PHILIPI 4 - Lacid Common Language Bible

Zei: Soo, Nhang: Da" Khyoo:

¹ Hougsu" nghoid yoomo mang nhung" yi we"- nanu" ri gye" jheddab nyid ziyo' gye" myid' boin: nheig nge nyid nanu" gi nga" da" gau yi joyoo yo' bidmug nghoid nyid ago- jheddab bang: we" hau" Aseing: yo' dayugza: bue" lho: wigi kangso' dei da" khyoo: moo geing: geing: dayab, jo, ge'.

² Eodia yo' Suntuki eig yug we"- hau: Aseing: moo abi: anhung" nghoid nyid boem ziyo' dakhyoo" ti"- nheigloem: shikain" shoin" wa shid re" ngoo re" eig yug ri mho' kaid'.

³ Nga" da" bo pang" bo thoug da" loem ge" da" byen cang phoo we"- nang khyo" we' hau: myi: yi eig yug ri bo pang" thoug yu we' khasu" wim ga: ri hau: ngei bu: lu dang: kho" kyo" da" khyoo: moo ngoo yo' dage" moo" gye" bo zei: loo bye- nya: eig yug yo' dage" Klemen yo' Mangso kang: so' mougsoug" zhayen" pug moo nyangnu" da" myeing bo- nga" da" moo" voin byen cang" gootu: we' zheung: bo.

⁴ Hau" Aseing: yo' deung: shoin" da" khyoo: moo nanu" khanham we' gau yi ngei pyo: nyid goo" baja"- ngoo deom tid ba- gau yi ngei pyo: nyid goo" baja".

⁵ Nanu" da" sam" dab, nu" nham, da" nheigloem: ri byu dangain" bang: da" shid khoin" moo toin" shid' nyid ge'- Hau" Aseing: ju" ri" wa da" ayo, gi jhang lo nyid bye.

⁶ Ce" khyoo: moo we' myid' amyo: nyid goo" nanu" da" akyu" mho' dang: khoin" khang" moo" moo-khanham we' jeju" boin: so" nheigloem: yo' nanu" ca" vho: khyoo: dangain" Mangso jhang mho' nyid ge'.

⁷ Houg: lang" byu yi se' da" nyain: dangain" tho' mo je" lid da" Mangso ngei pyoo: myenjham" khyoo: gi Khristu Yesu yo' deung: shoin" da" khyoo: moo nanu" da" nheigloem: e" myed, yo' myid soin: khyoo: dangain" moo zung" lhug byid: wa.

⁸ Mang nhung" yi we"- ce: da" ge, lho, deingmain" khyoo: young" du khyoo: deing byeung" khyoo: gyeungshang: khyoo: vho: ngei khyoo: coung" ngei byid: ge" da" khyoo:- ngi lho, khyoo: yo' coung" nghei moin: da" khyoo: joem ri damyid' yu" nyid ge'.

⁹ Ngoo tid da" khoin" thui: joem yo' ngoo zei: so' da" lo, moo" joem khyo" nanu" nga" jang" mo shau" jhau" yu bye: da" khyoo: joem ri lo, ju" khyid: yug- cang zei: loo" ge' houg: lang" ngei pyo: da" apoem: Mangsoo gi nanu" yo' dage" danyid nyid wa zi nghoid.

Pang" Thoug" Da" Jhung: shau" Yo" Yu Yoomo Jeju" Boin: khyoo:

¹⁰ Hid: yhi' gyeing" ayo, myang" lo" thang: ri nanu" da" jheddab nheigloem:- ngoori dalheing: doem, toin" shid boem yoomo ngoo gi hau" Aseing Yesu moo gye" nyang: gau yi nyid Hougsu" ein: ri shid phyang" nanu" ngoori yu" goin, coung: khyoo: ri no: pyam' byid: boem ein: tid nau zi anghoid- hau: jheddab nheigloem: toin" shid' wa shid re" akhyoo" aboo loo: bue" ein: tid nau zi we' anghoid.

¹¹ Ngoo hid: su" ein: tid da" khyoo: gi nanu" ngoori nung phoug pyam boem bye: ein: tid nau zi we' anghoid- khasu" wim ga: ri ngoo gi ngoo nyang: te: yo" gu: yo' nheig deug; lho: se' nyid ca" khyoo: ri se' yu bye.

