yo" yu da" akyu" gi Aseing: da" shid' re" nyang: nya: kangso' dei khyoo: bain" sho' xoin" to' pyam' bye yoomo lo" thang moo gi apyaid' ato: kangso' akyu" yo" yu wa khyoo: nghoid bye.

²³ Yooboo da aphoug" gi shid: lo" khyoo: nghoid. Nghoidloug we' Mangsoo: da" phoug" asang: jeju" jhungshug koem' gi - ngoonu" da Aseing Yesu Khristu yo" dadeing: daloem khoug mo yo" da" apyaid' ato: kangso' nghoid.