PHILIPI 3 - Lacid Common Language Bible

Main" Da" Deung Byeung" khyoo:

¹ Mang nhung" yi we" lo" thang khyo" tid shang ein: rigi hau: Aseing: moo dayug za: yo" bue" yoomo gau yi nyid ge'- shid phyang" nanu" jhang khyoo: ngoo lhid" kaid' yu" bye: da" khyoo: ri doem poug lhid" wa shid mo ngoo moo yoovoin alid" nyid loo: za: nanu" shid re" je wigi gau: nyu: khyoo: ri yo" yu nyid.

² Akhyeing" ashoeb da" moo" zei: nyid bang ri lhed' zed" nyid ge'. lakhuid" joem ri zed" nyid ge'. nyang: tu: nya: gung shoo" joem ri yham" phyed pyam bang: ri zed" nyid ge'.

³ Athang: yham" da" khyoo: agyeing" ri kham: yu mo, gi nyang: nu" anghoid- nyhang: nu" she' danghoid nyid boem- khasu" wim gari nyhang" gi Mangsoo ri nya: venyi yo' noku coung" nghei wigi Khristu Yesu moo dayug za: yo" bue" da" kangso' dei khyoo: moo gau yi phau: khuang mo, nghoid boem- ngoonu" gi noku thung" mo nghe: shoid' khyo" alhoo: aved, ri aloem" jeing".

⁴ Datid shang ein: rigi houg: yhang: te" da" moozoo" moo ngoo we' loem, khoug: jang" yoo" su: nghoid nyid nanu" mo dayug gi nghe: shoid mo aved asam" da" moozoo" joem moo loem, khoug: jang: yo" ein: jho: nghoid rigi ngoo gi je" wigi loem, khoug: jang: yoo" su: nghoid.

⁵ Ngoo gi apyaid' ngi shi" da" ayo, mo nyang:- athang: yham" ci: bye- Israela byumyu" Ben-yamin akung: ako'' yo' Hebre byumyu" yi mo we' Hebre suid" agyeing" nyang: nghoid nyid Yuda yi da" toung; to" tarha" ri cang pyeing shang ga: rigi ngoo Pharishe" nyang: nghoid bye.

⁶ Myid' loin" yoem: kaid' khyoo: ri da tid shang ga: rigi ngoo gi phung ri shen" yhen loo su: nghoid- tarha" cang byeung" shoid, khyo" deing byeung" khyoo: ri tid shang ein: rigi ngoo moo ce" yooboo we' adab-

⁷ Nghoid loug we' shid phyang" nga" shid re" amyaid' nghoid bye" ein: soin" to" da" khyoo: dangain" gi akhid" uri gi Khristu yoomo soem" lo" khyoo: nghoid ein: ngoo soin: pyam' bye.

⁸ Mau: tho' moo gootu- nga" da" Aseing Yesu Khristu ri yo" se' boin: gyeung: lo da" khyoo: gi gu, jhoo: aphoug" dangain" tho' moo je" phoug" dab, thang zi nghoid yoomo ngoo yoo" mayoo" dangain" gi soem" pyam' bye" ein: soin: pyam bye- ngoo yoo" mayoo" dangain" gi soem" pyam bye- ngoo Aseing: shid' re" nga" ziyoo jonu" dangain" ri she: pyam' bye- Khristu ein: da" amyaid' ri yo" yu wa ziyo' Khristu yo' dadeing: daloem: za: yo" bye" loo" wa shid re" jo, moo jo, ri joid' nhoin soid' boem ti" soin: pyam bye.

⁹ Ngoo gi toung: to" da" tarha" ri cang byeung" yhe: lo" khyo" wigi deing" byeung" khyoo: ayo" yu- akhid" Khristu ri loem" jeung" lo khyo" wigi deing byeung" khyoo: ri ngoo yo" yu bye_ hau: khyoo: gi loem" jeung" yoomo Mangsoo byid: da" nheig khyeug jeju" jhung: shug za: nghoid nyid.

^10-11 Ngoo gi Khristu ri yo" se' lo khyoo: Nyang: doem dei to'' lo da" yoem: vhoo" ri shau" myang kham, zo: wigi ngoo nya: gung du: nyang: shid: jang" mo doem dei to'' yu wa ziri nheig byu zoore- nya: da" shid: kham: ziyo' du goo" wa ziri za: ngoo vho: ngei nyid.

