Roma 14 - Lacid Common Language Bible

Mang: Nhung" Yiri Yooboo Dang: Aphyed: Goo"

¹ Nanu" gi Mangsoo: ri loem" jeung" yoem: nu" mo ri kham: yu nyid ge'. Nghoidloug we' - nya: myid soin: koid' lo" khyoo: yo" nyang: yo" angeig goo" goo.

² loem" jeung" khyoo: geing; teing su: gi ce: ja: zoo: noem ri we' yo" zo: nghoid loug we' loem" jeung" khyoo: ageing: teung su: gi - nghang" pho nyoug yu: za: zo:.

³ Ce: ja: zoo: noem ri nghoid loug we' se' zoo: su: gi houg; su" ase' zoo: su: ri - aphoug" akhyoid' akoid'. Nghang" pho nyoug yu: za: te: se' zoo: su: we' ce: ja: zoo: noem we' se' zoo: su: ri yooboo foin: gei sang: zi akoid'. Khasu" wim ga: ri ce: ja" zoo: noem ri nghoid loug se' zoo: su: ri Mangsoo: kham: yu too" bye: su: nghoid.

⁴ Nang gi khate" su: nghoid lho: subi" da" dei zoo: koid' su: ri joeb' ca" dang: yo" phyed' lha". Hau: da" dei zoo: koid' moozoo" ge age gi nya: da" yhoem: seing: gi dang: phyed' byid: wa. Nya: da" moo" gi nyang: ri deig joung: nghoid wa. Khasu" wim ga: ri Aseing: gi nyang: ri yo" pang" thoug su: nghoid.

⁵ Byu dayham" bang: gi - bidnyid danyid" gi goo" ru: danyid" tho' moo je ge ga: soin: yu" ago". Goo" tu: dayham" gi bidnyid dangain" gi dakhyoo" ti" ga: myid ci: ago". Kha: yug gi khasu" soin: ci nghoid loug nyang: myid zi jo ga: loem" jeung" nheig deig ca.

⁶ Bidnyid je ge ga: soin: ci: su: gi Aseing: ri coung" nghi wa shid' re" soin: ci baja" - ce: ja" zoo: noem ri se' zoo: su: we' - Aseing: ri coung" nghei" wa shid' re" zo: nyid baja nyang: we' hau: zoo: noem shid' re" Mangso: da" mainkaid jeju" ri coung" byid. Zoo: noem dajaja: ri jang" pyam' su: nghoid loug we' Mangso: da" myonhoo: phung yoeb ri coung" byid: wa shid' re" jang" pyam" da" khyoo: nghoid. Nyang: we' hougsu" jang" pyam' yoomo Mangso: da" jeju" ri coung" byid.

⁷ Ngoonu" mo khayug we' - nya: shid' re" za te: dei nyid zi anghoid. Shid: loo" nghoid loug nya: shid' re" za: te: shid: lo" zi anghoid.

⁸ ngoonu" dei nyid zi gi - Aseing: shid' re" dei nyid lho: shid: loo: nghoid loug we' Aseing: shid' re" ngoonu" shid: lo. Hougsu" nghoid yoomo ngoonu" gi kangso' dei nyid u" ri we' shid: lo" nyid" ri we' Aseing: yo' sen: nyid.

⁹ Khasu" wim ga: ri Khristu gi - shid: loo" mo dei nyid mo da" Aseing: bue" loo" wa da" shid' re" shid: kham: lho: doem dei to'' loo bye.

¹⁰ Houg: yoomo nanu" gi ciwim wigi re" mang: nhung" ri dang: phyed' nyid go" lha". Ciwim wigi nyanu" ri aphoug" akhyoid' koid' nyid go". Ngoonu" dangain" mo gi tarha" dang: phyed' zi kham: wa shid' re" Mangso: da tarha" zhoug: tang shid' khoin" moo ju" yab boem wa.

¹¹ Jhoem: mungdang; moo Aseing: tid to" zi gi Ngoo dei nyid zi yo" dakhyoo" ti" nga" da" shid' khoin" moo byu dangain" mo, poid' thoug thug lho: - yhoo: dab moo dab ngoo Mangsoo: nghoid khyoo: ri yhen: yu boem wa ga: - tid to.

