PHILIPI 1 - Lacid Common Language Bible

Vhu" Kaid Da" Mungdang:

¹ Khristu da" join, yi nghoid da" Polu yo' Timothi gi Philipi voo moo nyid nyid da" phung vhoeb, phung tau bi: yo' dage" Khristu Yesu moo daloem: za: nghoid da" Mangso gyeungshang: byumyu" yi bain' sho' bang: jang khyoo: mougsoug" lhid" kaid.

² Ngoonu" da" Phoo, Mangsoo yo' Aseing: Yesu Khristu jang" mo, jeju" yo' ngei pyo: da" khyoo: gi nanu" moo dajo, jo baja" o".

Philipi Phung Byu Yi Shid Mo Polu Akyu" Mho Khyoo:

³ Nanu" da" khyoo: ri ngoo myid boin" soin: yu" nyid ayo, dangain" jang" moo_ Mangso jeju" ri ngoo coung" nghei nyid.

⁴ Ngoo nanu" shid mo, akyu" mho' da" ayo, khang" moo" moo gau yi nheug loem: yo' mho' byid: nyid.

⁵ Khasu" wim gari ngeibu: ge: da" moozoo" ri ngoo voin, yu, shed" lo da" bidnyid mo akhid" nyid" ju sho' hau" ngei bu lu dang: kho" kyo" da" khyoo: moo ngoori bo pang" thoug voin, vu, lid lo boem bye.

⁶ Hougsu" nghoid yoomo nanu" moohe: da" ge moozoo" ri zei: shed" too" byid: su: Mangsoo gi Khristu Yesu doem gyoo" loo wa bidnyid moo hau: moo" ri joeb byeung" sho' zei: too" goo" wa" ein: ngoo myid loem nyid.

⁷ Ngoo nanu" da" atho' moo too" byid: da" myid' gi young" du nyid khasu" wim ga: ri nanu" ri jheddab nyid da" khyoo: gi nga" da" emyid moodabo jo. Nanu" dangain" bang: gi ngoo thung: loung" jo, uri nghoid loug we' ngoo ngei bu: lu dang: ri kho" kyo" zoore"- geung: teing jo, nhang: uri nghoid loug we' Mangsoo ngoori byid: da" akhang" jeju" ri bo kham zoo; mo, nghoid ago".

⁸ Ngoo gi Khristu Yesu nyang: myid moo bo da" ashoem: apyang: da" myid yo' nanu" ri myid boin: nheug nge nyid ein: ngoo tid nyid da" dang: deung nyid da" khyoo: gi Mangsoo gi nga" sagsi: nghoid.

⁹ Hau" tho' moo nanu" da" jheddab nheigloem: gi je" gyi: sheung: lo wigi se' yeung jang" moo joeb, byeung" da" dang: phyed' dang: kho' da" yoem: vhoo: yoo" goo" baja"- nanu" shid re" ngoo akyu" mho' nyid.

¹⁰ Houg: lang" she' nanu" gi Khristu doem ju" re" da" bidnyid moo ayung" alhoo, aco' ajhoid khyoo: mo loid lo" lho: - yooboo adab bang: bue" wa zi nghoid.

¹¹ Nanu" da" kangso' dei khyoo: moo Yesu Khristu za: date: yo" byid: da" ge, da" aved asam" ein: da" ashi" yo' joeb byeung" lo wigi mangsoo da" myonhoo: phung" yoeb, ri coung" nghei tu: to' zi shau" wa nghoid.

Kangso Dei Nyid Zigi Khristu Nyang: Nghoid.

¹² Hau: lho: mang: nhung" yi we"- ngoo moo bue" lo da" khyoo: joem gi hau: ngeibu: ludang: gyi: sheung: loung: loo wa shid re" gyeng" nyang: bo pang: thug byid: wa shid re" bui" lo khyoo: nghoid ziri nanu" ri si' nhang nau.

¹³ Hau: khokham" da" yhoem: moo" ri zung" lhug da" gyizoo: yi dab, goin" yo' hid: moo nyid bang: gootu: dangain" ri ngoo thung: loung" zigi Khristu da" dei zoo: koid yoomo nghoid khyoo: ri se' lo" boem bye..

¹⁴ Hau: tho' moo gootu: ngoo thung: lung" yoomo mang: nhung" yi myoo: loo boug gi Hau: Aseing: moo loem" jeung" nheug loem: je, to' lo wigi Mangso mungdang: ri agyug avoem loo: za: tid kyoo" wa da" khyoo: je" wigi voem lo ago".

¹⁵ Gyeung" nyang: nyhang" mo dayham" gi no" zoo yoomo myeung" myoo: nau boem ziyo' kho" kyo" nyid ago". Nghoid loug we' gootu: bang: gi-young" gyeung" ge, lho, nheigloem: yo' kho" kyo" ago".

¹⁶ Houg: bang: gi ngei bu: lu dang: ri goem, loem byid: wa shid re" ngoori khyen: nyheung to" khyoo: ri nyangnu" se' nyid boem yoomo jheddab nheigloem: yo' kho" kyo" nyid boem ago".

