Pang Shug 9 - Lacid Common Language Bible

¹ Hau: thang: ri wim: yug ein: wa yug- moug: lagyoo: gi laboo" doem moid kaid lang" moug: khung: mo wigi myidjang: tho' khyoo: - kyi: zeing dacab, shu: gyo" jo, bye: ziri ngoo myang- Hau: kyi: ri no, athang da" dung: khuang" mo khoem" thoug" ri ab, byid: to.

² Hau: kyi: gino, athang da" duang: khuang" ri phang kaid uri myi khoug" gi myikhyoem, moo" zeing mo thu lo da" myikhoug" yhang: te" da" zi hau: duang: khuang" khoug: mo neung" thu' lo nyid Hau: myikhoug" zoo" yoomo bid yo' moug: laid moug: khung: gi ceug yo' no, loo" khari" bye.

³ Hau: myikhoug" khoug: mo jhen" khyeig joem gi myidjang: tho' moo gyo" lo- nyangnu" moo gung goug" joem, da" dug yhang: te" zi bo boem.

⁴ Houg: bang: gi seig gam voogam, joem yo' gootu: mhain" nyoug pho, nyoug joem ri ze" shoin, wa da" amyeing" ayoo". Ngeilang: moo Mangso byu yi da" dazid' adab bang: ri za: yo" shen" yhen jamjau byid: wa da" amyeing" yo" boem.

⁵ Hau: mung" byu yi ri yo" said' pyam wa da" amyeing" we' ajo. Lham" moo" wim: khyab, za: yo" shen" yhen nyid wa da" amyeing" yo". Hau: jhen" khyeug shau" ngaid' mo, gi gung gau" paid' da" dug yhang: ti"- gye" khe" no nyid boem wa zi nghoid.

⁶ Hau: lham" moo" wim: khyab, da" ayo, gu: moo nyangnu" gi shid: khyoo: sho: nyid boem wa zi nghoid- nghoid loug we' shau" sho: boem wa zi anghoid. nyangnu" gi gye" shid: nau boem nghoid loug we' shid: zoug: gi nyangnu" riphang: lhei" too" khari" wa zi nghoid.

⁷ Hau: jhen" khyeig joem gi gyipui" vang wa ga soin' shab, to" da" myang: joem yo' du nyid. Nyangnu" da" vhuloem moo sheing: bidmug zhoung" ci: boem ziri ngoo myang Hau: lho: nyangnu" da" myonhoo: gi byu da" myonhoo: yo' du nyid boem.

⁸ Nyangnu" da" xam: gi myiyi: zoo yi da" xam: yo' du nyid nyangnu" da" zei joem gi khang khyi zei yo' du nyid ago".

⁹ Nyangnu" da" yang gang moo gi joto' yo' du da" yang gang nghoeb ri zheung: nghoeb ci- hau: lho: nyangnu" da" dung joem fe: myheung da" thui: gi gyipui" vang wa koin" gei yhe: lo" da" myang: rheing" myoo" sho' loem: myeung da" thui: yo' du nyid.

¹⁰ Nyangnu" da" shoo" myi: gi gung gau" shoo" myi: yo' du nyid boem wigi dug bo nyid. Nyangnu" da" shoo" myi: gi byumyu" yi ri lham" moo" wim: khyab, ju" sho' paid' wa da" yoem: bo nyid.

¹¹ Nyangnu" ri vhoeb, khang" nyid da" Khokham" gi no, athang da" duang: khuang" mo lagyoo: nghoid. Nya: da" myeing gi Hebre myeing" khyo" Abadon ga: Heleni myeing" gi Apolion nghoid. (Hau: da" dangkang: gi (Lhu: phyo' su) ga: zi nghoid.

¹² Xang: shed" mo gyoug pho" joem: thang lo" khyoo: gi lid loo bye. Hau: thang: riju" loo shi" wa da" gyoug dain' noem eig ja: jo, ashi".

¹³ Hau: thang: ri khyug yug ein: da" moug: lagyoo: gi nya: laboo" ri moid kaid. Mangso shid' khoin" moo jo, da" sheing: xoin" to' phoin: myid: jhoin: mo thu' lo da" thui: ri ngoo shau" gyo.

¹⁴ Hau: da" thui: gi khyug yug ein: da" moug: lagyoo: ri Uphraid' gyid moo" lang moo tei" to" da" moug: lagyoo: myid: yug ri phoid: kaid' we"- ga: tid.

¹⁵ Houg: su" phoid: kaid' zi shau" da" mau: lagyoo: myid: yug gi tei" to" jang" mo loid byoin, lo" ago". Nyangnu" gi hau: ayo, hau: bidnyid, hau: lhoo, khyab, hau: zain, ved, moo mougmyid xang: su byu yi dangain"- soem" boem mo daboem ri said' pyam' wa shid re" jen" jen" soin' too" shau" mo, nghoid ago".

¹⁶ Myang: zhoung: da" gyiphung yi gi Vain, eig shoo: nghoid- ga: ziri ngoo shau" gyo.

¹⁷ Hau: lho: nga" da" yoeb, myang moo ngoo myang zigi myang: joem yo' houg: moo zhung: bang: ri myang. Nyangnu" gi myi: yhang: ti" byang: byang: ne, da" yang gang nghoeb, yo' Nila nyoug yang gang nghoeb yo' fang yhang: ti" shui: da" yang gang nghoeb- joem ri nghoeb, ci: ago.myang: joem da" vhuloem gi khang:' khyi, vhuloem yo' du lho: nyangnu" da" nhoid khoug: mo myiyham: myikhoug" yo' fang nge" thu' lo nyid.

¹⁸ Myang: nhoid khoug: mo thu' re" da" myiyham: myikhoug" fang myi:- hid: shen" yhen khyoo: soem" ja: khyo" wigi mougmyid byu yi soem" boem mo daboem gu: ri bain said pyam bye.

¹⁹ Myang: joem da" yoem: so' gi nyangnu" da" nhoid khoug: yo' shoo" myi: moo bo- nyangnu" da" shoomyi: gi lhang: myu, joem yo' du lho: vhuloem dab, boem wigi xangsu: byu yi: ri hau: ziyo' thei" ago".

²⁰ He: da" shid gyoin, mo deung nyid mo, gi nyangnu" koid da" lo, moozoo" mo nheigloem: athed, lo boem shi" nghoid ago". Nyangnu" gi yu joem ri we' myo, we' amyang nu: we' agyoo: ayo" so" yen" da" sheing: gyid: lugboem seig thung" yo' koid to" da" phara" soolhoo joem ri anoo: loo: dano" nyid boem ashi" go.

²¹ Nyangnu" gi byu said' ziri we' main: tain: khyau" khyoo: ri we' aved avhu: koid khyoo: yo' khau" da" moozoo" mo we' nyangnu" nheigloem: athed, lo boem.