¹² Houg: nghoid yoomo ngoonu" dangain" mo gi nyang: nyang: koid' da" moozoo" yo" dakhyoo" ti" Mangsoo: ri shau" tid khyo" da bidnyid ju" loo wa.

Mang: Nhung" Phoo ri Shoid' Nhang: Wa Khyo" Akoid'

¹³ Houg: yoomo ngoonu" gi nyang: cang" nyang: yooboo foin: go" da" khyoo: akoid' looza re" mang: nhung" phoo thoem: tho: leung jang: khyoo: kyoo" age kaid' byid. Houg su" anghoid lang" gi yu" shoid' wa da" akyang" daja: we' azei: shug wa shid' re" myid phyed' too" ge'.

¹⁴ Ce: ja: zoo: noem ri we' phain" to" zi yo" dakhyoo" ti" aco' ajhoid' anghoid da" khyoo: ri ngoonu" gi Khristu yo" dadeing: daloem: nghoid khyo" yo" boem nghoid loug we' zoo: noem daja: ja: gi aco' ajhoid' nghoid ga: myid su: shid' re" gi aco' ajhoid' nghoid.

¹⁵ Gyeing" nyang: ga ri nang gi nanyang: zo: nyid da" zoo: noem yoomo mang: nhung" dayug yug nheigloem: byo loo" nhang: nghoid rigi - hau: yug ri nang ajhed' dab zi lo" eung: - hau youg shid' re" Khristu gi shid: kham: byid: too" bye yoomo zoo: noem daja ja: nanu" zoo: yoomo hau: yug da" akyu" ri aze" jhoem" pyam' byid.

¹⁶ Nanu" ge ga: myid nyid da" khyoo: gi subi" goo" youg wi jhuang" yi lho: yooboo foin: jang: abui" nhang: goo.

¹⁷ Ngoonu" ri Mangso: mungdain: ein: da" zi gi zoo: zoo: shug shug koid' khyoo: anghoid loo za: gyeungshang: Venyi: khyo" byid: da: deingbyeing" khyoo: - myenjham" yug yo khyoo: yo" gau yi ngei pyo: khyoo: nghoid nyid.

¹⁸ Hid: khyo" wigi Khristu da" moozoo" ri voin vu su: ri Mangso: da' jheddab nheig shid: khyoo: yo" xangsu: byu yi da" coung" nghei" byid: khyoo: yo" yu wa.

¹⁹ Houg nghoid yoomo ngoonu" dayug yo" dayug myenjham" ngei loug jen" zoem" jeung" da" khyoo: bui" nhang: da" zi yo" nyang: dayoug wigi dayug ri Venyi: yoem: pyeing so' pyeing byid: da" moozoo" yi ri Khanham we yoem: kaid' zei: so' nyid boem ca.

²⁰ Zoo: noem yo" Mangso: moozoo" ri alhu: phyo. Zoo: noem dangain" gi ge zo: nghoid loug we' nang gi hau: zoo: noem ri zoo yoomo subi dayug yug ri yo" shoid' khyoo: vhang: loo" nhang: nghoid rigi - nang yooboo yo.

²¹ Re" mang: nhung" ri datu: lheing: wa nghoid rigi - shoo" nghoid loug - yhid: ri nghoid loug goo tu: ce: ja: zoo: noem ri nghoid loug we' - jang" pyam' wa ge nyid.

²² He: da" khyoo: yo" lho: nang khasu" loem" jeing" kham: yu nyid zi gi nang yo" Mangsoo: za: dase'. Nangnyang: zei: da" moozoo" gi yooboo foin: cang abo ri gi young" gyeing" rigi nang ngei lho' wa.

²³ Nghoidloug we' nang myid gyam da" nheigloem: yo" zoo: noem daja: ja: zoo: nyid su: nghoid rigi Mangsoo: gi yoobo dam byid: wa zi nghoid. Khasu" wim ga: ri -nang zo; shug khyoo: gi - loem" jeing nheigloem: moo ayang: aboo yoomo nghoid. Houg: su" loem" jeung" nheig deig khyoo: aboo loo koid' da" moozoo" dangain" gi yoo boo nghoid nyid.