Roma 15 - Lacid Common Language Bible

Nyang: Nya: Akyu" Ashoo: Looza: Sube" ri Akyu" Koid' we'

¹ Apyaid' ato: da" Mangsoo: ri leom jeung" khyoo: nheigloem: geing: teing yoem: boomo ngoonu" gi -loem" jeung" nheigloem: yoem nu: mo ri - loem" jeung" khyoo: abyo, loo" wa shid' re" bo pang" thoug ge'. Ngoonu" gi ngoonu" nya: myid pyo: khyoo: ri za: akoid' goo.

² Ngoonu" yug khang" moo" gi - nyang: nya: byen cang" - nyid gi nyid ge wa khyoo: ri myid yu" lho: - loem" jeung" khyoo: geing: teing sho' ngei pyoo: nhang: ge'.

³ Khristu gi nya: da" akyu" ri re" sho: khare" zi anghoid. Aseing: gi nya: akyu" shoo: wa tho' moo jhoem: mungdang: moo- - Aseing: ri subi" juang" yi da' khyoo: gi gyeing" nyang: ngoori juang" yi khyoo: nghoid - ga: wigi tid to" zi yo" dakhyoo" ti" subi" juang" yi da" khyoo: kham zo.

⁴ Jhoem: mungdang: moo lhid" to" da" khyoo dangain" gi - kham' zeing: yoem: vhoo" yo' nheugloem: geing: teing khyo" nyang: nya: nheig byu loem" jeung" khyoo: ri yo" yu wa shid' re" - ngoonu" ri jhau" mho' tid kyeing" to" da" mungdang: nghoid.

⁵ Nanu" dangain" mo gi - Khristu koid' shug aved asam" ri cang lho: wigi nheigloem: ung: khoug: daloem: za: boo wa shid' re" kham' zeing: yoem: vhoo" yo" geing: teing nheigloem: ri kaid' byid: da" Mangsoo: gi Nanu" ri pang" thoug nyid baja".

⁶ Houg: lang" she' nanu" gi dadeing: daveing" za zi yo" ngoonu" da" Aseing Yesu Khristu da" nya: phoo Mangsoo: ri damyeing" dathui: yo' za: yo" coung" nghei" nyid boem wa.

Ngei Bu: Lu Dang: Tungbau Byumyu" Jhang Tid' Fu" Lo, Khyoo:

⁷ Houg: yoomo Khristu gi nanu" ri lhoem: kham: yu yhang: ti" Mangso: da myo nhoo: phung" yoeb doug bang: loo wa shid' re" - nanu" we' nyang: cang" nyang: lhoem: kham: yu go" nyid ge'.

⁸ Khasu" wim gari Mangsoo: gi dang: theing khoen" zung" su: nghoid yoomo phoug" phyid" yi ri tid to" dang: theing khoin" byeung: loo nhang: wa shid' re" gyoo" lo ein: ngoo tid nau.

⁹ Houg: yo' dakhyoo" ti" tungbau byumyu" yi gi Mangso: da nheig khyeig da" khyoo: ri shau" coung" nghei" wa shid' re" we' nghoid. Jhoem: mungdang: moo Houg: yoomo ngoo gi nghizain da" byumyu" yi da" khoug: moo Mangso: da" phung" yoeb ri coung" nghei byid wa. Nya: myeing" khyang" ri coung" nghei lid jhoem" kaid' wa - ga: tid to" zi yo" dakhyoo" ti" nghoid.

¹⁰ Jhoem: mungdang: moo doem tid zi gi Tungbau byumyu" yi we" Aseing: da" byu phung: yi yo' dage" ngeipyo: gau yi nyid ge" ga wigi we'.

¹¹ Nghizain byumyu" bain sho' bang: we" Aseing: ri coung" nghei byid: ge' byumyu" bai ri sho mo we" nyang: ri coung" byid: nyid ge' ga: tid to.

