Pang Shug 5 - Lacid Common Language Bible

Moug Soug Deing: Yo' Yang Nu"

¹ Zhung: tang tho' moo zhoung: jo, su: da" lo, yo lo, moo mougsoug" deing: ci: nyid ziri ngoo myang- hau: mougsoug" deing: moo dazid' nyhed loem: yo' thoung" tab to" lho: athi" atho' moo mougsoug" byeing sho' lhid" tab to.

² Hau: thang: ri yoem: moo" bo da" moug: lagyoo: dayug gi Hang" su: gi he: da" dazid' joem ri yo" shed, lho: he: mougsoug" deing: ri pei: moin: yi" wa lha". ga: thui: moo" yo' yoid nyho: nyid ziri ngoo myang.

³ Nghoid loug we' moug: khung: yo' myidjang:- myidjang: akhoug: moo we' hau: mougsoug" deing: ripei: wa moin: yi" su: yo' akhoug: moo yo" yu" su: dayug we' aboo.

⁴ He: mougsoug" deing: ri pei: wa moin: yi" su: yo' nghab wa zi moin: yi" su: dayug we' ashau" myang yoomo ngoo gi khoo" khoo" gye" ngau nyid.

⁵ Houg: lang" ludaid yi mo dayug gi ngoori tid zigi Yu" we' angoug:- Yuda byukung: mo khang khyi ein: da" David da" amyed ashen, yi mo dayug gi He: dazig nyhed loem: ri yo" shed' pyam lho: mougsoug" deing: ri we' yo" phang bye, ga: tid.

⁶ Hau: thang: ri yang nu" dadu: gi dei noem, gougnyhoug myid: ja: yo' Ludaid yi khyam, lheung to" da" zhung: tang mo agung moo yab, jo, ziri ngoo myang- said' pyam' shau" bye: da" yang nu" yo' du nyid da- nyang: moo khyoug: nyhed khyoug: yo' myojid" nyhed loem: dab. Hau: zigi mougmyid gyab, goin" jang" khyoo:- nhang: kaid' da" Mangso venyi nyhed yug nghoid.

⁷ Hau: yang nu" gi ju" re" lho: zhung: tang tho' moo zhoung: jo, su: da" lo, yo shoid mo moug soug deing: ri yu da.

⁸ Houg: su" yu da" uri gougnyhoug myid: du: yo' ludaid eig xe: myid: youg bang: gi nyang: nya: da" teing joem ri we' Mangso byu yi akyu" myo, ein: da" nam, pyo: shoem: yo' byeung" jo, da" - sheing: goem joem ri ngab, sho' zheung: ci: lho: nyangnu" da" shid khoin" moo goeb khyo' ago".

⁹ Nyangnu" khoin" thu' lo da" jikhoin" seig gi nang gi gung leig xoin" bui" wa shid re" said pyam' zi shau" wigi myeing" cang: joeb, azhang cang: joeb mo, yo' byumyu" yi bain sho' mo, ri Mangso byumyu" yi bue" loo wa shid re" qei yu too" bye: yoomo nang gi he: da" mougsoug" deing: yu lho: dazid' joem ri phang wa zi gimoin: yi" nyid bye.

¹⁰ Nang gi nyangnu" ri ngoonu" da" Mangso mungdain: moozoo" ri zei: wa da" shid re" Khainjung aya ri ab, byid: bye- Hau: lho: wigi nyangnu" gi he: da" mougsoug" ri yo" vhoeb, khang" boem wa zi nghoid- ga: wigi khoin" nyid boem.

¹¹ Hau: thang: moo ngoo doem yu" kaid ri zhung: tang nam mo gougnyhoug myid: ja: yo' ludaid yi da" loem: lheing khab, moo moug: lagyoo: yi moin, moin, sen, sen, nghab loo a- oung mo, yab yoin" to" ziyo'

¹² Nyangnu" tid boem zigi " Said pyam' zi shau" bye: da" yang nu" gi myonhoo: phung" yoeb, soid gain ziyoo- phajhi" juyhi: yo' yoem: so' yoem: vhoo" - myonhoo: ngilang: phoug" tab ngi shab, byid: moin: zigi coung" nghei byid: zi: kham: yu wa moin" yi" nyid o"- ga: thui: zeing thui: moo" yo' coung" nghei nyid boem ago".

¹³ Hau: tho' mo gootu: moug: khung: mougdi mougmyid yoosoo" myid' the" pyam: yo' nam mug dara, khyi khang" moo" moo nyid da" dei noem loeb, noem dangain" mo, gi " Zhung: tang tho' moo zhoung: jo, su: yo' yang nu" gi moug: myed pyaid khang" moo" moo myonhoo: phung" yoeb, yo' phoug" tab ngi shab, byid: ziyo' coung" nghei byid: khyoo: gi pyaid moo too: moo dajo, jo, baja" o"- ga: wigi khoin" jikhoin" thui: joem ri ngoo shau" gyo.

¹⁴ Houg: lang" gougnyhoug myid ja: bang: gi " Amen,, ga: tid ago". Hau: lho: wigi ludaid' yi we' goeb khyo' lho: coung" pid ago".