Pang Shug 7 - Lacid Common Language Bible

Israela Byumyu" 144000

¹ Hau: thang: ri moug: lagyoo: myid: yug gi mougmyid' ajhoin: myid: shoid moo yab, jo, lho: nyangnu" gi tung: goung myidjang: tho' moo yo' Panglai gyid thoem" tho' moo we' seig gam dangain" tho' moo we' lid' ayo" hau, loo wa shid re" myid: shoid goin" mo lid' ri zei: zeung ci: boem, ziri ngoo myang.

² Hau: thang: ri apyaid atoo: dei nyid da" Mangso dazid' ri ci: ri" su:- bidthu shoid mo moug: lagyoo: dayug ri ngoo myang- nyang: gi moug myid yo' panglai ri yo" phyo' shoin pyam da" yoem: so'- Mangso wigi byid: to" zi shau" da" moug: lagyoo: myid: yug ri thui: zeing yo' nyho: yoid zigi

³ Ngoonu" da" Mangso byu yi da' ngei lang: moo- dazid' ashau" baid tab byid: shi" ri Nanu" gi mougmyid ri we' panglai yo' seig gam joem ri we' ce: ja" dam, we' atab shi' goo",, ga: tid nyid.

⁴ Hau: thang: ri dazid' bain tab too" bye: bang: da" nghab youg ri ngoo shau" gyo:- Hau: nghab youg joem gi 144000, bo lho: - Israela daxe: eig kung: mo bang: nghoid.

^5-8 Damoin" eig khyeing" khyeing" dazid' thoung" tab byid: zi shau" da" amyu akung: ako'' yi gi Yuda Rubin Gaid Ashu Nabthali Manashe Simon Levi Yishakha Zebulon yo' Yoseb Benyamen nghoid nyid.

Myo: Thang da" byu Phung: moo".

⁹ Hau: thang: ri ngoo doem yu" kaid uri hang" we' ayo" tho' nghab lo: da" byu phung: moo" ri myang kaid- nyangnu" gi byumyu" byu kung:- azhang" cang: joeb ziyo' myeing" acang: joeb, kaid' mo, nghoid nyid boem. Nyangnu" gi byiphyu: sheing: ri void ci: boem lho: nyangnu" da" lo, moo gi zhain lun kyang: ri ci: wigi zhung: tang yo' yang nu" da" shid khoin" moo zheung: yab, jo, boem.

¹⁰ Nyang: nu" tid nyid boem zigi khyoid yu da" jeju" gi zhung: tang tho' moo zhoung: jo, su: ngoonu" da" Mangsoo yo' yang nu" jang" mo yo" yu zi nghoid- ga: wigi thui: moo" yo' yoid nyid boem.

¹¹ Mouglagyoo: dangain" mo, gi zhung: tang ri we' Ludaid yi ri we' dei noem gougnyhoug myid: ja: ri we' lheung khab, yab, jo, lho: nyangnu" gi zhung: tang shid' moo goeb, gyo" lho: Mangsoo ri coung" pid' nyid boem zigi

¹² Amen Ngoonu' da" Mangsoo ri apyaid atoo: moo coung" nghei tu: to' nyid boem wa"- Mangsoo gi myonhoo: phung" yoeb, phajhi" juyhi: bug thu sheing" jhu"- myonhoo: ngeilang: phoug" tab ngi shab, byid: zi nya: da" jeju" ricoung" nghei nyid boem baja"- Amen, ga: nyho: coung" nyid boem.

¹³ Ludaid yi mo dayug gi Houg: ri " byiphyu: void ci: mo, gi hang" nghoid go" lha" kha: yo thu' loo mo, nghoid go" lha"» ga: myid: .

¹⁴ " Aseing: we" ngoo ase' Nang dase', ein: ngoo phoug tu". nyang: ngoori tid zigi " Houg: bang: gi sho" jhen: jamjau shen" yhen gyoug pho" akhoug: mo loid byoin thu' loo mo, nghoid- nyangnu" da" byisheing: joem ri yang nu" da" suid" wigi moin: phyu: sho' bain ced" phyu: boem bye.

¹⁵ Houg: yoomo nyangnu" gi Mangso zhung: tang shid khoin" moo zheung: yab, jo, lho: nya: da" Mangsoo yhoem: moo" moo nyid" ri myen" ri coung" nghei noku nyid boem. Zhung: tang tho' moo zhoung: jo, su: we' nyangnu" yo' dage" nyid lho: nyangnu" ri yu" goin, yu" coung: nyid.

¹⁶ Nyangnu" gi thang: phyang" khanham we' zooyoid gyid shed ziyo' bid lhab, nge" loung zi we' shau" loo: goo" wa zi anghoid loo.

¹⁷ Khasu" wim garizhung: tang agung moo nyid da" yang nu" gi nyangnu" da" yang zung" su: nghoid wa wigi kang: so' gyid bug ju" sho' - shu" vhu" zung" lhug yhe: loo" wa su: nghoid. Hau: tho' mo Mangsoo gi nyangnu" da" myojid" mo ngoug byid' dangain" shang" shang soid pyam byid: wa zi nghoid- ga: tid nyid.