¹² Xo' lho: Esaia tid zi gi Yesu da" nya: myid: nya: zoo: dayug gi nyid ri" wa - tungbau byumyu" ri vhoeb' khang: wa shid' re" - nyang: gi tungbau byumyu" ri tu: to' vhoeb' khang" nhang: lho: nyanu" gi nyang: moo- nheig shid: nheig deig da" nheig byu, nheig nhei: khyoo: yoo" wa - ga: tid to.

¹³ Gyeungshang: da" Venyi: phung" yoeb gi nanu" da" loem" jeung" nheig shid: nheig deig da" khyoo: ri geing: teing tho' moo geing: teing loo wa shid' re" loem" jeung" nheig shid: neig deig nhang: da" Mangsoo: gi nanu" da" loem" jeung" yoomo nanu" ri gau yi ngei pyo: joeb byeung" nhang: zi yo" myenjham" khyoo: ri byid: baja" o".

Polu Agyug Avoem Bang Bang Lhid" To" Khyoo:

¹⁴ Mang: nhung" yi we" nanu" gi ge da" khyoo: ri nghoid loug we' nyain: phajhi" yo" nghoid loug we' - Joeb byeung" lho: - nyang: cang" nyang: yo" jhoug" yo" mho' go" da" khyoo: ri ngoo loem jeing" nyid.

¹⁵ Nghoidloug we' he: mougsoug" moo moozoo" dayham" yo" lho: nanu" ri tid poin" da" khyoo: moo ngoo gi mougsoug" bang bang lhid" to" zi nghoid.

¹⁶ Hau: da" amyeing" zeing gi nghizain byumyu" yi jang" moo moo" voin wa shid' re" Khristu Yesu da" dei zoo: yo" bue" da" khyoo: nyang: nghoid bye. Gyeungshang: Venyi: khyo" tungbau byumyu" yi Mangsoo: vhoo: ngei da" xoin" du: bue" loo wa shid' re" ngoo gi khainjung dayug yhang: ti" - Mangso: ngei bu: lu dang: ri kho" kyo" moo" voin vu nyid.

¹⁷ Houg: yoomo ngoo gi Khristu Yesu yo" dadeing: daloem: za: nyid lho: - Mangso: da" moo" ri yo" voin nyid yoomo ngoo yo" nghoid boin: nyid bye.

¹⁸ Tungbau byumyu" yi gi Mangso: da" mungdang: ri tam" gyo: lo boem wa shid' re" Khristu gi ngoori tid khyo" we' zei moo" khyo" we' ci nyid khyoo: ri ngoo agyug asho' loo tid kyoo" wa.

¹⁹ Houg: su" Mangso: da" mungdang: ri yo" tam" gyo: lo da" khyoo: gi ngoo tid dang: zei so' yoomo we' goo" ki lid toin" shid' da" mau" pho" moozoo" yoomo we' young" gyeing" Venyi: da" yoem: vhoo" yoomo we' nghoid nyid.- Houg: su" nghoid yoomo ngoo gi Yerusalem voomoo" mo Iluri moug: jo yoo khyi khang" moo" moo ju" sho' Khristu da" ngei bu: lu dang: ri kho" kyoo" bye.

²⁰ Subi" qei" to" da" ayang: tho' moo anau poug koid. Nga" nheigloem: moo gi Khristu da" khyoo: ashug" gyo: yu" shi" da" jo yoomoo za: ngei bu lu dang: ri kho" kyoo" wa shid' re" myid to".

²¹ Jhoem: mungdang: moo Hau: yug da" khyoo: ri hang" we' atid yu nghoid loug we' - nyanu" gi shau" myang boem wa. Ashug" gyo: yu" nghoid loug we' nyanu" gi se' gyo: boem wa - ga: lhid" to" zi yo" dakhyoo" ti nghoid nyid.

