PHILIPI 2 - Lacid Common Language Bible

Khristu Da" Khyo, Nyhoem: Ziyo' Bug Thu' Sheung" Jhu" Khyoo:

¹ Nanu" gi Khristu yo' dage" kangso' dei nyid boem yoomo yoem: so' byeung" lo boem ziyo' - nya: jheddab nheigloem: gi nanu" ri nheig teing ung: teing byid: ziri shau" yu boem bye- hau: tho' moo venyi: moo zoem" khau: zi shau" ziyo' nyang: cang" nyang: athang agoin khyoo; ri shau" kham: yu nyid boem.

² Hougsu" nghoid yoomo nanu" gi myid soin: khyoo dakhaid za:- nheigloem: sham: shoin" go" khyoo: dakhaid za: yo' nheigloem: daloem: za: khyo" wigi ngoori joeb byeung" da" gau yi khyoo: yo" yu nhang: goo" la' ein:- ngoo nanu" ri yoem: byid: dang: sang: kaid.

³ Phau: khuang nghoid boin: da" nheigloem:- nya: akyu" ri za: shoo: nau da" nheigloem: yo' ci" we' akoid nyid goo"- subi" gi nga" tho' re" je gi mo, nghoid ein:- khanham we' myid yu zoore"- sube" vhoo: moo khyo, nyhoem: zoem" khau: nyid ge'.

⁴ Yug khang" moo" nyang: nya: akyu" ri kyeing" sho: khyo" anghoid loo: za: byu gooji yi da" akyu" ri sho: nyid ge'.

⁵ Khristu Yesu moo bo da" nheigloem: nyang:- nanu" moo we' boo ge'.

⁶ Nyang: gi khanham we' Mangso gung yo' joeb byeung" sho' nyid nyid zi nghoid loug we' Mangsoo yo' dakhyoo" ti" nghoid nyid wa shid re" mi, shi, go" khyo" amyid loo: za.

⁷ Hougsu" koid wa gung khoo:- nyang: nya: kang: lung bu, ziyo' dakhyoo" ti"- Nyang: nya: yoo" moo yoo" ri tu: mhoug pyam' kho' lho: join, mhug ri re" zhoung" yu wigi xangsu: byu yo' du sho' bue" thu' loo bye.

⁸ Hougsu" nya: gung ri khyo, nyhoem: pyam wigi tam" gyo: da" khyoo: moo shid: jang" moo ju" sho'-cang so" loo" bye- gyeing" nyang: pyang" zeing moo shid: jang" moo ju" sho' tam" gyo: nyid.

⁹ Houg: khyo" nghoid yoomo Mangsoo gi nyang: ri myhang: thang joyoo moo ju" sho' tu: to' kaid wigi myeing khyang" dangain" tho' moo je, gyi: da" voolang myeing yung" khyang" ri byid: too" bye.

¹⁰ Houg: yoomo moug: khung: moug di tho' mo mougmyid' gyab, yo' vho: pyam: mo da" poind' lug dangain" gi Yesu da" voolang myeing yung" khyang" ri tu: to' tu: coung" phau" myang vhu" pid' pid' zoore"- poid thug thoug nyid boem wa nghoid.

¹¹ Phoo, Mangso da" myo, nhoo" phung" yoeb shid re" Khristu gi Aseing: nghoid nyid" ga: wigi yhoo: dab, moo dab, gi tid fu" yhen: yu nyid boem wa nghoid.

Moug Myid Moo Bid Bang Yhang: Ti" Doug Bang Jo, Wa Khyoo

¹² Houg: su" nghoid yoomo ngoo jheddab nyid bang: we"- nanu" yo' ngoo dage" nyid da" ayo, moo nanu" khanham we' nga" dang: ri tam" gyo: nyid boem yhang: ti"- akhid" nanu" yo' ngoo ve: gang: nyid da" ayo, moo we' nga" da" dang: ri tam" gyoo: wa zigi je" wigi yhoug: gyen: zeing nyang: nghoid nyid houg: yoomo nanu" da" khyoid yu khyoo: joeb, byeung" loo sho' gyoug nain" ziyo' cang pyeung nyid ge'.

¹³ Khasu" wim ga: ri Mangsoo gi nya: da" myid vho: khyoo: ri nanu" tam" gyo: cang loo" nau, da" myid yo' cang lo" nhang: da" yoem: vhoo" ri nanu" yo" yu goo" baja" ga- Mangsoo gi nanu" moo khanham we' moo" dazei: byid: nyid.

¹⁴ Nanu" koid ca" da" moozoo" ce" ja" khyoo: ri we' ngeug go" lho: nheig yoo: nheig jhug akoid nyid goo.