¹² Ca" nyid yo nyid wa ziyo' agoin ayu: yo" loo: jo, lo ri khasu" nyid wa ziri we' ngoo se- yoo" zoo: yoo" shug nghoid loug- zooyoid gyid shed' nghoid loug- myoo" sho' yoo" nghoid loug- dajhi' za: te: yoo" nghoid loug- kha: joyoo moo nghoid loug- kha: yo, kha: khyeing: moo nghoid loug- nheig shid: nheig deig tung" se' nyid da" he: da" yhoem" to" zau" to" da" phajhi" ringoo se' yu bye.

¹³ Ngoori yoem: lung: so' lung: byid: da" Khristu yoomo khyoo: khaid gu: khang" moo" yo" oung; lo" da" yoem: so' ngoo yo" yu nyid.

¹⁴ Nghoid loug we' ngoo kyi" khyeug shen" yhen zi shau" nyid da" ayo, moo ngoori nanu" bo pang" thoug khyo" wigi gye" ge da" moo" ri zei: abye: go.

¹⁵ Philipi mo da" phung byu yi we"- Makedoni mung" mo ngoo thu lo wigi ngei bu: lu dang: kho" kyo" lo" da" xang: shed" ayo, moo nanu" Philipi phung daloem: za: ngoori pang" thoug kaid' da" khyoo: ri we' nanung" kyeing" ,, myaid' da" khyoo: yo' soem" lo" da" zhayen" moo ngoo yo' dage" bo kham, zoo: mo, nghoid ago" boem da" khyoo: joem ri nanu" nyang: goolhoo: se' nyid boem bye.

¹⁶ Thesaloni voomoo ngoo nyid nyid shi" da" uri lang" nanu" gi ngoo moo ca" yo lo da" uri hougsu" ca" nyid da" khyoo: ri dalheing: za: anghoid- foin: byid: nyid boem bye.

¹⁷ Hidsu" ein: ngoo tid nyid da" khyoo: gi jhung: shug jhung: lang: ri ngoo mho' nau nyid zi anghoid- nanu" da" zhayen" moo amyid' myo: loo wa ziri ngoo myang nau nyid.

¹⁸ Hid: the' nanu" byid: bye: da" zi dangain" ri ngoo yo" yu bye- zhayen" sagsi: gi he: zi nghoid bye- hau: zigi ca" tho' moo jain" sho' lang" nghoid bye- akhid" gi nanu" da" jhung: shug ri Epaphrodi ci: ri" byid: yoomo ngoo moo ca" moo ca" dangain" ri yo" yu bye- he: da" zi joem gi Mangso jang" moo xoin" to' byid: da" nam, pyo: shoem: yhang: tri" we' Mangsoo vho: ngei ziyo' lhoem: yu moin: da" xoin" du: yhang: ti" we' nghoid bye.

¹⁹ Hougsu" nghoid yoomo Mangsoo koem gi myonhoo: phung" yoeb, yo' phajhi" soid gain' athang agoin yo" jo, nyid ziyo' dakhyoo" ti"- nanu" ri Khristu khoug: moo nanu" da" ca" moo ca" ri jhoeb, pyeing" byid: wa nghoid.

²⁰ Akhid" yha" phoo Mangsoo moo pyaid moo too: moo myonhoo: phung yoeb, gi dabo jo, baja" o"- A men.

Lo" Thang Mo Vhu" Kaid Dang:

²¹ Mangso byumyu" yi nghoid da" Khristu Yesu da" thang: cang bang: dangain" mo, ri vhu" kaid' boem- hid: moo ngoo yo' dange" nyid da" loem" jeung" mang nhung" yi gi nanu" ri vhu" kaid' boem ago".

²² Hid: moo nyid da" Mangso byu yi dangain" bang: gi nanu" ri vhu" kaid' ago- je" wigi Ketha Khokham" vang" mo bang: gi gooki" lid' khyo" vhu" kaid' ago".

²³ Khristu Yesu da" jeju" gi nanu" yo' dage" dajo, jo, baja" o".