Roma Voo Khyoo: Loo" Wa Ga: Polu Soin Nyheing Khyoo

²² He: da" khyoo: yoomo ngoo gi myoo" sho' lheing: yoem: kaid' yu" nghoid loug we' nanu" jang" moo ayo" ju" ri.

²³ Nghoidloug we' ngoo gi he: jo yoo moo zi ci: ca" da" moo" ri bain zei pyam bye. Nanu" jhang khyoo: ri" wa shid' re" zain void myang" sho' mo nyang: nheigloem: moo bo jo zi yo" dakhyoo" ti" -

²⁴ Akhid" nanu" jang" moo ju" re" wa ein: myid byu to. Ngoo spin: mung" khyoo: gyung: so" lo" da" uri - nanu" jhang khyo" vang jang: wa shid' re" myid soin: to. Nanu" jang" moo daso' re" theing: jang: lho: - Sping: mung" khyoo: gyung: xo' so" loo" wa shid' re" - ngoori pang" thoug kaid' nhang: nau.

²⁵ Nghoidloug we' akhid" lei lei zoo: ngoo gi - Mangso: da" phung: byu yi ri pang" thoug byid wa shid' re" Yerusalem voomoo" khyoo: yhi: ca".

²⁶ Khasu" wim lha" ga: ri - Makedoni mung" yo' Greed' mung" phung: byu yi gi - Yerusalem boomoo" moo zheing: nyid sho" jhen: da" Mangso: phung: byu yi ri Alu: jhung: shug yhe: di" byid: wa myid phyed' to" zi nghoid.

²⁷ Nyanu" hougsu" pang" thoug go" da" khyoo: gi - gootu: yoomo anghoid. Nyang: nheig myen: khyo" yoomo za: danghoid. Gyeing" nyang: ein: rigi hau: sho" jhen: mo ri pang" thoug wa zi gi Nyanu" moo yoovoin bo zi nghoid. Yuda byumyu" yi gi tungbau byumyu" yi yo" dage" Venyi: mainkaid jeju" joem' ri nyanu" ri gam byid: rigi tungbau byumyu" yi we' Yuda byumyu" yi ri zoo: wa void wa moozoo" moo pang" thoug eung: nyid.

²⁸ Houg: yoomo ngoo gi yo" khyu: yu da" alu: ngei ri - nyanu" ri yhe: yo" byid lho: ri she Sping: mung" khyoo: gyung: xo' so" loo" wa nghoid. Khyoo: eung: yoomo nanu" jang" mo: vang jang: loo wa.

²⁹ Ngoo nanu" jhang ju" lang" Aseing Yesu da" jang" mo joeb byeung" da" mainkaid jeju" shau" kham: zo: boem wa shid' re" ngoo vang jang: loo zi nghoid.

³⁰ Mang: nhung" yi we" - Aseing Yesu Khristu ri ngoonu" loem khoug; yoomo we' - Young" gyeing" Venyi gi ngoonu" ri nheig. khyeug jheddab yoomo we' nga" shid' re" ngoo yo" dage" Mangso: jang" moo yoem: kaid' akyu" mho' wa shid' re" nanu" ri ngoo yoem: byid: kaid'.

³¹ Aseing Yesu ri khyag aloem" jeing" da" Yuda byu yi ngoori kuang jang" mo yo" loid, loo" wa shid' re" we' - ngoo gazi: pang" thoug da" khyoo: ri Yerusalem voo moo nyid da" yung" lho' Mangso: da" phung: byu yi goug goug yi yi yo" lhoem: kham: yu wa shid' re" akyu" bo mho' byid: ge'.

³² Hau: thang: ri Mangsoo: vho: ngei nghoid ri gi - ngoo gi goug goug yi yi nanu" jhang ju" re" lho: nanu" yo" dage" shau" nyid wa nghoid.

³³ Myenjham" da Aseing: Mangsoo: gi nanu" dangain" mo yo" dage" danyid" nyid" baja" o" - Amen.