¹⁵ Houg: su" koid nyid lang" nanu" gi akyang" alai byo, yoin" lho: yooboo yoo" bang: ga: goo" wa. He: mougmyid tho' moo ce" yooboo we' adab loo: za: nheigloem: gyeungshang: da" Mangso nya: zoo: yi yhang: ti"- bue" loo: goo" wa zi nghoid-Hougsu" nanu" gi kangso dei da" mungdang: ri kho" kyo" nyid zoore" moug: khung: goin" ziri thoin" pang byid: da" bidbang gung du: yi yhang: ti"- nyangnu" da" mo, phung: gung moo thoin" pang byid: nyid boem, ca" wa nghoid.

¹⁶ Nanu" hougsu" koid nyid boem nghoid rigi ngoo yoem: kaid' lho: voin, vu, khyoo: gi akoem: amyed anghoid loo: yoomo Khristu da" bidnyid moo nanu" yoomo ngoo gi gau yi phau: khuang joyoo nghoid.

¹⁷ Ngoori said' pyam zi to shau" nghoid rigi nanu" da" loem" jeung" phoin: tho' moo nga" da" suid" rixoin" to' gyid: ca" nghoid loug- ngoo gi gau yi nyid nanu" dangain" bang: yo' we' gau yi nyid.

¹⁸ Houg: yo' dakhyoo" ti"- nanu" we' ngoo yo' dage gau yi nyid ca" boem.

Timothi Yo' Epaphrodi Da" Khyoo:

¹⁹ Ngoo gi nanu" jang" mo ludang: shau" gyo: wigi yoem: yo" yu baja"- Mangso da" myed, vho: khyoo: nghoid rigi Timothi ri khamyhang amyang" ri nanu" jhang khyoo: yo" nhang: kaid' abe ein: - ngoo myid byu nyid.

²⁰ Timothi nyang: kyeing" za: ngoo yhang: ti"- nanu" da" ge, khyo: shid' re" bo ci' byid: su nghoid.

²¹ Byu gooji dangain" mo, gi-nyang: tu: nya: khyoo: ri za: seing" kho"- gung youg yau nyid boem ago- Khristu Yesu yo' sen: da" khyoo: moo myid' abo boem nghoid ago".

²² Nya: zoo: gi nya: phoo ri bo pang" thoug yhang: ti"- hau: gau yingei bu: da" lu dang:- Kho" kyo" fu" pyo: lo" da" khyoo: moo ngoo yo' dage" moozoo" ri bo voin, vu, theung shang" nyid yoomo nyang: gi khayhi' phoug" dab, su: nghoid ziri nanu" nyang: si' bye.

²³ Hougsu" wigi nga" khyoo: khasu" bue" loo wa ziri ngoo si' lang" hau: yug ri nanu" jhang khyoo:- nhang: kaid' wa ein: ngoo myid byu to.

²⁴ Hau: tho' moo gootu: khamyhang ade: myang" ri ngoo nya: gung nyang: we' nanu" jang" moo ju" ri" wa nghoid ein:-hau: Aseing: moo myid loem nyid.

²⁵ Hau: lho: wigi nanu" da" mang nhung" phoo nga" moo" zei: byen, cang" yo' dage" za: meing: zain: jang: mo, byen, cang" gyidzoo: phoo- ngoori bo pang" wa shid re" nanu" nhang: kaid' byid: su- Epaphrodi ri nanu" jhang khyoo: nhang: nyang: doem nhang: kaid' wa ein: wigi ngoo myid nyid.

²⁶ Nyang: gi nanu" dangain" bang: yo' gye" shau" goo" nau nyid khasu" wim ga: ri nyang: yhe: no da" khyoo: ri nanu" shau" gyo: boem yoomo nghoid.

²⁷ Gyeing" nyang:- nyang: gi alug lug shid: sho' noo bye: nghoid loug- Mangsoo ginyang: ri nheig khyeug nyid nyang: ri za: we' anghoid- ngoori koug shu: zi azeing dapyam: yo' dapyam: ashug" baja" ga- nheig khyeug yu byid: bye.

²⁸ Houg: yoomo nanu" gi nyang: ri doem shau" myang wigi shau" gau yi wa ziyo' nga" da" kougshu: khyoo: we' byug loo" baja"- nyang: ri nanu" jhang khyoo: nhang: kaid' wa zi ngoo je" myid hain: nyid.

²⁹ Houg: yoomo nanu" nyang: ri Khristain mang nhung" phoo dayug khyo" wigi lhoem: tau, yu ge'. houg: yhang: te" bang: ri phau" myang: byid: ge'.

³⁰ Khasu" wim gari nyang: gi nanu" ayo" byid: da" pang" thoug khyoo:- ngoori byid: wa shid re" kangso' rinoung" pyam lho: Khristu da" moozoo" ri alug lug shid: sho' voin vu, yoem: kaid' lid lo abye:.