¹⁷ Hau: lho" gootu: dayham" bang: gi gyeungshang: da" nheigloem: yo' anghoid loo: za: nyang: nya: da" akyu" sho: khyo" kho" kyo" ago- nyangnu" gi ngoo thung: moo loung jo, uri nga" tho' moo shid: gyoin noo gyoin je myo: loo wa shid re" myid soin' nyid ago".

¹⁸ Kho" kyo" da" akhyoo" again joem gi ce: yhoug: gyen: khyoo: anghoid- anoug angei da" nheigloem: khyo" nghoid loug we' deingmain" da" nheigloem: khyo" nghoid loug we' khyoo: khaid khang" moo" Khristu da" khyoo: za: kho" kyo" nyid boem nghoid rigi hau: khyoo: moo ngoo gau yi nyid - gyeing" nyang: ngoo xo' lho: gau yi ngei bu: nyid shi" wa nghoid.

¹⁹ Khasu" wim ga: ri nanu" akyu" mho' da" khoin" thui: joem yoomo we' Yesu Khristu da" venyi bo pang" thoug yoomo we' ngoo gi lhoid pyoin kaid' zi shau" wa nghoid.

²⁰ Ngoo gi khanham we' ngoo nya: yoovoin moo sho' athu sho' ayo, khang" moo" moo nghoid loug we' je" wigi akhid" uri nghoid loug we' agyug avoem da" yoem: vhoo" azeing yo' byeung" jo, zoore"- ngoo gi dei nyid loug shid: loo" loug we' nga" da" kangso' gyung: khyoo: bain sho' moo Khristu da" myonhoo: phung" yoeb, ri bang thu loo nhang: wa da" khyoo: gi nga" da" vho: ngei thang ziyo' nheig byu khyoo: nghoid.

²¹ Khasu" wim ga: ri ngoo kangso' dei nyid zigi Khristu nyang: nghoid- shid: lo" ri we' amyaid' nghoid bye.

²² Nghoid loug we' nga" gung du: moo kangso' dei nyid shi" ziyo' akyu" bo da" moozoo" myoo" sho' yo" zei: shi" nghoid rigi dei nyid wa ziyo' shid: loo" wa khyoo: kha: khaid ri ngoo khyen: yu wa zi asi.

²³ Ngoo gi khyoo; eig khaid da" agyoo: moo nghoid nyid wigi shoid' khang" moo" khyo" lang: lo" nyid ziri ngoo shau"- ngoo gi akhid" dei nyid da" kangso' khyoo: ri to" pyam kho' lho: Khristu yo' dage" kang: so' dei nyid noug bye- houg: gi nga" shid re" je" ge zi nghoid.

²⁴ Nghoid loug we' nanu" da" shid re" ngoo kangso' xo' dei nyid wa zigi je" yhoug: gyen: da" khyoo: nghoid.

²⁵ He: da" khyoo: ri ngoo goolhoo: za: se' gyoo; bye: yoomo ngoo nanu" yo' dage" xo' nyid nyid wa zi ri se- nanu" ri je" gyi: sheung: loung: loo nhang: wa ziyo' loem" jeung" jang moo gau yi nyid wa shid re" ngoo nanu" dangain" bang: yo' dage" nyid nyid wa ziri se' nyid.

²⁶ Hougsu" nghoid yoomo ngoo nanu" jang" moo doem ju" lo da" uri ngoo yoomo nanu" da" phau: khaung joyoo- Yesu Khristu mooje" wigi loung: lo boem wa zi nghoid.

²⁷ Akhid" uri nanu" shid re" je" ca" thang da" khyoo; gi Khristu Yesu da" ngei bu: lu dang: yo' du veung" moin: yi" khyo" kangso' dei nyid boem ca"- hougsu" nghoid lang" gi ngoo nanu" jang" moo ju" re" uri nghoid loug we' aju" re" uringhoid loug we' nanu" gi nheigloem: sham: shoin" go" lho: theung shang" yab, jo, wigi myid to" khyoo; dakhaid za: yo,- hau" ngei bu: lu dang: da" loem" jeung" khyoo: shid re" dage" za: zain: shi" go" nyid da" khyoo: ri ngoo shaug" gyoo: wa zi nghoid.

²⁸ Nanu" gi hau da" gyi voo joem ri agyug nyid goo" khanham we' yoem: zeing so' zeing bo nyid ge'- hougsu" koid da" yhe, khyoo; gi nyangnu" soem" joem: lo" lho: nanu" gi oung: doid lo" da" alhoo: sagsi: bue" nyid wa khasu" wim ga: ri nanu" ri oung: doid lo" da" khyoo: byid: su: gi Mangsoo nyang: nghoid nyid.

²⁹ Khasu" wim ga: ri nanu" gi Khristu ri loem" jeung" khyo" za: we' anghoid shi"- nya: shid' re" shen" yhen jam jau kham khyo" we' Aseing: da" moo" ri voin vu, akhang" jeju" gam, byid: zi shau" abye: go.

³⁰ Akhui" nanu" gi ngoo yo' we"- meing: zain: jang: moo shau" vang yhe: boem abye: go"- hau: khyoo: gi lid: loo bye: da" ayo, moo ngoo thoung" shau" nyid da" meing: zain: khyoo: ri nanu" myang yu" wigi akhid" ngoo thoung shau" nyid da" khyoo; ri nanu" shau" gyo: nyid da" meing: zain: khyoo: nghoid nyid.