Bain: Zeing Khyoo: Khaid' Gei Lo" khyoo:

¹² Ngoo gi akhid" lang" he: da" khyoo: moo oung: doid' bye: ein: we' joeb, byeung" bye" ein: we' atid noug- Khristu nyang: ngoori nya: da" byu bue" loo nhang: bye: yoomo ngoo we' jhung: shug ri yo" yu sho' yoem" kaid' lho: gei loo" bye- ngoo gi hau: jhung: shug ri yo" yu sho' we' shid moo jo, da" zi joem ri myhi: sho' we' nga" thang: mo khyoo: dangain" ri to" myhed' pyam.

¹³ Mang nhung" yi we"- ngoo gi hau: jhung shug ri yo" yu bye: ein:- gyaing" nyang: ngoo amyid- nghoid loug we' ngoo koid da" khyoo: dangain" gi nga" nung thang mo zi joem dangain" ri ngoo to" myhed pyam' wigi shid moo jo, da" zi jeom ri yo" myhi: loo" sho' yoem: kaid' yhe: lo.

¹⁴ Hougsu" nghoid yoomo ngoo gi hau" jhung: shug ri yo" yu wa shid re" bain: zeing ju" sho' dain" dain: yoem: kaid' gei yhe: lo- hau: jhung shug gi moug: khung: moo kangso' yo" dei nyid sho' Khristu Yesu khyo" wigi Mangsoo khe: yu da" khyoo: nghoid nyid.

¹⁵ Venyi khyoo: moo nheig bo lho: myheung yang" bye: da" ngoonu" gi he: da" myid nyid azoo" yo' dakhyoo" ti"- myid nyid ca" boem bye- nghoid loug we' nanu" dayham" moo adu go" khyoo: ri myid nyid mo, to boo shi" nghoid loug we' Mangsoo gi hau" khyoo: ri we' myang se' loo nhang: shi" wa zi nghoid.

¹⁶ Kha: khyo" nghoid loug we' ngoonu" gi akhid" nyid" ju" sho' ngoo nyang: cang lid loo bye: da" akhyoo" aved, joem yo" dakhyoo" ti"- shid' khyoo: jhen" yhe: lo" nyid boem shang.

¹⁷ Mang nhung" yi dangain" mo we"- nanu" dangain" nga" jang" mo khooshid: ri yu" yu ge'. ngoonu" toin" shid' too" bye: da" akhyoo" again ge da" khooshid: ri yu" yu lho: cang loo" bang: ri yu" xoem" nyid ge'.

¹⁸ He: khyoo: ngoo nanu" ri shid' phyang" myoo" sho' lheing" tid kyo" yu" bye- akhui" we' ngoug byid' yo' doem poug tid kyo" nyid Khristu gi pyang" zeing tho' moo kham" shid: da" khyoo: ri gyi koid lho: kangso' di nyid bang: myoo" sho' bo.

¹⁹ Houg: bang: gi ngarai mung" moo nyangnu" da" khyoo: lo" thang wa zi nghoid-khasu" wim gari houg: bang: da" Mangsoo gi nyangnu" da" voem: doug: ein: da" gung sho" vhoo: boo myo, no, da" khyoo: nghoid nyid nyangnu" gi asho' ashid: da" khyoo: ri myonhoo: sho: phau: khuang nyid boem ziyo' he: mougmyid mo da" zi yoo joem riza:- nheig tei" nyid boem ago".

²⁰ Ngoonu" koem gi moug: khung; mo da" mung" byu yi nghoid boem yoomo moug: khung: moug di mo ngoonu" da" khyoid yu Aseing Yesu Khristu ri shau" goo" wa kang: lung bu dalang" nyid boem.

²¹ Nyang: gi jo, moo jo, ri nya: vhoo: moo yo" kaid' pyam da" phung" yoeb, yoem: moo" bo nyid ziyo' dakhyoo" ti"- ngoonu" da" shid: loo" se' gung du: joem ri thed' pyam' lho: nya: da" myonhoo: phung" yoeb bo gung du: yo' du goo" sho' aseig thid' byid: loo wa zi nghoid.